UtshovChapter 78
78.1
वैशंपायन उवाच
श्रुत्वा कुमारं जातं तु देवयानी शुचिस्मिता
चिन्तयामास दुःखार्ता शर्मिष्ठां प्रति भारत
Vaishampayana uvacha
Shrutva kumaram jatam tu devayani shuchismita
Chintayamasa duhkharta sharmishtham prati bharata
78.2
अभिगम्य च शर्मिष्ठां देवयान्यब्रवीदिदम्
किमिदं वृजिनं सुभ्रु कृतं ते कामलुब्धया
Abhigamya cha sharmishtham devayanyabravididam
Kimidam vrijinam subhru kritam te kamalubdhaya
78.3
शर्मिष्ठोवाच
ऋषिरभ्यागतः कश्चिद्धर्मात्मा वेदपारगः
स मया वरदः कामं याचितो धर्मसंहितम्
Sharmishthovacha
Rishirabhyagatah kashchiddharmatma vedaparagah
Sa maya varadah kamam yachito dharmasanhitam
78.4
नाहमन्यायतः काममाचरामि शुचिस्मिते
तस्मादृषेर्ममापत्यमिति सत्यं ब्रवीमि ते
Nahamanyayatah kamamacharami shuchismite
Tasmadrishermamapatyamiti satyam bravimi te
78.5
देवयान्युवाच
शोभनं भीरु सत्यं चेदथ स ज्ञायते द्विजः
गोत्रनामाभिजनतो वेत्तुमिच्छामि तं द्विजम्
Devayanyuvacha
Shobhanam bhiru satyam chedatha sa gyayate dvijah
Gotranamabhijanato vettumichchhami tam dvijam
78.6
शर्मिष्ठोवाच
ओजसा तेजसा चैव दीप्यमानं रविं यथा
तं दृष्ट्वा मम संप्रष्टुं शक्तिर्नासीच्छुचिस्मिते
Sharmishthovacha
Ojasa tejasa chaiva dipyamanam ravim yatha
Tam drishtva mama samprashtum shaktirnasichchhuchismite
78.7
देवयान्युवाच
यद्येतदेवं शर्मिष्ठे न मन्युर्विद्यते मम
अपत्यं यदि ते लब्धं ज्येष्ठाच्छ्रेष्ठाच्च वै द्विजात्
Devayanyuvacha
Yadyetadevam sharmishthe na manyurvidyate mama
Apatyam yadi te labdham jyeshthachchhreshthachcha vai dvijat
78.8
वैशंपायन उवाच
अन्योन्यमेवमुक्त्वा च संप्रहस्य च ते मिथः
जगाम भार्गवी वेश्म तथ्यमित्येव जज्ञुषी
Vaishampayana uvacha
Anyonyamevamuktva cha samprahasya cha te mithah
Jagama bhargavi veshma tathyamityeva jagyushi
78.9
ययातिर्देवयान्यां तु पुत्रावजनयन्नृपः
यदुं च तुर्वसुं चैव शक्रविष्णू इवापरौ
Yayatirdevayanyam tu putravajanayannripah
Yadum cha turvasum chaiva shakravishnu ivaparau
78.10
तस्मादेव तु राजर्षेः शर्मिष्ठा वार्षपर्वणी
द्रुह्युं चानुं च पूरुं च त्रीन्कुमारानजीजनत्
Tasmadeva tu rajarsheh sharmishtha varshaparvani
Druhyum chanum cha purum cha trinkumaranajijanat
78.11
ततः काले तु कस्मिंश्चिद्देवयानी शुचिस्मिता
ययातिसहिता राजन्निर्जगाम महावनम्
Tatah kale tu kasminshchiddevayani shuchismita
Yayatisahita rajannirjagama mahavanam
78.12
ददर्श च तदा तत्र कुमारान्देवरूपिणः
क्रीडमानान्सुविश्रब्धान्विस्मिता चेदमब्रवीत्
Dadarsha cha tada tatra kumarandevarupinah
Kridamanansuvishrabdhanvismita chedamabravit
78.13
कस्यैते दारका राजन्देवपुत्रोपमाः शुभाः
वर्चसा रूपतश्चैव सदृशा मे मतास्तव
Kasyaite daraka rajandevaputropamah shubhah
Varchasa rupatashchaiva sadrisha me matastava
78.14
एवं पृष्ट्वा तु राजानं कुमारान्पर्यपृच्छत
किंनामधेयगोत्रो वः पुत्रका ब्राह्मणः पिता
विब्रूत मे यथातथ्यं श्रोतुमिच्छामि तं ह्यहम्
Evam prishtva tu rajanam kumaranparyaprichchhata
Kinnamadheyagotro vah putraka brahmanah pita
Vibruta me yathatathyam shrotumichchhami tam hyaham
78.15
तेऽदर्शयन्प्रदेशिन्या तमेव नृपसत्तमम्
शर्मिष्ठां मातरं चैव तस्याचख्युश्च दारकाः
Tedarshayanpradeshinya tameva nripasattamam
Sharmishtham mataram chaiva tasyachakhyushcha darakah
78.16
इत्युक्त्वा सहितास्ते तु राजानमुपचक्रमुः
नाभ्यनन्दत तान्राजा देवयान्यास्तदान्तिके
रुदन्तस्तेऽथ शर्मिष्ठामभ्ययुर्बालकास्ततः
Ityuktva sahitaste tu rajanamupachakramuh
Nabhyanandata tanraja devayanyastadantike
Rudantastetha sharmishthamabhyayurbalakastatah
78.17
दृष्ट्वा तु तेषां बालानां प्रणयं पार्थिवं प्रति
बुद्ध्वा च तत्त्वतो देवी शर्मिष्ठामिदमब्रवीत्
Drishtva tu tesham balanam pranayam parthivam prati
Buddhva cha tattvato devi sharmishthamidamabravit
78.18
मदधीना सती कस्मादकार्षीर्विप्रियं मम
तमेवासुरधर्मं त्वमास्थिता न बिभेषि किम्
Madadhina sati kasmadakarshirvipriyam mama
Tamevasuradharmam tvamasthita na bibheshi kim
78.19
शर्मिष्ठोवाच
यदुक्तमृषिरित्येव तत्सत्यं चारुहासिनि
न्यायतो धर्मतश्चैव चरन्ती न बिभेमि ते
Sharmishthovacha
Yaduktamrishirityeva tatsatyam charuhasini
Nyayato dharmatashchaiva charanti na bibhemi te
78.20
यदा त्वया वृतो राजा वृत एव तदा मया
सखीभर्ता हि धर्मेण भर्ता भवति शोभने
Yada tvaya vrito raja vrita eva tada maya
Sakhibharta hi dharmena bharta bhavati shobhane
78.21
पूज्यासि मम मान्या च ज्येष्ठा श्रेष्ठा च ब्राह्मणी
त्वत्तोऽपि मे पूज्यतमो राजर्षिः किं न वेत्थ तत्
Pujyasi mama manya cha jyeshtha shreshtha cha brahmani
Tvattopi me pujyatamo rajarshih kim na vettha tat
78.22
वैशंपायन उवाच
श्रुत्वा तस्यास्ततो वाक्यं देवयान्यब्रवीदिदम्
राजन्नाद्येह वत्स्यामि विप्रियं मे कृतं त्वया
Vaishampayana uvacha
Shrutva tasyastato vakyam devayanyabravididam
Rajannadyeha vatsyami vipriyam me kritam tvaya
78.23
सहसोत्पतितां श्यामां दृष्ट्वा तां साश्रुलोचनाम्
त्वरितं सकाशं काव्यस्य प्रस्थितां व्यथितस्तदा
Sahasotpatitam shyamam drishtva tam sashrulochanam
Tvaritam sakasham kavyasya prasthitam vyathitastada
78.24
अनुवव्राज संभ्रान्तः पृष्ठतः सान्त्वयन्नृपः
न्यवर्तत न चैव स्म क्रोधसंरक्तलोचना
Anuvavraja sambhrantah prishthatah santvayannripah
Nyavartata na chaiva sma krodhasanraktalochana
78.25
अविब्रुवन्ती किंचित्तु राजानं चारुलोचना
अचिरादिव संप्राप्ता काव्यस्योशनसोऽन्तिकम्
Avibruvanti kinchittu rajanam charulochana
Achiradiva samprapta kavyasyoshanasontikam
78.26
सा तु दृष्ट्वैव पितरमभिवाद्याग्रतः स्थिता
अनन्तरं ययातिस्तु पूजयामास भार्गवम्
Sa tu drishtvaiva pitaramabhivadyagratah sthita
Anantaram yayatistu pujayamasa bhargavam
78.27
देवयान्युवाच
अधर्मेण जितो धर्मः प्रवृत्तमधरोत्तरम्
शर्मिष्ठयातिवृत्तास्मि दुहित्रा वृषपर्वणः
Devayanyuvacha
Adharmena jito dharmah pravrittamadharottaram
Sharmishthayativrittasmi duhitra vrishaparvanah
78.28
त्रयोऽस्यां जनिताः पुत्रा राज्ञानेन ययातिना
दुर्भगाया मम द्वौ तु पुत्रौ तात ब्रवीमि ते
Trayosyam janitah putra ragyanena yayatina
Durbhagaya mama dvau tu putrau tata bravimi te
78.29
धर्मज्ञ इति विख्यात एष राजा भृगूद्वह
अतिक्रान्तश्च मर्यादां काव्यैतत्कथयामि ते
Dharmagya iti vikhyata esha raja bhrigudvaha
Atikrantashcha maryadam kavyaitatkathayami te
78.30
शुक्र उवाच
धर्मज्ञः सन्महाराज योऽधर्ममकृथाः प्रियम्
तस्माज्जरा त्वामचिराद्धर्षयिष्यति दुर्जया
Shukra uvacha
Dharmagyah sanmaharaja yodharmamakrithah priyam
Tasmajjara tvamachiraddharshayishyati durjaya
78.31
ययातिरुवाच
ऋतुं वै याचमानाया भगवन्नान्यचेतसा
दुहितुर्दानवेन्द्रस्य धर्म्यमेतत्कृतं मया
Yayatiruvacha
Ritum vai yachamanaya bhagavannanyachetasa
Duhiturdanavendrasya dharmyametatkritam maya
78.32
ऋतुं वै याचमानाया न ददाति पुमान्वृतः
भ्रूणहेत्युच्यते ब्रह्मन्स इह ब्रह्मवादिभिः
Ritum vai yachamanaya na dadati pumanvritah
Bhrunahetyuchyate brahmansa iha brahmavadibhih
78.33
अभिकामां स्त्रियं यस्तु गम्यां रहसि याचितः
नोपैति स च धर्मेषु भ्रूणहेत्युच्यते बुधैः
Abhikamam striyam yastu gamyam rahasi yachitah
Nopaiti sa cha dharmeshu bhrunahetyuchyate budhaih
78.34
इत्येतानि समीक्ष्याहं कारणानि भृगूद्वह
अधर्मभयसंविग्नः शर्मिष्ठामुपजग्मिवान्
Ityetani samikshyaham karanani bhrigudvaha
Adharmabhayasanvignah sharmishthamupajagmivan
78.35
शुक्र उवाच
नन्वहं प्रत्यवेक्ष्यस्ते मदधीनोऽसि पार्थिव
मिथ्याचारस्य धर्मेषु चौर्यं भवति नाहुष
Shukra uvacha
Nanvaham pratyavekshyaste madadhinosi parthiva
Mithyacharasya dharmeshu chauryam bhavati nahusha
78.36
वैशंपायन उवाच
क्रुद्धेनोशनसा शप्तो ययातिर्नाहुषस्तदा
पूर्वं वयः परित्यज्य जरां सद्योऽन्वपद्यत
Vaishampayana uvacha
Kruddhenoshanasa shapto yayatirnahushastada
Purvam vayah parityajya jaram sadyonvapadyata
78.37
ययातिरुवाच
अतृप्तो यौवनस्याहं देवयान्यां भृगूद्वह
प्रसादं कुरु मे ब्रह्मञ्जरेयं मा विशेत माम्
Yayatiruvacha
Atripto yauvanasyaham devayanyam bhrigudvaha
Prasadam kuru me brahmanjareyam ma visheta mam
78.38
शुक्र उवाच
नाहं मृषा ब्रवीम्येतज्जरां प्राप्तोऽसि भूमिप
जरां त्वेतां त्वमन्यस्मै संक्रामय यदीच्छसि
Shukra uvacha
Naham mrisha bravimyetajjaram praptosi bhumipa
Jaram tvetam tvamanyasmai sankramaya yadichchhasi
78.39
ययातिरुवाच
राज्यभाक्स भवेद्ब्रह्मन्पुण्यभाक्कीर्तिभाक्तथा
यो मे दद्याद्वयः पुत्रस्तद्भवाननुमन्यताम्
Yayatiruvacha
Rajyabhaksa bhavedbrahmanpunyabhakkirtibhaktatha
Yo me dadyadvayah putrastadbhavananumanyatam
78.40
शुक्र उवाच
संक्रामयिष्यसि जरां यथेष्टं नहुषात्मज
मामनुध्याय भावेन न च पापमवाप्स्यसि
Shukra uvacha
Sankramayishyasi jaram yatheshtam nahushatmaja
Mamanudhyaya bhavena na cha papamavapsyasi
78.41
वयो दास्यति ते पुत्रो यः स राजा भविष्यति
आयुष्मान्कीर्तिमांश्चैव बह्वपत्यस्तथैव च
Vayo dasyati te putro yah sa raja bhavishyati
Ayushmankirtimanshchaiva bahvapatyastathaiva cha