অধ্যায় 171

171.1

ঔর্ব উবাচ
উক্তবানস্মি যাং ক্রোধাত্প্রতিজ্ঞাং পিতরস্তদা
সর্বলোকবিনাশায় ন সা মে বিতথা ভবেৎ

বৃথারোষপ্রতিজ্ঞো হি নাহং জীবিতুমুত্সহে
অনিস্তীর্ণো হি মাং রোষো দহেদগ্নিরিবারণিম্

যো হি কারণতঃ ক্রোধং সংজাতং ক্ষন্তুমর্হতি
নালং স মনুজঃ সম্যক্ত্রিবর্গং পরিরক্ষিতুম্

অশিষ্টানাং নিয়ন্তা হি শিষ্টানাং পরিরক্ষতা
স্থানে রোষঃ প্রয়ুক্তঃ স্যান্নৃপৈঃ স্বর্গজিগীষুভিঃ

অশ্রৌষমহমূরুস্থো গর্ভশয্যাগতস্তদা
আরাবং মাতৃবর্গস্য ভৃগূণাং ক্ষত্রিয়ৈর্বধে

সামরৈর্হি যদা লোকৈর্ভৃগূণাং ক্ষত্রিয়াধমৈঃ
আগর্ভোত্সাদনং ক্ষান্তং তদা মাং মন্যুরাবিষৎ

আপূর্ণকোশাঃ কিল মে মাতরঃ পিতরস্তথা
ভয়াত্সর্বেষু লোকেষু নাধিজগ্মুঃ পরায়ণম্

তান্ভৃগূণাং তদা দারান্কশ্চিন্নাভ্যবপদ্যত
যদা তদা দধারেয়মূরুণৈকেন মাং শুভা

প্রতিষেদ্ধা হি পাপস্য যদা লোকেষু বিদ্যতে
তদা সর্বেষু লোকেষু পাপকৃন্নোপপদ্যতে

যদা তু প্রতিষেদ্ধারং পাপো ন লভতে ক্বচিৎ
তিষ্ঠন্তি বহবো লোকে তদা পাপেষু কর্মসু

জানন্নপি চ যঃ পাপং শক্তিমান্ন নিয়চ্ছতি
ঈশঃ সন্সোঽপি তেনৈব কর্মণা সংপ্রয়ুজ্যতে

রাজভিশ্চেশ্বরৈশ্চৈব যদি বৈ পিতরো মম
শক্তৈর্ন শকিতা ত্রাতুমিষ্টং মত্বেহ জীবিতম্

অত এষামহং ক্রুদ্ধো লোকানামীশ্বরোঽদ্য সন্
ভবতাং তু বচো নাহমলং সমতিবর্তিতুম্

মম চাপি ভবেদেতদীশ্বরস্য সতো মহৎ
উপেক্ষমাণস্য পুনর্লোকানাং কিল্বিষাদ্ভয়ম্

যশ্চায়ং মন্যুজো মেঽগ্নির্লোকানাদাতুমিচ্ছতি
দহেদেষ চ মামেব নিগৃহীতঃ স্বতেজসা

ভবতাং চ বিজানামি সর্বলোকহিতেপ্সুতাম্
তস্মাদ্বিদধ্বং যচ্ছ্রেয়ো লোকানাং মম চেশ্বরাঃ

পিতর ঊচুঃ
য এষ মন্যুজস্তেঽগ্নির্লোকানাদাতুমিচ্ছতি
অপ্সু তং মুঞ্চ ভদ্রং তে লোকা হ্যপ্সু প্রতিষ্ঠিতাঃ

আপোময়াঃ সর্বরসাঃ সর্বমাপোময়ং জগৎ
তস্মাদপ্সু বিমুঞ্চেমং ক্রোধাগ্নিং দ্বিজসত্তম

অয়ং তিষ্ঠতু তে বিপ্র যদীচ্ছসি মহোদধৌ
মন্যুজোঽগ্নির্দহন্নাপো লোকা হ্যাপোময়াঃ স্মৃতাঃ

এবং প্রতিজ্ঞা সত্যেয়ং তবানঘ ভবিষ্যতি
ন চৈব সামরা লোকা গমিষ্যন্তি পরাভবম্

বসিষ্ঠ উবাচ
ততস্তং ক্রোধজং তাত ঔর্বোঽগ্নিং বরুণালয়ে
উত্সসর্জ স চৈবাপ উপয়ুঙ্ক্তে মহোদধৌ

মহদ্ধয়শিরো ভূত্বা যত্তদ্বেদবিদো বিদুঃ
তমগ্নিমুদ্গিরন্বক্ত্রাত্পিবত্যাপো মহোদধৌ

তস্মাত্ত্বমপি ভদ্রং তে ন লোকান্হন্তুমর্হসি
পরাশর পরান্ধর্মাঞ্জানঞ্জ্ঞানবতাং বর