অধ্যায় 170

170.1

ব্রাহ্মণ্যুবাচ
নাহং গৃহ্ণামি বস্তাত দৃষ্টীর্নাস্তি রুষান্বিতা
অয়ং তু ভার্গবো নূনমূরুজঃ কুপিতোঽদ্য বঃ

তেন চক্ষূংষি বস্তাত নূনং কোপান্মহাত্মনা
স্মরতা নিহতান্বন্ধূনাদত্তানি ন সংশয়ঃ

গর্ভানপি যদা যূয়ং ভৃগূণাং ঘ্নত পুত্রকাঃ
তদায়মূরুণা গর্ভো ময়া বর্ষশতং ধৃতঃ

ষডঙ্গশ্চাখিলো বেদ ইমং গর্ভস্থমেব হি
বিবেশ ভৃগুবংশস্য ভূয়ঃ প্রিয়চিকীর্ষয়া

সোঽয়ং পিতৃবধান্নূনং ক্রোধাদ্বো হন্তুমিচ্ছতি
তেজসা যস্য দিব্যেন চক্ষূংষি মুষিতানি বঃ

তমিমং তাত যাচধ্বমৌর্বং মম সুতোত্তমম্
অয়ং বঃ প্রণিপাতেন তুষ্টো দৃষ্টীর্বিমোক্ষ্যতি

গন্ধর্ব উবাচ
এবমুক্তাস্ততঃ সর্বে রাজানস্তে তমূরুজম্
ঊচুঃ প্রসীদেতি তদা প্রসাদং চ চকার সঃ

অনেনৈব চ বিখ্যাতো নাম্না লোকেষু সত্তমঃ
স ঔর্ব ইতি বিপ্রর্ষিরূরুং ভিত্ত্বা ব্যজায়ত

চক্ষূংষি প্রতিলভ্যাথ প্রতিজগ্মুস্ততো নৃপাঃ
ভার্গবস্তু মুনির্মেনে সর্বলোকপরাভবম্

স চক্রে তাত লোকানাং বিনাশায় মহামনাঃ
সর্বেষামেব কার্ত্স্ন্যেন মনঃ প্রবণমাত্মনঃ

ইচ্ছন্নপচিতিং কর্তুং ভৃগূণাং ভৃগুসত্তমঃ
সর্বলোকবিনাশায় তপসা মহতৈধিতঃ

তাপয়ামাস লোকান্স সদেবাসুরমানুষান্
তপসোগ্রেণ মহতা নন্দয়িষ্যন্পিতামহান্

ততস্তং পিতরস্তাত বিজ্ঞায় ভৃগুসত্তমম্
পিতৃলোকাদুপাগম্য সর্ব ঊচুরিদং বচঃ

ঔর্ব দৃষ্টঃ প্রভাবস্তে তপসোগ্রস্য পুত্রক
প্রসাদং কুরু লোকানাং নিয়চ্ছ ক্রোধমাত্মনঃ

নানীশৈর্হি তদা তাত ভৃগুভির্ভাবিতাত্মভিঃ
বধোঽভ্যুপেক্ষিতঃ সর্বৈঃ ক্ষত্রিয়াণাং বিহিংসতাম্

আয়ুষা হি প্রকৃষ্টেন যদা নঃ খেদ আবিশৎ
তদাস্মাভির্বধস্তাত ক্ষত্রিয়ৈরীপ্সিতঃ স্বয়ম্

নিখাতং তদ্ধি বৈ বিত্তং কেনচিদ্ভৃগুবেশ্মনি
বৈরায়ৈব তদা ন্যস্তং ক্ষত্রিয়ান্কোপয়িষ্ণুভিঃ
কিং হি বিত্তেন নঃ কার্যং স্বর্গেপ্সূনাং দ্বিজর্ষভ

যদা তু মৃত্যুরাদাতুং ন নঃ শক্নোতি সর্বশঃ
তদাস্মাভিরয়ং দৃষ্ট উপায়স্তাত সংমতঃ

আত্মহা চ পুমাংস্তাত ন লোকাঁল্লভতে শুভান্
ততোঽস্মাভিঃ সমীক্ষ্যৈবং নাত্মনাত্মা বিনাশিতঃ

ন চৈতন্নঃ প্রিয়ং তাত যদিদং কর্তুমিচ্ছসি
নিয়চ্ছেদং মনঃ পাপাত্সর্বলোকপরাভবাৎ

ন হি নঃ ক্ষত্রিয়াঃ কেচিন্ন লোকাঃ সপ্ত পুত্রক
দূষয়ন্তি তপস্তেজঃ ক্রোধমুত্পতিতং জহি