Utshovঅধ্যায় 169
169.1
গন্ধর্ব উবাচ
আশ্রমস্থা ততঃ পুত্রমদৃশ্যন্তী ব্যজায়ত
শক্তেঃ কুলকরং রাজন্দ্বিতীয়মিব শক্তিনম্
169.2
জাতকর্মাদিকাস্তস্য ক্রিয়াঃ স মুনিপুংগবঃ
পৌত্রস্য ভরতশ্রেষ্ঠ চকার ভগবান্স্বয়ম্
169.3
পরাসুশ্চ যতস্তেন বসিষ্ঠঃ স্থাপিতস্তদা
গর্ভস্থেন ততো লোকে পরাশর ইতি স্মৃতঃ
169.4
অমন্যত স ধর্মাত্মা বসিষ্ঠং পিতরং তদা
জন্মপ্রভৃতি তস্মিংশ্চ পিতরীব ব্যবর্তত
169.5
স তাত ইতি বিপ্রর্ষিং বসিষ্ঠং প্রত্যভাষত
মাতুঃ সমক্ষং কৌন্তেয় অদৃশ্যন্ত্যাঃ পরংতপ
169.6
তাতেতি পরিপূর্ণার্থং তস্য তন্মধুরং বচঃ
অদৃশ্যন্ত্যশ্রুপূর্ণাক্ষী শৃণ্বন্তী তমুবাচ হ
169.7
মা তাত তাত তাতেতি ন তে তাতো মহামুনিঃ
রক্ষসা ভক্ষিতস্তাত তব তাতো বনান্তরে
169.8
মন্যসে যং তু তাতেতি নৈষ তাতস্তবানঘ
আর্যস্ত্বেষ পিতা তস্য পিতুস্তব মহাত্মনঃ
169.9
স এবমুক্তো দুঃখার্তঃ সত্যবাগৃষিসত্তমঃ
সর্বলোকবিনাশায় মতিং চক্রে মহামনাঃ
169.10
তং তথা নিশ্চিতাত্মানং মহাত্মানং মহাতপাঃ
বসিষ্ঠো বারয়ামাস হেতুনা যেন তচ্ছৃণু
169.11
বসিষ্ঠ উবাচ
কৃতবীর্য ইতি খ্যাতো বভূব নৃপতিঃ ক্ষিতৌ
যাজ্যো বেদবিদাং লোকে ভৃগূণাং পার্থিবর্ষভঃ
169.12
স তানগ্রভুজস্তাত ধান্যেন চ ধনেন চ
সোমান্তে তর্পয়ামাস বিপুলেন বিশাং পতিঃ
169.13
তস্মিন্নৃপতিশার্দূলে স্বর্যাতেঽথ কদাচন
বভূব তত্কুলেয়ানাং দ্রব্যকার্যমুপস্থিতম্
169.14
তে ভৃগূণাং ধনং জ্ঞাত্বা রাজানঃ সর্ব এব হ
যাচিষ্ণবোঽভিজগ্মুস্তাংস্তাত ভার্গবসত্তমান্
169.15
ভূমৌ তু নিদধুঃ কেচিদ্ভৃগবো ধনমক্ষয়ম্
দদুঃ কেচিদ্দ্বিজাতিভ্যো জ্ঞাত্বা ক্ষত্রিয়তো ভয়ম্
169.16
ভৃগবস্তু দদুঃ কেচিত্তেষাং বিত্তং যথেপ্সিতম্
ক্ষত্রিয়াণাং তদা তাত কারণান্তরদর্শনাৎ
169.17
ততো মহীতলং তাত ক্ষত্রিয়েণ যদৃচ্ছয়া
খনতাধিগতং বিত্তং কেনচিদ্ভৃগুবেশ্মনি
তদ্বিত্তং দদৃশুঃ সর্বে সমেতাঃ ক্ষত্রিয়র্ষভাঃ
169.18
অবমন্য ততঃ কোপাদ্ভৃগূংস্তাঞ্শরণাগতান্
নিজঘ্নুস্তে মহেষ্বাসাঃ সর্বাংস্তান্নিশিতৈঃ শরৈঃ
আ গর্ভাদনুকৃন্তন্তশ্চেরুশ্চৈব বসুংধরাম্
169.19
তত উচ্ছিদ্যমানেষু ভৃগুষ্বেবং ভয়াত্তদা
ভৃগুপত্ন্যো গিরিং তাত হিমবন্তং প্রপেদিরে
169.20
তাসামন্যতমা গর্ভং ভয়াদ্দাধার তৈজসম্
ঊরুণৈকেন বামোরূর্ভর্তুঃ কুলবিবৃদ্ধয়ে
দদৃশুর্ব্রাহ্মণীং তাং তে দীপ্যমানাং স্বতেজসা
169.21
অথ গর্ভঃ স ভিত্ত্বোরুং ব্রাহ্মণ্যা নির্জগাম হ
মুষ্ণন্দৃষ্টীঃ ক্ষত্রিয়াণাং মধ্যাহ্ন ইব ভাস্করঃ
ততশ্চক্ষুর্বিয়ুক্তাস্তে গিরিদুর্গেষু বভ্রমুঃ
169.22
ততস্তে মোঘসংকল্পা ভয়ার্তাঃ ক্ষত্রিয়র্ষভাঃ
ব্রহ্মণীং শরণং জগ্মুর্দৃষ্ট্যর্থং তামনিন্দিতাম্
169.23
ঊচুশ্চৈনাং মহাভাগাং ক্ষত্রিয়াস্তে বিচেতসঃ
জ্যোতিঃপ্রহীণা দুঃখার্তাঃ শান্তার্চিষ ইবাগ্নয়ঃ
169.24
ভগবত্যাঃ প্রসাদেন গচ্ছেত্ক্ষত্রং সচক্ষুষম্
উপারম্য চ গচ্ছেম সহিতাঃ পাপকর্মণঃ
169.25
সপুত্রা ত্বং প্রসাদং নঃ সর্বেষাং কর্তুমর্হসি
পুনর্দৃষ্টিপ্রদানেন রাজ্ঞঃ সংত্রাতুমর্হসি