অধ্যায় 168

168.1

বসিষ্ঠ উবাচ
মা ভৈঃ পুত্রি ন ভেতব্যং রক্ষসস্তে কথংচন
নৈতদ্রক্ষো ভয়ং যস্মাত্পশ্যসি ত্বমুপস্থিতম্

168.2

রাজা কল্মাষপাদোঽয়ং বীর্যবান্প্রথিতো ভুবি
স এষোঽস্মিন্বনোদ্দেশে নিবসত্যতিভীষণঃ

168.3

গন্ধর্ব উবাচ
তমাপতন্তং সংপ্রেক্ষ্য বসিষ্ঠো ভগবানৃষিঃ
বারয়ামাস তেজস্বী হুংকরেণৈব ভারত

168.4

মন্ত্রপূতেন চ পুনঃ স তমভ্যুক্ষ্য বারিণা
মোক্ষয়ামাস বৈ ঘোরাদ্রাক্ষসাদ্রাজসত্তমম্

168.5

স হি দ্বাদশ বর্ষাণি বসিষ্ঠস্যৈব তেজসা
গ্রস্ত আসীদ্গৃহেণেব পর্বকালে দিবাকরঃ

168.6

রক্ষসা বিপ্রমুক্তোঽথ স নৃপস্তদ্বনং মহৎ
তেজসা রঞ্জয়ামাস সংধ্যাভ্রমিব ভাস্করঃ

168.7

প্রতিলভ্য ততঃ সংজ্ঞামভিবাদ্য কৃতাঞ্জলিঃ
উবাচ নৃপতিঃ কালে বসিষ্ঠমৃষিসত্তমম্

168.8

সৌদাসোঽহং মহাভাগ যাজ্যস্তে দ্বিজসত্তম
অস্মিন্কালে যদিষ্টং তে ব্রূহি কিং করবাণি তে

168.9

বসিষ্ঠ উবাচ
বৃত্তমেতদ্যথাকালং গচ্ছ রাজ্যং প্রশাধি তৎ
ব্রাহ্মণাংশ্চ মনুষ্যেন্দ্র মাবমংস্থাঃ কদাচন

168.10

রাজোবাচ
নাবমংস্যাম্যহং ব্রহ্মন্কদাচিদ্ব্রাহ্মণর্ষভান্
ত্বন্নিদেশে স্থিতঃ শশ্বত্পুজয়িষ্যাম্যহং দ্বিজান্

168.11

ইক্ষ্বাকূণাং তু যেনাহমনৃণঃ স্যাং দ্বিজোত্তম
তত্ত্বত্তঃ প্রাপ্তুমিচ্ছামি বরং বেদবিদাং বর

168.12

অপত্যায়েপ্সিতাং মহ্যং মহিষীং গন্তুমর্হসি
শীলরূপগুণোপেতামিক্ষ্বাকুকুলবৃদ্ধয়ে

168.13

গন্ধর্ব উবাচ
দদানীত্যেব তং তত্র রাজানং প্রত্যুবাচ হ
বসিষ্ঠঃ পরমেষ্বাসং সত্যসংধো দ্বিজোত্তমঃ

168.14

ততঃ প্রতিয়য়ৌ কালে বসিষ্ঠসহিতোঽনঘ
খ্যাতং পুরবরং লোকেষ্বয়োধ্যাং মনুজেশ্বরঃ

168.15

তং প্রজাঃ প্রতিমোদন্ত্যঃ সর্বাঃ প্রত্যুদ্যয়ুস্তদা
বিপাপ্মানং মহাত্মানং দিবৌকস ইবেশ্বরম্

168.16

অচিরাত্স মনুষ্যেন্দ্রো নগরীং পুণ্যকর্মণাম্
বিবেশ সহিতস্তেন বসিষ্ঠেন মহাত্মনা

168.17

দদৃশুস্তং ততো রাজন্নয়োধ্যাবাসিনো জনাঃ
পুষ্যেণ সহিতং কালে দিবাকরমিবোদিতম্

168.18

স হি তাং পূরয়ামাস লক্ষ্ম্যা লক্ষ্মীবতাং বরঃ
অয়োধ্যাং ব্যোম শীতাংশুঃ শরত্কাল ইবোদিতঃ

168.19

সংসিক্তমৃষ্টপন্থানং পতাকোচ্ছ্রয়ভূষিতম্
মনঃ প্রহ্লাদয়ামাসা তস্য তত্পুরমুত্তমম্

168.20

তুষ্টপুষ্টজনাকীর্ণা সা পুরী কুরুনন্দন
অশোভত তদা তেন শক্রেণেবামরাবতী

168.21

ততঃ প্রবিষ্টে রাজেন্দ্রে তস্মিন্রাজনি তাং পুরীম্
তস্য রাজ্ঞোঽঽজ্ঞয়া দেবী বসিষ্ঠমুপচক্রমে

168.22

ঋতাবথ মহর্ষিঃ স সংবভূব তয়া সহ
দেব্যা দিব্যেন বিধিনা বসিষ্ঠঃ শ্রেষ্ঠভাগৃষিঃ

168.23

অথ তস্যাং সমুত্পন্নে গর্ভে স মুনিসত্তমঃ
রাজ্ঞাভিবাদিতস্তেন জগাম পুনরাশ্রমম্

168.24

দীর্ঘকালধৃতং গর্ভং সুষাব ন তু তং যদা
সাথ দেব্যশ্মনা কুক্ষিং নির্বিভেদ তদা স্বকম্

168.25

দ্বাদশেঽথ ততো বর্ষে স জজ্ঞে মনুজর্ষভ
অশ্মকো নাম রাজর্ষিঃ পোতনং যো ন্যবেশয়ৎ

Contains text from DharmicData, made available under the Open Database License (ODbL). Simple meanings are written by AI and can contain mistakes.