অধ্যায় 167

167.1

গন্ধর্ব উবাচ
ততো দৃষ্ট্বাশ্রমপদং রহিতং তৈঃ সুতৈর্মুনিঃ
নির্জগাম সুদুঃখার্তঃ পুনরেবাশ্রমাত্ততঃ

সোঽপশ্যত্সরিতং পূর্ণাং প্রাবৃট্কালে নবাম্ভসা
বৃক্ষান্বহুবিধান্পার্থ বহন্তীং তীরজান্বহূন্

অথ চিন্তাং সমাপেদে পুনঃ পৌরবনন্দন
অম্ভস্যস্যা নিমজ্জেয়মিতি দুঃখসমন্বিতঃ

ততঃ পাশৈস্তদাত্মানং গাঢং বদ্ধ্বা মহামুনিঃ
তস্যা জলে মহানদ্যা নিমমজ্জ সুদুঃখিতঃ

অথ ছিত্ত্বা নদী পাশাংস্তস্যারিবলমর্দন
সমস্থং তমৃষিং কৃত্বা বিপাশং সমবাসৃজৎ

উত্ততার ততঃ পাশৈর্বিমুক্তঃ স মহানৃষিঃ
বিপাশেতি চ নামাস্যা নদ্যাশ্চক্রে মহানৃষিঃ

শোকে বুদ্ধিং ততশ্চক্রে ন চৈকত্র ব্যতিষ্ঠত
সোঽগচ্ছত্পর্বতাংশ্চৈব সরিতশ্চ সরাংসি চ

ততঃ স পুনরেবর্ষির্নদীং হৈমবতীং তদা
চণ্ডগ্রাহবতীং দৃষ্ট্বা তস্যাঃ স্রোতস্যবাপতৎ

সা তমগ্নিসমং বিপ্রমনুচিন্ত্য সরিদ্বরা
শতধা বিদ্রুতা যস্মাচ্ছতদ্রুরিতি বিশ্রুতা

ততঃ স্থলগতং দৃষ্ট্বা তত্রাপ্যাত্মানমাত্মনা
মর্তুং ন শক্যমিত্যুক্ত্বা পুনরেবাশ্রমং যয়ৌ

বধ্বাদৃশ্যন্ত্যানুগত আশ্রমাভিমুখো ব্রজন্
অথ শুশ্রাব সংগত্যা বেদাধ্যয়ননিঃস্বনম্
পৃষ্ঠতঃ পরিপূর্ণার্থৈঃ ষড্ভিরঙ্গৈরলংকৃতম্

অনুব্রজতি কো ন্বেষ মামিত্যেব চ সোঽব্রবীৎ
অহং ত্বদৃশ্যতী নাম্না তং স্নুষা প্রত্যভাষত
শক্তের্ভার্যা মহাভাগ তপোয়ুক্তা তপস্বিনী

বসিষ্ঠ উবাচ
পুত্রি কস্যৈষ সাঙ্গস্য বেদস্যাধ্যয়নস্বনঃ
পুরা সাঙ্গস্য বেদস্য শক্তেরিব ময়া শ্রুতঃ

অদৃশ্যন্ত্যুবাচ
অয়ং কুক্ষৌ সমুত্পন্নঃ শক্তের্গর্ভঃ সুতস্য তে
সমা দ্বাদশ তস্যেহ বেদানভ্যসতো মুনে

গন্ধর্ব উবাচ
এবমুক্তস্ততো হৃষ্টো বসিষ্ঠঃ শ্রেষ্ঠভাগৃষিঃ
অস্তি সংতানমিত্যুক্ত্বা মৃত্যোঃ পার্থ ন্যবর্তত

ততঃ প্রতিনিবৃত্তঃ স তয়া বধ্বা সহানঘ
কল্মাষপাদমাসীনং দদর্শ বিজনে বনে

স তু দৃষ্ট্বৈব তং রাজা ক্রুদ্ধ উত্থায় ভারত
আবিষ্টো রক্ষসোগ্রেণ ইয়েষাত্তুং ততঃ স্ম তম্

অদৃশ্যন্তী তু তং দৃষ্ট্বা ক্রূরকর্মাণমগ্রতঃ
ভয়সংবিগ্নয়া বাচা বসিষ্ঠমিদমব্রবীৎ

অসৌ মৃত্যুরিবোগ্রেণ দণ্ডেন ভগবন্নিতঃ
প্রগৃহীতেন কাষ্ঠেন রাক্ষসোঽভ্যেতি ভীষণঃ

তং নিবারয়িতুং শক্তো নান্যোঽস্তি ভুবি কশ্চন
ত্বদৃতেঽদ্য মহাভাগ সর্ববেদবিদাং বর

ত্রাহি মাং ভগবন্পাপাদস্মাদ্দারুণদর্শনাৎ
রক্ষো অত্তুমিহ হ্যাবাং নূনমেতচ্চিকীর্ষতি