Utshovঅধ্যায় 166
166.1
গন্ধর্ব উবাচ
কল্মাষপাদ ইত্যস্মিঁল্লোকে রাজা বভূব হ
ইক্ষ্বাকুবংশজঃ পার্থ তেজসাসদৃশো ভুবি
166.2
স কদাচিদ্বনং রাজা মৃগয়াং নির্যয়ৌ পুরাৎ
মৃগান্বিধ্যন্বরাহাংশ্চ চচার রিপুমর্দনঃ
166.3
স তু রাজা মহাত্মানং বাসিষ্ঠমৃষিসত্তমম্
তৃষার্তশ্চ ক্ষুধার্তশ্চ একায়নগতঃ পথি
166.4
অপশ্যদজিতঃ সংখ্যে মুনিং প্রতিমুখাগতম্
শক্তিং নাম মহাভাগং বসিষ্ঠকুলনন্দনম্
জ্যেষ্ঠং পুত্রশতাত্পুত্রং বসিষ্ঠস্য মহাত্মনঃ
166.5
অপগচ্ছ পথোঽস্মাকমিত্যেবং পার্থিবোঽব্রবীৎ
তথা ঋষিরুবাচৈনং সান্ত্বয়ঞ্শ্লক্ষ্ণয়া গিরা
166.6
ঋষিস্তু নাপচক্রাম তস্মিন্ধর্মপথে স্থিতঃ
নাপি রাজা মুনের্মানাত্ক্রোধাচ্চাপি জগাম হ
166.7
অমুঞ্চন্তং তু পন্থানং তমৃষিং নৃপসত্তমঃ
জঘান কশয়া মোহাত্তদা রাক্ষসবন্মুনিম্
166.8
কশাপ্রহারাভিহতস্ততঃ স মুনিসত্তমঃ
তং শশাপ নৃপশ্রেষ্ঠং বাসিষ্ঠঃ ক্রোধমূর্চ্ছিতঃ
166.9
হংসি রাক্ষসবদ্যস্মাদ্রাজাপসদ তাপসম্
তস্মাত্ত্বমদ্য প্রভৃতি পুরুষাদো ভবিষ্যসি
166.10
মনুষ্যপিশিতে সক্তশ্চরিষ্যসি মহীমিমাম্
গচ্ছ রাজাধমেত্যুক্তঃ শক্তিনা বীর্যশক্তিনা
166.11
ততো যাজ্যনিমিত্তং তু বিশ্বামিত্রবসিষ্ঠয়োঃ
বৈরমাসীত্তদা তং তু বিশ্বামিত্রোঽন্বপদ্যত
166.12
তয়োর্বিবদতোরেবং সমীপমুপচক্রমে
ঋষিরুগ্রতপাঃ পার্থ বিশ্বামিত্রঃ প্রতাপবান্
166.13
ততঃ স বুবুধে পশ্চাত্তমৃষিং নৃপসত্তমঃ
ঋষেঃ পুত্রং বসিষ্ঠস্য বসিষ্ঠমিব তেজসা
166.14
অন্তর্ধায় তদাত্মানং বিশ্বামিত্রোঽপি ভারত
তাবুভাবুপচক্রাম চিকীর্ষন্নাত্মনঃ প্রিয়ম্
166.15
স তু শপ্তস্তদা তেন শক্তিনা বৈ নৃপোত্তমঃ
জগাম শরণং শক্তিং প্রসাদয়িতুমর্হয়ন্
166.16
তস্য ভাবং বিদিত্বা স নৃপতেঃ কুরুনন্দন
বিশ্বামিত্রস্ততো রক্ষ আদিদেশ নৃপং প্রতি
166.17
স শাপাত্তস্য বিপ্রর্ষের্বিশ্বামিত্রস্য চাজ্ঞয়া
রাক্ষসঃ কিংকরো নাম বিবেশ নৃপতিং তদা
166.18
রক্ষসা তু গৃহীতং তং বিদিত্বা স মুনিস্তদা
বিশ্বামিত্রোঽপ্যপক্রামত্তস্মাদ্দেশাদরিংদম
166.19
ততঃ স নৃপতির্বিদ্বান্রক্ষন্নাত্মানমাত্মনা
বলবত্পীড্যমানোঽপি রক্ষসান্তর্গতেন হ
166.20
দদর্শ তং দ্বিজঃ কশ্চিদ্রাজানং প্রস্থিতং পুনঃ
যয়াচে ক্ষুধিতশ্চৈনং সমাংসং ভোজনং তদা
166.21
তমুবাচাথ রাজর্ষির্দ্বিজং মিত্রসহস্তদা
আস্স্ব ব্রহ্মংস্ত্বমত্রৈব মুহূর্তমিতি সান্ত্বয়ন্
166.22
নিবৃত্তঃ প্রতিদাস্যামি ভোজনং তে যথেপ্সিতম্
ইত্যুক্ত্বা প্রয়য়ৌ রাজা তস্থৌ চ দ্বিজসত্তমঃ
166.23
অন্তর্গতং তু তদ্রাজ্ঞস্তদা ব্রাহ্মণভাষিতম্
সোঽন্তঃপুরং প্রবিশ্যাথ সংবিবেশ নরাধিপঃ
166.24
ততোঽর্ধরাত্র উত্থায় সূদমানায্য সত্বরম্
উবাচ রাজা সংস্মৃত্য ব্রাহ্মণস্য প্রতিশ্রুতম্
166.25
গচ্ছামুষ্মিন্নসৌ দেশে ব্রাহ্মণো মাং প্রতীক্ষতে
অন্নার্থী ত্বং তমন্নেন সমাংসেনোপপাদয়
166.26
এবমুক্তস্তদা সূদঃ সোঽনাসাদ্যামিষং ক্বচিৎ
নিবেদয়ামাস তদা তস্মৈ রাজ্ঞে ব্যথান্বিতঃ
166.27
রাজা তু রক্ষসাবিষ্টঃ সূদমাহ গতব্যথঃ
অপ্যেনং নরমাংসেন ভোজয়েতি পুনঃ পুনঃ
166.28
তথেত্যুক্ত্বা ততঃ সূদঃ সংস্থানং বধ্যঘাতিনাম্
গত্বা জহার ত্বরিতো নরমাংসমপেতভীঃ
166.29
স তত্সংস্কৃত্য বিধিবদন্নোপহিতমাশু বৈ
তস্মৈ প্রাদাদ্ব্রাহ্মণায় ক্ষুধিতায় তপস্বিনে
166.30
স সিদ্ধচক্ষুষা দৃষ্ট্বা তদন্নং দ্বিজসত্তমঃ
অভোজ্যমিদমিত্যাহ ক্রোধপর্যাকুলেক্ষণঃ
166.31
যস্মাদভোজ্যমন্নং মে দদাতি স নরাধিপঃ
তস্মাত্তস্যৈব মূঢস্য ভবিষ্যত্যত্র লোলুপা
166.32
সক্তো মানুষমাংসেষু যথোক্তঃ শক্তিনা পুরা
উদ্বেজনীয়ো ভূতানাং চরিষ্যতি মহীমিমাম্
166.33
দ্বিরনুব্যাহৃতে রাজ্ঞঃ স শাপো বলবানভূৎ
রক্ষোবলসমাবিষ্টো বিসংজ্ঞশ্চাভবত্তদা
166.34
ততঃ স নৃপতিশ্রেষ্ঠো রাক্ষসোপহতেন্দ্রিয়ঃ
উবাচ শক্তিং তং দৃষ্ট্বা নচিরাদিব ভারত
166.35
যস্মাদসদৃশঃ শাপঃ প্রয়ুক্তোঽয়ং ত্বয়া ময়ি
তস্মাত্ত্বত্তঃ প্রবর্তিষ্যে খাদিতুং মানুষানহম্
166.36
এবমুক্ত্বা ততঃ সদ্যস্তং প্রাণৈর্বিপ্রয়ুজ্য সঃ
শক্তিনং ভক্ষয়ামাস ব্যাঘ্রঃ পশুমিবেপ্সিতম্
166.37
শক্তিনং তু হতং দৃষ্ট্বা বিশ্বামিত্রস্ততঃ পুনঃ
বসিষ্ঠস্যৈব পুত্রেষু তদ্রক্ষঃ সংদিদেশ হ
166.38
স তাঞ্শতাবরান্পুত্রান্বসিষ্ঠস্য মহাত্মনঃ
ভক্ষয়ামাস সংক্রুদ্ধঃ সিংহঃ ক্ষুদ্রমৃগানিব
166.39
বসিষ্ঠো ঘাতিতাঞ্শ্রুত্বা বিশ্বামিত্রেণ তান্সুতান্
ধারয়ামাস তং শোকং মহাদ্রিরিব মেদিনীম্
166.40
চক্রে চাত্মবিনাশায় বুদ্ধিং স মুনিসত্তমঃ
ন ত্বেব কুশিকোচ্ছেদং মেনে মতিমতাং বরঃ
166.41
স মেরুকূটাদাত্মানং মুমোচ ভগবানৃষিঃ
শিরস্তস্য শিলায়াং চ তূলরাশাবিবাপতৎ
166.42
ন মমার চ পাতেন স যদা তেন পাণ্ডব
তদাগ্নিমিদ্ধ্বা ভগবান্সংবিবেশ মহাবনে
166.43
তং তদা সুসমিদ্ধোঽপি ন দদাহ হুতাশনঃ
দীপ্যমানোঽপ্যমিত্রঘ্ন শীতোঽগ্নিরভবত্ততঃ
166.44
স সমুদ্রমভিপ্রেত্য শোকাবিষ্টো মহামুনিঃ
বদ্ধ্বা কণ্ঠে শিলাং গুর্বীং নিপপাত তদম্ভসি
166.45
স সমুদ্রোর্মিবেগেন স্থলে ন্যস্তো মহামুনিঃ
জগাম স ততঃ খিন্নঃ পুনরেবাশ্রমং প্রতি