Utshovঅধ্যায় 165
165.1
অর্জুন উবাচ
কিংনিমিত্তমভূদ্বৈরং বিশ্বামিত্রবসিষ্ঠয়োঃ
বসতোরাশ্রমে পুণ্যে শংস নঃ সর্বমেব তৎ
165.2
গন্ধর্ব উবাচ
ইদং বাসিষ্ঠমাখ্যানং পুরাণং পরিচক্ষতে
পার্থ সর্বেষু লোকেষু যথাবত্তন্নিবোধ মে
165.3
কন্যকুব্জে মহানাসীত্পার্থিবো ভরতর্ষভ
গাধীতি বিশ্রুতো লোকে সত্যধর্মপরায়ণঃ
165.4
তস্য ধর্মাত্মনঃ পুত্রঃ সমৃদ্ধবলবাহনঃ
বিশ্বামিত্র ইতি খ্যাতো বভূব রিপুমর্দনঃ
165.5
স চচার সহামাত্যো মৃগয়াং গহনে বনে
মৃগান্বিধ্যন্বরাহাংশ্চ রম্যেষু মরুধন্বসু
165.6
ব্যায়ামকর্শিতঃ সোঽথ মৃগলিপ্সুঃ পিপাসিতঃ
আজগাম নরশ্রেষ্ঠ বসিষ্ঠস্যাশ্রমং প্রতি
165.7
তমাগতমভিপ্রেক্ষ্য বসিষ্ঠঃ শ্রেষ্ঠভাগৃষিঃ
বিশ্বামিত্রং নরশ্রেষ্ঠং প্রতিজগ্রাহ পূজয়া
165.8
পাদ্যার্ঘ্যাচমনীয়েন স্বাগতেন চ ভারত
তথৈব প্রতিজগ্রাহ বন্যেন হবিষা তথা
165.9
তস্যাথ কামধুগ্ধেনুর্বসিষ্ঠস্য মহাত্মনঃ
উক্তা কামান্প্রয়চ্ছেতি সা কামান্দুদুহে ততঃ
165.10
গ্রাম্যারণ্যা ওষধীশ্চ দুদুহে পয় এব চ
ষড্রসং চামৃতরসং রসায়নমনুত্তমম্
165.11
ভোজনীয়ানি পেয়ানি ভক্ষ্যাণি বিবিধানি চ
লেহ্যান্যমৃতকল্পানি চোষ্যাণি চ তথার্জুন
165.12
তৈঃ কামৈঃ সর্বসংপূর্ণৈঃ পূজিতঃ স মহীপতিঃ
সামাত্যঃ সবলশ্চৈব তুতোষ স ভৃশং নৃপঃ
165.13
ষডায়তাং সুপার্শ্বোরুং ত্রিপৃথুং পঞ্চ সংবৃতাম্
মণ্ডূকনেত্রাং স্বাকারাং পীনোধসমনিন্দিতাম্
165.14
সুবালধিং শঙ্কুকর্ণাং চারুশৃঙ্গাং মনোরমাম্
পুষ্টায়তশিরোগ্রীবাং বিস্মিতঃ সোঽভিবীক্ষ্য তাম্
165.15
অভিনন্দতি তাং নন্দীং বসিষ্ঠস্য পয়স্বিনীম্
অব্রবীচ্চ ভৃশং তুষ্টো বিশ্বামিত্রো মুনিং তদা
165.16
অর্বুদেন গবাং ব্রহ্মন্মম রাজ্যেন বা পুনঃ
নন্দিনীং সংপ্রয়চ্ছস্ব ভুঙ্ক্ষ্ব রাজ্যং মহামুনে
165.17
বসিষ্ঠ উবাচ
দেবতাতিথিপিত্রর্থমাজ্যার্থং চ পয়স্বিনী
অদেয়া নন্দিনীয়ং মে রাজ্যেনাপি তবানঘ
165.18
বিশ্বামিত্র উবাচ
ক্ষত্রিয়োঽহং ভবান্বিপ্রস্তপঃস্বাধ্যায়সাধনঃ
ব্রাহ্মণেষু কুতো বীর্যং প্রশান্তেষু ধৃতাত্মসু
165.19
অর্বুদেন গবাং যস্ত্বং ন দদাসি মমেপ্সিতাম্
স্বধর্মং ন প্রহাস্যামি নয়িষ্যে তে বলেন গাম্
165.20
বসিষ্ঠ উবাচ
বলস্থশ্চাসি রাজা চ বাহুবীর্যশ্চ ক্ষত্রিয়ঃ
যথেচ্ছসি তথা ক্ষিপ্রং কুরু ত্বং মা বিচারয়
165.21
গন্ধর্ব উবাচ
এবমুক্তস্তদা পার্থ বিশ্বামিত্রো বলাদিব
হংসচন্দ্রপ্রতীকাশাং নন্দিনীং তাং জহার গাম্
165.22
কশাদণ্ডপ্রতিহতা কাল্যমানা ততস্ততঃ
হম্ভায়মানা কল্যাণী বসিষ্ঠস্যাথ নন্দিনী
165.23
আগম্যাভিমুখী পার্থ তস্থৌ ভগবদুন্মুখী
ভৃশং চ তাড্যমানাপি ন জগামাশ্রমাত্ততঃ
165.24
বসিষ্ঠ উবাচ
শৃণোমি তে রবং ভদ্রে বিনদন্ত্যাঃ পুনঃ পুনঃ
বলাদ্ধ্রিয়সি মে নন্দি ক্ষমাবান্ব্রাহ্মণো হ্যহম্
165.25
গন্ধর্ব উবাচ
সা তু তেষাং বলান্নন্দী বলানাং ভরতর্ষভ
বিশ্বামিত্রভয়োদ্বিগ্না বসিষ্ঠং সমুপাগমৎ
165.26
গৌরুবাচ
পাষাণদণ্ডাভিহতাং ক্রন্দন্তীং মামনাথবৎ
বিশ্বামিত্রবলৈর্ঘোরৈর্ভগবন্কিমুপেক্ষসে
165.27
গন্ধর্ব উবাচ
এবং তস্যাং তদা পর্থ ধর্ষিতায়াং মহামুনিঃ
ন চুক্ষুভে ন ধৈর্যাচ্চ বিচচাল ধৃতব্রতঃ
165.28
বসিষ্ঠ উবাচ
ক্ষত্রিয়াণাং বলং তেজো ব্রাহ্মণানাং ক্ষমা বলম্
ক্ষমা মাং ভজতে তস্মাদ্গম্যতাং যদি রোচতে
165.29
গৌরুবাচ
কিং নু ত্যক্তাস্মি ভগবন্যদেবং মাং প্রভাষসে
অত্যক্তাহং ত্বয়া ব্রহ্মন্ন শক্যা নয়িতুং বলাৎ
165.30
বসিষ্ঠ উবাচ
ন ত্বাং ত্যজামি কল্যাণি স্থীয়তাং যদি শক্যতে
দৃঢেন দাম্না বদ্ধ্বৈষ বত্সস্তে হ্রিয়তে বলাৎ
165.31
গন্ধর্ব উবাচ
স্থীয়তামিতি তচ্ছ্রুত্বা বসিষ্ঠস্য পয়স্বিনী
ঊর্ধ্বাঞ্চিতশিরোগ্রীবা প্রবভৌ ঘোরদর্শনা
165.32
ক্রোধরক্তেক্ষণা সা গৌর্হম্ভারবঘনস্বনা
বিশ্বামিত্রস্য তত্সৈন্যং ব্যদ্রাবয়ত সর্বশঃ
165.33
কশাগ্রদণ্ডাভিহতা কাল্যমানা ততস্ততঃ
ক্রোধদীপ্তেক্ষণা ক্রোধং ভূয় এব সমাদধে
165.34
আদিত্য ইব মধ্যাহ্নে ক্রোধদীপ্তবপুর্বভৌ
অঙ্গারবর্ষং মুঞ্চন্তী মুহুর্বালধিতো মহৎ
165.35
অসৃজত্পহ্লবান্পুচ্ছাচ্ছকৃতঃ শবরাঞ্শকান্
মূত্রতশ্চাসৃজচ্চাপি যবনান্ক্রোধমূর্চ্ছিতা
165.36
পুণ্ড্রান্কিরাতান্দ্রমিডান্সিংহলান্বর্বরাংস্তথা
তথৈব দরদান্ম্লেচ্ছান্ফেনতঃ সা সসর্জ হ
165.37
তৈর্বিসৃষ্টৈর্মহত্সৈন্যং নানাম্লেচ্ছগণৈস্তদা
নানাবরণসংছন্নৈর্নানায়ুধধরৈস্তথা
অবাকীর্যত সংরব্ধৈর্বিশ্বামিত্রস্য পশ্যতঃ
165.38
একৈকশ্চ তদা যোধঃ পঞ্চভিঃ সপ্তভির্বৃতঃ
অস্ত্রবর্ষেণ মহতা কাল্যমানং বলং ততঃ
প্রভগ্নং সর্বতস্ত্রস্তং বিশ্বামিত্রস্য পশ্যতঃ
165.39
ন চ প্রাণৈর্বিয়ুজ্যন্ত কেচিত্তে সৈনিকাস্তদা
বিশ্বামিত্রস্য সংক্রুদ্ধৈর্বাসিষ্ঠৈর্ভরতর্ষভ
165.40
বিশ্বামিত্রস্য সৈন্যং তু কাল্যমানং ত্রিয়োজনম্
ক্রোশমানং ভয়োদ্বিগ্নং ত্রাতারং নাধ্যগচ্ছত
165.41
দৃষ্ট্বা তন্মহদাশ্চর্যং ব্রহ্মতেজোভবং তদা
বিশ্বামিত্রঃ ক্ষত্রভাবান্নির্বিণ্ণো বাক্যমব্রবীৎ
165.42
ধিগ্বলং ক্ষত্রিয়বলং ব্রহ্মতেজোবলং বলম্
বলাবলং বিনিশ্চিত্য তপ এব পরং বলম্
165.43
স রাজ্যং স্ফীতমুত্সৃজ্য তাং চ দীপ্তাং নৃপশ্রিয়ম্
ভোগাংশ্চ পৃষ্ঠতঃ কৃত্বা তপস্যেব মনো দধে
165.44
স গত্বা তপসা সিদ্ধিং লোকান্বিষ্টভ্য তেজসা
ততাপ সর্বান্দীপ্তৌজা ব্রাহ্মণত্বমবাপ চ
অপিবচ্চ সুতং সোমমিন্দ্রেণ সহ কৌশিকঃ