অধ্যায় 164

164.1

বৈশংপায়ন উবাচ
স গন্ধর্ববচঃ শ্রুত্বা তত্তদা ভরতর্ষভ
অর্জুনঃ পরয়া প্রীত্যা পূর্ণচন্দ্র ইবাবভৌ

উবাচ চ মহেষ্বাসো গন্ধর্বং কুরুসত্তমঃ
জাতকৌতূহলোঽতীব বসিষ্ঠস্য তপোবলাৎ

বসিষ্ঠ ইতি যস্যৈতদৃষের্নাম ত্বয়েরিতম্
এতদিচ্ছাম্যহং শ্রোতুং যথাবত্তদ্বদস্ব মে

য এষ গন্ধর্বপতে পূর্বেষাং নঃ পুরোহিতঃ
আসীদেতন্মমাচক্ষ্ব ক এষ ভগবানৃষিঃ

গন্ধর্ব উবাচ
তপসা নির্জিতৌ শশ্বদজেয়াবমরৈরপি
কামক্রোধাবুভৌ যস্য চরণৌ সংববাহতুঃ

যস্তু নোচ্ছেদনং চক্রে কুশিকানামুদারধীঃ
বিশ্বামিত্রাপরাধেন ধারয়ন্মন্যুমুত্তমম্

পুত্রব্যসনসংতপ্তঃ শক্তিমানপি যঃ প্রভুঃ
বিশ্বামিত্রবিনাশায় ন মেনে কর্ম দারুণম্

মৃতাংশ্চ পুনরাহর্তুং যঃ স পুত্রান্যমক্ষয়াৎ
কৃতান্তং নাতিচক্রাম বেলামিব মহোদধিঃ

যং প্রাপ্য বিজিতাত্মানং মহাত্মানং নরাধিপাঃ
ইক্ষ্বাকবো মহীপালা লেভিরে পৃথিবীমিমাম্

পুরোহিতবরং প্রাপ্য বসিষ্ঠমৃষিসত্তমম্
ঈজিরে ক্রতুভিশ্চাপি নৃপাস্তে কুরুনন্দন

স হি তান্যাজয়ামাস সর্বান্নৃপতিসত্তমান্
ব্রহ্মর্ষিঃ পাণ্ডবশ্রেষ্ঠ বৃহস্পতিরিবামরান্

তস্মাদ্ধর্মপ্রধানাত্মা বেদধর্মবিদীপ্সিতঃ
ব্রাহ্মণো গুণবান্কশ্চিত্পুরোধাঃ প্রবিমৃশ্যতাম্

ক্ষত্রিয়েণ হি জাতেন পৃথিবীং জেতুমিচ্ছতা
পূর্বং পুরোহিতঃ কার্যঃ পার্থ রাজ্যাভিবৃদ্ধয়ে

মহীং জিগীষতা রাজ্ঞা ব্রহ্ম কার্যং পুরঃসরম্
তস্মাত্পুরোহিতঃ কশ্চিদ্গুণবানস্তু বো দ্বিজঃ