অধ্যায় 163

163.1

বসিষ্ঠ উবাচ
যৈষা তে তপতী নাম সাবিত্র্যবরজা সুতা
তাং ত্বাং সংবরণস্যার্থে বরয়ামি বিভাবসো

স হি রাজা বৃহত্কীর্তির্ধর্মার্থবিদুদারধীঃ
যুক্তঃ সংবরণো ভর্তা দুহিতুস্তে বিহংগম

গন্ধর্ব উবাচ
ইত্যুক্তঃ সবিতা তেন দদানীত্যেব নিশ্চিতঃ
প্রত্যভাষত তং বিপ্রং প্রতিনন্দ্য দিবাকরঃ

বরঃ সংবরণো রাজ্ঞাং ত্বমৃষীণাং বরো মুনে
তপতী যোষিতাং শ্রেষ্ঠা কিমন্যত্রাপবর্জনাৎ

ততঃ সর্বানবদ্যাঙ্গীং তপতীং তপনঃ স্বয়ম্
দদৌ সংবরণস্যার্থে বসিষ্ঠায় মহাত্মনে
প্রতিজগ্রাহ তাং কন্যাং মহর্ষিস্তপতীং তদা

বসিষ্ঠোঽথ বিসৃষ্টশ্চ পুনরেবাজগাম হ
যত্র বিখ্যাতকীর্তিঃ স কুরূণামৃষভোঽভবৎ

স রাজা মন্মথাবিষ্টস্তদ্গতেনান্তরাত্মনা
দৃষ্ট্বা চ দেবকন্যাং তাং তপতীং চারুহাসিনীম্
বসিষ্ঠেন সহায়ান্তীং সংহৃষ্টোঽভ্যধিকং বভৌ

কৃচ্ছ্রে দ্বাদশরাত্রে তু তস্য রাজ্ঞঃ সমাপিতে
আজগাম বিশুদ্ধাত্মা বসিষ্ঠো ভগবানৃষিঃ

তপসারাধ্য বরদং দেবং গোপতিমীশ্বরম্
লেভে সংবরণো ভার্যাং বসিষ্ঠস্যৈব তেজসা

ততস্তস্মিন্গিরিশ্রেষ্ঠে দেবগন্ধর্বসেবিতে
জগ্রাহ বিধিবত্পাণিং তপত্যাঃ স নরর্ষভঃ

বসিষ্ঠেনাভ্যনুজ্ঞাতস্তস্মিন্নেব ধরাধরে
সোঽকাময়ত রাজর্ষির্বিহর্তুং সহ ভার্যয়া

ততঃ পুরে চ রাষ্ট্রে চ বাহনেষু বলেষু চ
আদিদেশ মহীপালস্তমেব সচিবং তদা

নৃপতিং ত্বভ্যনুজ্ঞায় বসিষ্ঠোঽথাপচক্রমে
সোঽপি রাজা গিরৌ তস্মিন্বিজহারামরোপমঃ

ততো দ্বাদশ বর্ষাণি কাননেষু জলেষু চ
রেমে তস্মিন্গিরৌ রাজা তয়ৈব সহ ভার্যয়া

তস্য রাজ্ঞঃ পুরে তস্মিন্সমা দ্বাদশ সর্বশঃ
ন ববর্ষ সহস্রাক্ষো রাষ্ট্রে চৈবাস্য সর্বশঃ

তত্ক্ষুধার্তৈর্নিরানন্দৈঃ শবভূতৈস্তদা নরৈঃ
অভবত্প্রেতরাজস্য পুরং প্রেতৈরিবাবৃতম্

ততস্তত্তাদৃশং দৃষ্ট্বা স এব ভগবানৃষিঃ
অভ্যপদ্যত ধর্মাত্মা বসিষ্ঠো রাজসত্তমম্

তং চ পার্থিবশার্দূলমানয়ামাস তত্পুরম্
তপত্যা সহিতং রাজন্নুষিতং দ্বাদশীঃ সমাঃ

ততঃ প্রবৃষ্টস্তত্রাসীদ্যথাপূর্বং সুরারিহা
তস্মিন্নৃপতিশার্দূলে প্রবিষ্টে নগরং পুনঃ

ততঃ সরাষ্ট্রং মুমুদে তত্পুরং পরয়া মুদা
তেন পার্থিবমুখ্যেন ভাবিতং ভাবিতাত্মনা

ততো দ্বাদশ বর্ষাণি পুনরীজে নরাধিপঃ
পত্ন্যা তপত্যা সহিতো যথা শক্রো মরুত্পতিঃ

এবমাসীন্মহাভাগা তপতী নাম পৌর্বিকী
তব বৈবস্বতী পার্থ তাপত্যস্ত্বং যয়া মতঃ

তস্যাং সংজনয়ামাস কুরুং সংবরণো নৃপঃ
তপত্যাং তপতাং শ্রেষ্ঠ তাপত্যস্ত্বং ততোঽর্জুন