অধ্যায় 162

162.1

গন্ধর্ব উবাচ
এবমুক্ত্বা ততস্তূর্ণং জগামোর্ধ্বমনিন্দিতা
স তু রাজা পুনর্ভূমৌ তত্রৈব নিপপাত হ

অমাত্যঃ সানুয়াত্রস্তু তং দদর্শ মহাবনে
ক্ষিতৌ নিপতিতং কালে শক্রধ্বজমিবোচ্ছ্রিতম্

তং হি দৃষ্ট্বা মহেষ্বাসং নিরশ্বং পতিতং ক্ষিতৌ
বভূব সোঽস্য সচিবঃ সংপ্রদীপ্ত ইবাগ্নিনা

ত্বরয়া চোপসংগম্য স্নেহাদাগতসংভ্রমঃ
তং সমুত্থাপয়ামাস নৃপতিং কামমোহিতম্

ভূতলাদ্ভূমিপালেশং পিতেব পতিতং সুতম্
প্রজ্ঞয়া বয়সা চৈব বৃদ্ধঃ কীর্ত্যা দমেন চ

অমাত্যস্তং সমুত্থাপ্য বভূব বিগতজ্বরঃ
উবাচ চৈনং কল্যাণ্যা বাচা মধুরয়োত্থিতম্
মা ভৈর্মনুজশার্দূল ভদ্রং চাস্তু তবানঘ

ক্ষুত্পিপাসাপরিশ্রান্তং তর্কয়ামাস তং নৃপম্
পতিতং পাতনং সংখ্যে শাত্রবাণাং মহীতলে

বারিণাথ সুশীতেন শিরস্তস্যাভ্যষেচয়ৎ
অস্পৃশন্মুকুটং রাজ্ঞঃ পুণ্ডরীকসুগন্ধিনা

ততঃ প্রত্যাগতপ্রাণস্তদ্বলং বলবান্নৃপঃ
সর্বং বিসর্জয়ামাস তমেকং সচিবং বিনা

ততস্তস্যাজ্ঞয়া রাজ্ঞো বিপ্রতস্থে মহদ্বলম্
স তু রাজা গিরিপ্রস্থে তস্মিন্পুনরুপাবিশৎ

ততস্তস্মিন্গিরিবরে শুচির্ভূত্বা কৃতাঞ্জলিঃ
আরিরাধয়িষুঃ সূর্যং তস্থাবূর্ধ্বভুজঃ ক্ষিতৌ

জগাম মনসা চৈব বসিষ্ঠমৃষিসত্তমম্
পুরোহিতমমিত্রঘ্নস্তদা সংবরণো নৃপঃ

নক্তংদিনমথৈকস্থে স্থিতে তস্মিঞ্জনাধিপে
অথাজগাম বিপ্রর্ষিস্তদা দ্বাদশমেঽহনি

স বিদিত্বৈব নৃপতিং তপত্যা হৃতমানসম্
দিব্যেন বিধিনা জ্ঞাত্বা ভাবিতাত্মা মহানৃষিঃ

তথা তু নিয়তাত্মানং স তং নৃপতিসত্তমম্
আবভাষে স ধর্মাত্মা তস্যৈবার্থচিকীর্ষয়া

স তস্য মনুজেন্দ্রস্য পশ্যতো ভগবানৃষিঃ
ঊর্ধ্বমাচক্রমে দ্রষ্টুং ভাস্করং ভাস্করদ্যুতিঃ

সহস্রাংশুং ততো বিপ্রঃ কৃতাঞ্জলিরুপস্থিতঃ
বসিষ্ঠোঽহমিতি প্রীত্যা স চাত্মানং ন্যবেদয়ৎ

তমুবাচ মহাতেজা বিবস্বান্মুনিসত্তমম্
মহর্ষে স্বাগতং তেঽস্তু কথয়স্ব যথেচ্ছসি