অধ্যায় 161

161.1

গন্ধর্ব উবাচ
অথ তস্যামদৃশ্যায়াং নৃপতিঃ কামমোহিতঃ
পাতনঃ শত্রুসংঘানাং পপাত ধরণীতলে

তস্মিন্নিপতিতে ভূমাবথ সা চারুহাসিনী
পুনঃ পীনায়তশ্রোণী দর্শয়ামাস তং নৃপম্

অথাবভাষে কল্যাণী বাচা মধুরয়া নৃপম্
তং কুরূণাং কুলকরং কামাভিহতচেতসম্

উত্তিষ্ঠোত্তিষ্ঠ ভদ্রং তে ন ত্বমর্হস্যরিংদম
মোহং নৃপতিশার্দূল গন্তুমাবিষ্কৃতঃ ক্ষিতৌ

এবমুক্তোঽথ নৃপতির্বাচা মধুরয়া তদা
দদর্শ বিপুলশ্রোণীং তামেবাভিমুখে স্থিতাম্

অথ তামসিতাপাঙ্গীমাবভাষে নরাধিপঃ
মন্মথাগ্নিপরীতাত্মা সংদিগ্ধাক্ষরয়া গিরা

সাধু মামসিতাপাঙ্গে কামার্তং মত্তকাশিনি
ভজস্ব ভজমানং মাং প্রাণা হি প্রজহন্তি মাম্

ত্বদর্থং হি বিশালাক্ষি মাময়ং নিশিতৈঃ শরৈঃ
কামঃ কমলগর্ভাভে প্রতিবিধ্যন্ন শাম্যতি

গ্রস্তমেবমনাক্রন্দে ভদ্রে কামমহাহিনা
সা ত্বং পীনায়তশ্রোণি পর্যাপ্নুহি শুভাননে

ত্বয্যধীনা হি মে প্রাণাঃ কিংনরোদ্গীতভাষিণি
চারুসর্বানবদ্যাঙ্গি পদ্মেন্দুসদৃশাননে

ন হ্যহং ত্বদৃতে ভীরু শক্ষ্যে জীবিতুমাত্মনা
তস্মাত্কুরু বিশালাক্ষি ময্যনুক্রোশমঙ্গনে

ভক্তং মামসিতাপাঙ্গে ন পরিত্যক্তুমর্হসি
ত্বং হি মাং প্রীতিয়োগেন ত্রাতুমর্হসি ভামিনি

গান্ধর্বেণ চ মাং ভীরু বিবাহেনৈহি সুন্দরি
বিবাহানাং হি রম্ভোরু গান্ধর্বঃ শ্রেষ্ঠ উচ্যতে

তপত্যুবাচ
নাহমীশাত্মনো রাজন্কন্যা পিতৃমতী হ্যহম্
ময়ি চেদস্তি তে প্রীতির্যাচস্ব পিতরং মম

যথা হি তে ময়া প্রাণাঃ সংগৃহীতা নরেশ্বর
দর্শনাদেব ভূয়স্ত্বং তথা প্রাণান্মমাহরঃ

ন চাহমীশা দেহস্য তস্মান্নৃপতিসত্তম
সমীপং নোপগচ্ছামি ন স্বতন্ত্রা হি যোষিতঃ

কা হি সর্বেষু লোকেষু বিশ্রুতাভিজনং নৃপম্
কন্যা নাভিলষেন্নাথং ভর্তারং ভক্তবত্সলম্

তস্মাদেবংগতে কালে যাচস্ব পিতরং মম
আদিত্যং প্রণিপাতেন তপসা নিয়মেন চ

স চেত্কাময়তে দাতুং তব মামরিমর্দন
ভবিষ্যাম্যথ তে রাজন্সততং বশবর্তিনী

অহং হি তপতী নাম সাবিত্র্যবরজা সুতা
অস্য লোকপ্রদীপস্য সবিতুঃ ক্ষত্রিয়র্ষভ