Utshovঅধ্যায় 160
160.1
অর্জুন উবাচ
তাপত্য ইতি যদ্বাক্যমুক্তবানসি মামিহ
তদহং জ্ঞাতুমিচ্ছামি তাপত্যার্থবিনিশ্চয়ম্
160.2
তপতী নাম কা চৈষা তাপত্যা যত্কৃতে বয়ম্
কৌন্তেয়া হি বয়ং সাধো তত্ত্বমিচ্ছামি বেদিতুম্
160.3
বৈশংপায়ন উবাচ
এবমুক্তঃ স গন্ধর্বঃ কুন্তীপুত্রং ধনংজয়ম্
বিশ্রুতাং ত্রিষু লোকেষু শ্রাবয়ামাস বৈ কথাম্
160.4
গন্ধর্ব উবাচ
হন্ত তে কথয়িষ্যামি কথামেতাং মনোরমাম্
যথাবদখিলাং পার্থ ধর্ম্যাং ধর্মভৃতাং বর
160.5
উক্তবানস্মি যেন ত্বাং তাপত্য ইতি যদ্বচঃ
তত্তেঽহং কথয়িষ্যামি শৃণুষ্বৈকমনা মম
160.6
য এষ দিবি ধিষ্ণ্যেন নাকং ব্যাপ্নোতি তেজসা
এতস্য তপতী নাম বভূবাসদৃশী সুতা
160.7
বিবস্বতো বৈ কৌন্তেয় সাবিত্র্যবরজা বিভো
বিশ্রুতা ত্রিষু লোকেষু তপতী তপসা যুতা
160.8
ন দেবী নাসুরী চৈব ন যক্ষী ন চ রাক্ষসী
নাপ্সরা ন চ গন্ধর্বী তথারূপেণ কাচন
160.9
সুবিভক্তানবদ্যাঙ্গী স্বসিতায়তলোচনা
স্বাচারা চৈব সাধ্বী চ সুবেষা চৈব ভামিনী
160.10
ন তস্যাঃ সদৃশং কংচিত্ত্রিষু লোকেষু ভারত
ভর্তারং সবিতা মেনে রূপশীলকুলশ্রুতৈঃ
160.11
সংপ্রাপ্তয়ৌবনাং পশ্যন্দেয়াং দুহিতরং তু তাম্
নোপলেভে ততঃ শান্তিং সংপ্রদানং বিচিন্তয়ন্
160.12
অর্থর্ক্ষপুত্রঃ কৌন্তেয় কুরূণামৃষভো বলী
সূর্যমারাধয়ামাস নৃপঃ সংবরণঃ সদা
160.13
অর্ঘ্যমাল্যোপহারৈশ্চ শশ্বচ্চ নৃপতির্যতঃ
নিয়মৈরুপবাসৈশ্চ তপোভির্বিবিধৈরপি
160.14
শুশ্রূষুরনহংবাদী শুচিঃ পৌরবনন্দনঃ
অংশুমন্তং সমুদ্যন্তং পূজয়ামাস ভক্তিমান্
160.15
ততঃ কৃতজ্ঞং ধর্মজ্ঞং রূপেণাসদৃশং ভুবি
তপত্যাঃ সদৃশং মেনে সূর্যঃ সংবরণং পতিম্
160.16
দাতুমৈচ্ছত্ততঃ কন্যাং তস্মৈ সংবরণায় তাম্
নৃপোত্তমায় কৌরব্য বিশ্রুতাভিজনায় বৈ
160.17
যথা হি দিবি দীপ্তাংশুঃ প্রভাসয়তি তেজসা
তথা ভুবি মহীপালো দীপ্ত্যা সংবরণোঽভবৎ
160.18
যথার্চয়ন্তি চাদিত্যমুদ্যন্তং ব্রহ্মবাদিনঃ
তথা সংবরণং পার্থ ব্রাহ্মণাবরজাঃ প্রজাঃ
160.19
স সোমমতি কান্তত্বাদাদিত্যমতি তেজসা
বভূব নৃপতিঃ শ্রীমান্সুহৃদাং দুর্হৃদামপি
160.20
এবংগুণস্য নৃপতেস্তথাবৃত্তস্য কৌরব
তস্মৈ দাতুং মনশ্চক্রে তপতীং তপনঃ স্বয়ম্
160.21
স কদাচিদথো রাজা শ্রীমানুরুয়শা ভুবি
চচার মৃগয়াং পার্থ পর্বতোপবনে কিল
160.22
চরতো মৃগয়াং তস্য ক্ষুত্পিপাসাশ্রমান্বিতঃ
মমার রাজ্ঞঃ কৌন্তেয় গিরাবপ্রতিমো হয়ঃ
160.23
স মৃতাশ্বশ্চরন্পার্থ পদ্ভ্যামেব গিরৌ নৃপঃ
দদর্শাসদৃশীং লোকে কন্যামায়তলোচনাম্
160.24
স এক একামাসাদ্য কন্যাং তামরিমর্দনঃ
তস্থৌ নৃপতিশার্দূলঃ পশ্যন্নবিচলেক্ষণঃ
160.25
স হি তাং তর্কয়ামাস রূপতো নৃপতিঃ শ্রিয়ম্
পুনঃ সংতর্কয়ামাস রবের্ভ্রষ্টামিব প্রভাম্
160.26
গিরিপ্রস্থে তু সা যস্মিন্স্থিতা স্বসিতলোচনা
স সবৃক্ষক্ষুপলতো হিরণ্ময় ইবাভবৎ
160.27
অবমেনে চ তাং দৃষ্ট্বা সর্বপ্রাণভৃতাং বপুঃ
অবাপ্তং চাত্মনো মেনে স রাজা চক্ষুষঃ ফলম্
160.28
জন্মপ্রভৃতি যত্কিংচিদ্দৃষ্টবান্স মহীপতিঃ
রূপং ন সদৃশং তস্যাস্তর্কয়ামাস কিংচন
160.29
তয়া বদ্ধমনশ্চক্ষুঃ পাশৈর্গুণময়ৈস্তদা
ন চচাল ততো দেশাদ্বুবুধে ন চ কিংচন
160.30
অস্যা নূনং বিশালাক্ষ্যাঃ সদেবাসুরমানুষম্
লোকং নির্মথ্য ধাত্রেদং রূপমাবিষ্কৃতং কৃতম্
160.31
এবং স তর্কয়ামাস রূপদ্রবিণসংপদা
কন্যামসদৃশীং লোকে নৃপঃ সংবরণস্তদা
160.32
তাং চ দৃষ্ট্বৈব কল্যাণীং কল্যাণাভিজনো নৃপঃ
জগাম মনসা চিন্তাং কামমার্গণপীডিতঃ
160.33
দহ্যমানঃ স তীব্রেণ নৃপতির্মন্মথাগ্নিনা
অপ্রগল্ভাং প্রগল্ভঃ স তামুবাচ যশস্বিনীম্
160.34
কাসি কস্যাসি রম্ভোরু কিমর্থং চেহ তিষ্ঠসি
কথং চ নির্জনেঽরণ্যে চরস্যেকা শুচিস্মিতে
160.35
ত্বং হি সর্বানবদ্যাঙ্গী সর্বাভরণভূষিতা
বিভূষণমিবৈতেষাং ভূষণানামভীপ্সিতম্
160.36
ন দেবীং নাসুরীং চৈব ন যক্ষীং ন চ রাক্ষসীম্
ন চ ভোগবতীং মন্যে ন গন্ধর্বীং ন মানুষীম্
160.37
যা হি দৃষ্টা ময়া কাশ্চিচ্ছ্রুতা বাপি বরাঙ্গনাঃ
ন তাসাং সদৃশীং মন্যে ত্বামহং মত্তকাশিনি
160.38
এবং তাং স মহীপালো বভাষে ন তু সা তদা
কামার্তং নির্জনেঽরণ্যে প্রত্যভাষত কিংচন
160.39
ততো লালপ্যমানস্য পার্থিবস্যায়তেক্ষণা
সৌদামিনীব সাভ্রেষু তত্রৈবান্তরধীয়ত
160.40
তামন্বিচ্ছন্স নৃপতিঃ পরিচক্রাম তত্তদা
বনং বনজপত্রাক্ষীং ভ্রমন্নুন্মত্তবত্তদা
160.41
অপশ্যমানঃ স তু তাং বহু তত্র বিলপ্য চ
নিশ্চেষ্টঃ কৌরবশ্রেষ্ঠো মুহূর্তং স ব্যতিষ্ঠত