অধ্যায় 159

159.1

অর্জুন উবাচ
কারণং ব্রূহি গন্ধর্ব কিং তদ্যেন স্ম ধর্ষিতাঃ
যান্তো ব্রহ্মবিদঃ সন্তঃ সর্বে রাত্রাবরিংদম

গন্ধর্ব উবাচ
অনগ্নয়োঽনাহুতয়ো ন চ বিপ্রপুরস্কৃতাঃ
যূয়ং ততো ধর্ষিতাঃ স্থ ময়া পাণ্ডবনন্দন

যক্ষরাক্ষসগন্ধর্বাঃ পিশাচোরগমানবাঃ
বিস্তরং কুরুবংশস্য শ্রীমতঃ কথয়ন্তি তে

নারদপ্রভৃতীনাং চ দেবর্ষীণাং ময়া শ্রুতম্
গুণান্কথয়তাং বীর পূর্বেষাং তব ধীমতাম্

স্বয়ং চাপি ময়া দৃষ্টশ্চরতা সাগরাম্বরাম্
ইমাং বসুমতীং কৃত্স্নাং প্রভাবঃ স্বকুলস্য তে

বেদে ধনুষি চাচার্যমভিজানামি তেঽর্জুন
বিশ্রুতং ত্রিষু লোকেষু ভারদ্বাজং যশস্বিনম্

ধর্মং বায়ুং চ শক্রং চ বিজানাম্যশ্বিনৌ তথা
পাণ্ডুং চ কুরুশার্দূল ষডেতান্কুলবর্ধনান্
পিতৄনেতানহং পার্থ দেবমানুষসত্তমান্

দিব্যাত্মানো মহাত্মানঃ সর্বশস্ত্রভৃতাং বরাঃ
ভবন্তো ভ্রাতরঃ শূরাঃ সর্বে সুচরিতব্রতাঃ

উত্তমাং তু মনোবুদ্ধিং ভবতাং ভাবিতাত্মনাম্
জানন্নপি চ বঃ পার্থ কৃতবানিহ ধর্ষণাম্

স্ত্রীসকাশে চ কৌরব্য ন পুমান্ক্ষন্তুমর্হতি
ধর্ষণামাত্মনঃ পশ্যন্বাহুদ্রবিণমাশ্রিতঃ

নক্তং চ বলমস্মাকং ভূয় এবাভিবর্ধতে
যতস্ততো মাং কৌন্তেয় সদারং মন্যুরাবিশৎ

সোঽহং ত্বয়েহ বিজিতঃ সংখ্যে তাপত্যবর্ধন
যেন তেনেহ বিধিনা কীর্ত্যমানং নিবোধ মে

ব্রহ্মচর্যং পরো ধর্মঃ স চাপি নিয়তস্ত্বয়ি
যস্মাত্তস্মাদহং পার্থ রণেঽস্মিন্বিজিতস্ত্বয়া

যস্তু স্যাত্ক্ষত্রিয়ঃ কশ্চিত্কামবৃত্তঃ পরংতপ
নক্তং চ যুধি যুধ্যেত ন স জীবেত্কথংচন

যস্তু স্যাত্কামবৃত্তোঽপি রাজা তাপত্য সংগরে
জয়েন্নক্তংচরান্সর্বান্স পুরোহিতধূর্গতঃ

তস্মাত্তাপত্য যত্কিংচিন্নৃণাং শ্রেয় ইহেপ্সিতম্
তস্মিন্কর্মণি যোক্তব্যা দান্তাত্মানঃ পুরোহিতাঃ

বেদে ষডঙ্গে নিরতাঃ শুচয়ঃ সত্যবাদিনঃ
ধর্মাত্মানঃ কৃতাত্মানঃ স্যুর্নৃপাণাং পুরোহিতাঃ

জয়শ্চ নিয়তো রাজ্ঞঃ স্বর্গশ্চ স্যাদনন্তরম্
যস্য স্যাদ্ধর্মবিদ্বাগ্মী পুরোধাঃ শীলবাঞ্শুচিঃ

লাভং লব্ধুমলব্ধং হি লব্ধং চ পরিরক্ষিতুম্
পুরোহিতং প্রকুর্বীত রাজা গুণসমন্বিতম্

পুরোহিতমতে তিষ্ঠেদ্য ইচ্ছেত্পৃথিবীং নৃপঃ
প্রাপ্তুং মেরুবরোত্তংসাং সর্বশঃ সাগরাম্বরাম্

ন হি কেবলশৌর্যেণ তাপত্যাভিজনেন চ
জয়েদব্রাহ্মণঃ কশ্চিদ্ভূমিং ভূমিপতিঃ ক্বচিৎ

তস্মাদেবং বিজানীহি কুরূণাং বংশবর্ধন
ব্রাহ্মণপ্রমুখং রাজ্যং শক্যং পালয়িতুং চিরম্