Utshovঅধ্যায় 158
158.1
বৈশংপায়ন উবাচ
তে প্রতস্থুঃ পুরস্কৃত্য মাতরং পুরুষর্ষভাঃ
সমৈরুদঙ্মুখৈর্মার্গৈর্যথোদ্দিষ্টং পরংতপাঃ
158.2
তে গচ্ছন্তস্ত্বহোরাত্রং তীর্থং সোমশ্রবায়ণম্
আসেদুঃ পুরুষব্যাঘ্রা গঙ্গায়াং পাণ্ডুনন্দনাঃ
158.3
উল্মুকং তু সমুদ্যম্য তেষামগ্রে ধনংজয়ঃ
প্রকাশার্থং যয়ৌ তত্র রক্ষার্থং চ মহায়শাঃ
158.4
তত্র গঙ্গাজলে রম্যে বিবিক্তে ক্রীডয়ন্স্ত্রিয়ঃ
ঈর্ষ্যুর্গন্ধর্বরাজঃ স্ম জলক্রীডামুপাগতঃ
158.5
শব্দং তেষাং স শুশ্রাব নদীং সমুপসর্পতাম্
তেন শব্দেন চাবিষ্টশ্চুক্রোধ বলবদ্বলী
158.6
স দৃষ্ট্বা পাণ্ডবাংস্তত্র সহ মাত্রা পরংতপান্
বিস্ফারয়ন্ধনুর্ঘোরমিদং বচনমব্রবীৎ
158.7
সংধ্যা সংরজ্যতে ঘোরা পূর্বরাত্রাগমেষু যা
অশীতিভিস্ত্রুটৈর্হীনং তং মুহূর্তং প্রচক্ষতে
158.8
বিহিতং কামচারাণাং যক্ষগন্ধর্বরক্ষসাম্
শেষমন্যন্মনুষ্যাণাং কামচারমিহ স্মৃতম্
158.9
লোভাত্প্রচারং চরতস্তাসু বেলাসু বৈ নরান্
উপক্রান্তা নিগৃহ্ণীমো রাক্ষসৈঃ সহ বালিশান্
158.10
ততো রাত্রৌ প্রাপ্নুবতো জলং ব্রহ্মবিদো জনাঃ
গর্হয়ন্তি নরান্সর্বান্বলস্থান্নৃপতীনপি
158.11
আরাত্তিষ্ঠত মা মহ্যং সমীপমুপসর্পত
কস্মান্মাং নাভিজানীত প্রাপ্তং ভাগীরথীজলম্
158.12
অঙ্গারপর্ণং গন্ধর্বং বিত্ত মাং স্ববলাশ্রয়ম্
অহং হি মানী চের্ষ্যুশ্চ কুবেরস্য প্রিয়ঃ সখা
158.13
অঙ্গারপর্ণমিতি চ খ্যাতং বনমিদং মম
অনু গঙ্গাং চ বাকাং চ চিত্রং যত্র বসাম্যহম্
158.14
ন কুণপাঃ শৃঙ্গিণো বা ন দেবা ন চ মানুষাঃ
ইদং সমুপসর্পন্তি তত্কিং সমুপসর্পথ
158.15
অর্জুন উবাচ
সমুদ্রে হিমবত্পার্শ্বে নদ্যামস্যাং চ দুর্মতে
রাত্রাবহনি সংধৌ চ কস্য কৢপ্তঃ পরিগ্রহঃ
158.16
বয়ং চ শক্তিসংপন্না অকালে ত্বামধৃষ্ণুমঃ
অশক্তা হি ক্ষণে ক্রূরে যুষ্মানর্চন্তি মানবাঃ
158.17
পুরা হিমবতশ্চৈষা হেমশৃঙ্গাদ্বিনিঃসৃতা
গঙ্গা গত্বা সমুদ্রাম্ভঃ সপ্তধা প্রতিপদ্যতে
158.18
ইয়ং ভূত্বা চৈকবপ্রা শুচিরাকাশগা পুনঃ
দেবেষু গঙ্গা গন্ধর্ব প্রাপ্নোত্যলকনন্দতাম্
158.19
তথা পিতৄন্বৈতরণী দুস্তরা পাপকর্মভিঃ
গঙ্গা ভবতি গন্ধর্ব যথা দ্বৈপায়নোঽব্রবীৎ
158.20
অসংবাধা দেবনদী স্বর্গসংপাদনী শুভা
কথমিচ্ছসি তাং রোদ্ধুং নৈষ ধর্মঃ সনাতনঃ
158.21
অনিবার্যমসংবাধং তব বাচা কথং বয়ম্
ন স্পৃশেম যথাকামং পুণ্যং ভাগীরথীজলম্
158.22
বৈশংপায়ন উবাচ
অঙ্গারপর্ণস্তচ্ছ্রুত্বা ক্রুদ্ধ আনম্য কার্মুকম্
মুমোচ সায়কান্দীপ্তানহীনাশীবিষানিব
158.23
উল্মুকং ভ্রাময়ংস্তূর্ণং পাণ্ডবশ্চর্ম চোত্তমম্
ব্যপোবাহ শরাংস্তস্য সর্বানেব ধনংজয়ঃ
158.24
অর্জুন উবাচ
বিভীষিকৈষা গন্ধর্ব নাস্ত্রজ্ঞেষু প্রয়ুজ্যতে
অস্ত্রজ্ঞেষু প্রয়ুক্তৈষা ফেনবত্প্রবিলীয়তে
158.25
মানুষানতি গন্ধর্বান্সর্বান্গন্ধর্ব লক্ষয়ে
তস্মাদস্ত্রেণ দিব্যেন যোত্স্যেঽহং ন তু মায়য়া
158.26
পুরাস্ত্রমিদমাগ্নেয়ং প্রাদাত্কিল বৃহস্পতিঃ
ভরদ্বাজস্য গন্ধর্ব গুরুপুত্রঃ শতক্রতোঃ
158.27
ভরদ্বাজাদগ্নিবেশ্যো অগ্নিবেশ্যাদ্গুরুর্মম
স ত্বিদং মহ্যমদদাদ্দ্রোণো ব্রাহ্মণসত্তমঃ
158.28
বৈশংপায়ন উবাচ
ইত্যুক্ত্বা পাণ্ডবঃ ক্রুদ্ধো গন্ধর্বায় মুমোচ হ
প্রদীপ্তমস্ত্রমাগ্নেয়ং দদাহাস্য রথং তু তৎ
158.29
বিরথং বিপ্লুতং তং তু স গন্ধর্বং মহাবলম্
অস্ত্রতেজঃপ্রমূঢং চ প্রপতন্তমবাঙ্মুখম্
158.30
শিরোরুহেষু জগ্রাহ মাল্যবত্সু ধনংজয়ঃ
ভ্রাতৄন্প্রতি চকর্ষাথ সোঽস্ত্রপাতাদচেতসম্
158.31
যুধিষ্ঠিরং তস্য ভার্যা প্রপেদে শরণার্থিনী
নাম্না কুম্ভীনসী নাম পতিত্রাণমভীপ্সতী
158.32
গন্ধর্ব্যুবাচ
ত্রাহি ত্বং মাং মহারাজ পতিং চেমং বিমুঞ্চ মে
গন্ধর্বীং শরণং প্রাপ্তাং নাম্না কুম্বীনসীং প্রভো
158.33
যুধিষ্ঠির উবাচ
যুদ্ধে জিতং যশোহীনং স্ত্রীনাথমপরাক্রমম্
কো নু হন্যাদ্রিপুং ত্বাদৃঙ্মুঞ্চেমং রিপুসূদন
158.34
অর্জুন উবাচ
অঙ্গেমং প্রতিপদ্যস্ব গচ্ছ গন্ধর্ব মা শুচঃ
প্রদিশত্যভয়ং তেঽদ্য কুরুরাজো যুধিষ্ঠিরঃ
158.35
গন্ধর্ব উবাচ
জিতোঽহং পূর্বকং নাম মুঞ্চাম্যঙ্গারপর্ণতাম্
ন চ শ্লাঘে বলেনাদ্য ন নাম্না জনসংসদি
158.36
সাধ্বিমং লব্ধবাঁল্লাভং যোঽহং দিব্যাস্ত্রধারিণম্
গান্ধর্ব্যা মায়য়া যোদ্ধুমিচ্ছামি বয়সা বরম্
158.37
অস্ত্রাগ্নিনা বিচিত্রোঽয়ং দগ্ধো মে রথ উত্তমঃ
সোঽহং চিত্ররথো ভূত্বা নাম্না দগ্ধরথোঽভবম্
158.38
সংভৃতা চৈব বিদ্যেয়ং তপসেহ পুরা ময়া
নিবেদয়িষ্যে তামদ্য প্রাণদায়া মহাত্মনে
158.39
সংস্তম্ভিতং হি তরসা জিতং শরণমাগতম্
যোঽরিং সংয়োজয়েত্প্রাণৈঃ কল্যাণং কিং ন সোঽর্হতি
158.40
চক্ষুষী নাম বিদ্যেয়ং যাং সোমায় দদৌ মনুঃ
দদৌ স বিশ্বাবসবে মহ্যং বিশ্বাবসুর্দদৌ
158.41
সেয়ং কাপুরুষং প্রাপ্তা গুরুদত্তা প্রণশ্যতি
আগমোঽস্যা ময়া প্রোক্তো বীর্যং প্রতিনিবোধ মে
158.42
যচ্চক্ষুষা দ্রষ্টুমিচ্ছেত্ত্রিষু লোকেষু কিংচন
তত্পশ্যেদ্যাদৃশং চেচ্ছেত্তাদৃষং দ্রষ্টুমর্হতি
158.43
সমানপদ্যে ষণ্মাসান্স্থিতো বিদ্যাং লভেদিমাম্
অনুনেষ্যাম্যহং বিদ্যাং স্বয়ং তুভ্যং ব্রতে কৃতে
158.44
বিদ্যয়া হ্যনয়া রাজন্বয়ং নৃভ্যো বিশেষিতাঃ
অবিশিষ্টাশ্চ দেবানামনুভাবপ্রবর্তিতাঃ
158.45
গন্ধর্বজানামশ্বানামহং পুরুষসত্তম
ভ্রাতৃভ্যস্তব পঞ্চভ্যঃ পৃথগ্দাতা শতং শতম্
158.46
দেবগন্ধর্ববাহাস্তে দিব্যগন্ধা মনোগমাঃ
ক্ষীণাঃ ক্ষীণা ভবন্ত্যেতে ন হীয়ন্তে চ রংহসঃ
158.47
পুরা কৃতং মহেন্দ্রস্য বজ্রং বৃত্রনিবর্হণে
দশধা শতধা চৈব তচ্ছীর্ণং বৃত্রমূর্ধনি
158.48
ততো ভাগীকৃতো দেবৈর্বজ্রভাগ উপাস্যতে
লোকে যত্সাধনং কিংচিত্সা বৈ বজ্রতনুঃ স্মৃতা
158.49
বজ্রপাণির্ব্রাহ্মণঃ স্যাত্ক্ষত্রং বজ্ররথং স্মৃতম্
বৈশ্যা বৈ দানবজ্রাশ্চ কর্মবজ্রা যবীয়সঃ
158.50
বজ্রং ক্ষত্রস্য বাজিনো অবধ্যা বাজিনঃ স্মৃতাঃ
রথাঙ্গং বডবা সূতে সূতাশ্চাশ্বেষু যে মতাঃ
158.51
কামবর্ণাঃ কামজবাঃ কামতঃ সমুপস্থিতাঃ
ইমে গন্ধর্বজাঃ কামং পূরয়িষ্যন্তি তে হয়াঃ
158.52
অর্জুন উবাচ
যদি প্রীতেন বা দত্তং সংশয়ে জীবিতস্য বা
বিদ্যা বিত্তং শ্রুতং বাপি ন তদ্গন্ধর্ব কাময়ে
158.53
গন্ধর্ব উবাচ
সংয়োগো বৈ প্রীতিকরঃ সংসত্সু প্রতিদৃশ্যতে
জীবিতস্য প্রদানেন প্রীতো বিদ্যাং দদামি তে
158.54
ত্বত্তো হ্যহং গ্রহীষ্যামি অস্ত্রমাগ্নেয়মুত্তমম্
তথৈব সখ্যং বীভত্সো চিরায় ভরতর্ষভ
158.55
অর্জুন উবাচ
ত্বত্তোঽস্ত্রেণ বৃণোম্যশ্বান্সংয়োগঃ শাশ্বতোঽস্তু নৌ
সখে তদ্ব্রূহি গন্ধর্ব যুষ্মভ্যো যদ্ভয়ং ত্যজেৎ