অধ্যায় 157

157.1

বৈশংপায়ন উবাচ
বসত্সু তেষু প্রচ্ছন্নং পাণ্ডবেষু মহাত্মসু
আজগামাথ তান্দ্রষ্টুং ব্যাসঃ সত্যবতীসুতঃ

তমাগতমভিপ্রেক্ষ্য প্রত্যুদ্গম্য পরংতপাঃ
প্রণিপত্যাভিবাদ্যৈনং তস্থুঃ প্রাঞ্জলয়স্তদা

সমনুজ্ঞাপ্য তান্সর্বানাসীনান্মুনিরব্রবীৎ
প্রসন্নঃ পূজিতঃ পার্থৈঃ প্রীতিপূর্বমিদং বচঃ

অপি ধর্মেণ বর্তধ্বং শাস্ত্রেণ চ পরংতপাঃ
অপি বিপ্রেষু বঃ পূজা পূজার্হেষু ন হীয়তে

অথ ধর্মার্থবদ্বাক্যমুক্ত্বা স ভগবানৃষিঃ
বিচিত্রাশ্চ কথাস্তাস্তাঃ পুনরেবেদমব্রবীৎ

আসীত্তপোবনে কাচিদৃষেঃ কন্যা মহাত্মনঃ
বিলগ্নমধ্যা সুশ্রোণী সুভ্রূঃ সর্বগুণান্বিতা

কর্মভিঃ স্বকৃতৈঃ সা তু দুর্ভগা সমপদ্যত
নাধ্যগচ্ছত্পতিং সা তু কন্যা রূপবতী সতী

তপস্তপ্তুমথারেভে পত্যর্থমসুখা ততঃ
তোষয়ামাস তপসা সা কিলোগ্রেণ শংকরম্

তস্যাঃ স ভগবাংস্তুষ্টস্তামুবাচ তপস্বিনীম্
বরং বরয় ভদ্রং তে বরদোঽস্মীতি ভামিনি

অথেশ্বরমুবাচেদমাত্মনঃ সা বচো হিতম্
পতিং সর্বগুণোপেতমিচ্ছামীতি পুনঃ পুনঃ

তামথ প্রত্যুবাচেদমীশানো বদতাং বরঃ
পঞ্চ তে পতয়ো ভদ্রে ভবিষ্যন্তীতি শংকরঃ

প্রতিব্রুবন্তীমেকং মে পতিং দেহীতি শংকরম্
পুনরেবাব্রবীদ্দেব ইদং বচনমুত্তমম্

পঞ্চকৃত্বস্ত্বয়া উক্তঃ পতিং দেহীত্যহং পুনঃ
দেহমন্যং গতায়াস্তে যথোক্তং তদ্ভবিষ্যতি

দ্রুপদস্য কুলে জাতা কন্যা সা দেবরূপিণী
নির্দিষ্টা ভবতাং পত্নী কৃষ্ণা পার্ষত্যনিন্দিতা

পাঞ্চালনগরং তস্মাত্প্রবিশধ্বং মহাবলাঃ
সুখিনস্তামনুপ্রাপ্য ভবিষ্যথ ন সংশয়ঃ

এবমুক্ত্বা মহাভাগঃ পাণ্ডবানাং পিতামহঃ
পার্থানামন্ত্র্য কুন্তীং চ প্রাতিষ্ঠত মহাতপাঃ