অধ্যায় 156

156.1

বৈশংপায়ন উবাচ
এতচ্ছ্রুত্বা তু কৌন্তেয়াঃ শল্যবিদ্ধা ইবাভবন্
সর্বে চাস্বস্থমনসো বভূবুস্তে মহারথাঃ

ততঃ কুন্তী সুতান্দৃষ্ট্বা বিভ্রান্তান্গতচেতসঃ
যুধিষ্ঠিরমুবাচেদং বচনং সত্যবাদিনী

চিররাত্রোষিতাঃ স্মেহ ব্রাহ্মণস্য নিবেশনে
রমমাণাঃ পুরে রম্যে লব্ধভৈক্ষা যুধিষ্ঠির

যানীহ রমণীয়ানি বনান্যুপবনানি চ
সর্বাণি তানি দৃষ্টানি পুনঃ পুনররিংদম

পুনর্দৃষ্টানি তান্যেব প্রীণয়ন্তি ন নস্তথা
ভৈক্ষং চ ন তথা বীর লভ্যতে কুরুনন্দন

তে বয়ং সাধু পাঞ্চালান্গচ্ছাম যদি মন্যসে
অপূর্বদর্শনং তাত রমণীয়ং ভবিষ্যতি

সুভিক্ষাশ্চৈব পাঞ্চালাঃ শ্রূয়ন্তে শত্রুকর্শন
যজ্ঞসেনশ্চ রাজাসৌ ব্রহ্মণ্য ইতি শুশ্রুমঃ

একত্র চিরবাসো হি ক্ষমো ন চ মতো মম
তে তত্র সাধু গচ্ছামো যদি ত্বং পুত্র মন্যসে

যুধিষ্ঠির উবাচ
ভবত্যা যন্মতং কার্যং তদস্মাকং পরং হিতম্
অনুজাংস্তু ন জানামি গচ্ছেয়ুর্নেতি বা পুনঃ

বৈশংপায়ন উবাচ
ততঃ কুন্তী ভীমসেনমর্জুনং যমজৌ তথা
উবাচ গমনং তে চ তথেত্যেবাব্রুবংস্তদা

তত আমন্ত্র্য তং বিপ্রং কুন্তী রাজন্সুতৈঃ সহ
প্রতস্থে নগরীং রম্যাং দ্রুপদস্য মহাত্মনঃ