Utshovঅধ্যায় 155
155.1
ব্রাহ্মণ উবাচ
অমর্ষী দ্রুপদো রাজা কর্মসিদ্ধান্দ্বিজর্ষভান্
অন্বিচ্ছন্পরিচক্রাম ব্রাহ্মণাবসথান্বহূন্
155.2
পুত্রজন্ম পরীপ্সন্বৈ শোকোপহতচেতনঃ
নাস্তি শ্রেষ্ঠং মমাপত্যমিতি নিত্যমচিন্তয়ৎ
155.3
জাতান্পুত্রান্স নির্বেদাদ্ধিগ্বন্ধূনিতি চাব্রবীৎ
নিঃশ্বাসপরমশ্চাসীদ্দ্রোণং প্রতিচিকীর্ষয়া
155.4
প্রভাবং বিনয়ং শিক্ষাং দ্রোণস্য চরিতানি চ
ক্ষাত্রেণ চ বলেনাস্য চিন্তয়ন্নান্বপদ্যত
প্রতিকর্তুং নৃপশ্রেষ্ঠো যতমানোঽপি ভারত
155.5
অভিতঃ সোঽথ কল্মাষীং গঙ্গাকূলে পরিভ্রমন্
ব্রাহ্মণাবসথং পুণ্যমাসসাদ মহীপতিঃ
155.6
তত্র নাস্নাতকঃ কশ্চিন্ন চাসীদব্রতী দ্বিজঃ
তথৈব নামহাভাগঃ সোঽপশ্যত্সংশিতব্রতৌ
155.7
যাজোপয়াজৌ ব্রহ্মর্ষী শাম্যন্তৌ পৃষতাত্মজঃ
সংহিতাধ্যয়নে যুক্তৌ গোত্রতশ্চাপি কাশ্যপৌ
155.8
তারণে যুক্তরূপৌ তৌ ব্রাহ্মণাবৃষিসত্তমৌ
স তাবামন্ত্রয়ামাস সর্বকামৈরতন্দ্রিতঃ
155.9
বুদ্ধ্বা তয়োর্বলং বুদ্ধিং কনীয়াংসমুপহ্বরে
প্রপেদে ছন্দয়ন্কামৈরুপয়াজং ধৃতব্রতম্
155.10
পাদশুশ্রূষণে যুক্তঃ প্রিয়বাক্সর্বকামদঃ
অর্হয়িত্বা যথান্যায়মুপয়াজমুবাচ সঃ
155.11
যেন মে কর্মণা ব্রহ্মন্পুত্রঃ স্যাদ্দ্রোণমৃত্যবে
উপয়াজ কৃতে তস্মিন্গবাং দাতাস্মি তেঽর্বুদম্
155.12
যদ্বা তেঽন্যদ্দ্বিজশ্রেষ্ঠ মনসঃ সুপ্রিয়ং ভবেৎ
সর্বং তত্তে প্রদাতাহং ন হি মেঽস্ত্যত্র সংশয়ঃ
155.13
ইত্যুক্তো নাহমিত্যেবং তমৃষিঃ প্রত্যুবাচ হ
আরাধয়িষ্যন্দ্রুপদঃ স তং পর্যচরত্পুনঃ
155.14
ততঃ সংবত্সরস্যান্তে দ্রুপদং স দ্বিজোত্তমঃ
উপয়াজোঽব্রবীদ্রাজন্কালে মধুরয়া গিরা
155.15
জ্যেষ্ঠো ভ্রাতা মমাগৃহ্ণাদ্বিচরন্বননির্ঝরে
অপরিজ্ঞাতশৌচায়াং ভূমৌ নিপতিতং ফলম্
155.16
তদপশ্যমহং ভ্রাতুরসাংপ্রতমনুব্রজন্
বিমর্শং সংকরাদানে নায়ং কুর্যাত্কথংচন
155.17
দৃষ্ট্বা ফলস্য নাপশ্যদ্দোষা যেঽস্যানুবন্ধিকাঃ
বিবিনক্তি ন শৌচং যঃ সোঽন্যত্রাপি কথং ভবেৎ
155.18
সংহিতাধ্যয়নং কুর্বন্বসন্গুরুকুলে চ যঃ
ভৈক্ষমুচ্ছিষ্টমন্যেষাং ভুঙ্ক্তে চাপি সদা সদা
কীর্তয়ন্গুণমন্নানামঘৃণী চ পুনঃ পুনঃ
155.19
তমহং ফলার্থিনং মন্যে ভ্রাতরং তর্কচক্ষুষা
তং বৈ গচ্ছস্ব নৃপতে স ত্বাং সংয়াজয়িষ্যতি
155.20
জুগুপ্সমানো নৃপতির্মনসেদং বিচিন্তয়ন্
উপয়াজবচঃ শ্রুত্বা নৃপতিঃ সর্বধর্মবিৎ
অভিসংপূজ্য পূজার্হমৃষিং যাজমুবাচ হ
155.21
অয়ুতানি দদান্যষ্টৌ গবাং যাজয় মাং বিভো
দ্রোণবৈরাভিসংতপ্তং ত্বং হ্লাদয়িতুমর্হসি
155.22
স হি ব্রহ্মবিদাং শ্রেষ্ঠো ব্রহ্মাস্ত্রে চাপ্যনুত্তমঃ
তস্মাদ্দ্রোণঃ পরাজৈষীন্মাং বৈ স সখিবিগ্রহে
155.23
ক্ষত্রিয়ো নাস্তি তুল্যোঽস্য পৃথিব্যাং কশ্চিদগ্রণীঃ
কৌরবাচার্যমুখ্যস্য ভারদ্বাজস্য ধীমতঃ
155.24
দ্রোণস্য শরজালানি প্রাণিদেহহরাণি চ
ষডরত্নি ধনুশ্চাস্য দৃশ্যতেঽপ্রতিমং মহৎ
155.25
স হি ব্রাহ্মণবেগেন ক্ষাত্রং বেগমসংশয়ম্
প্রতিহন্তি মহেষ্বাসো ভারদ্বাজো মহামনাঃ
155.26
ক্ষত্রোচ্ছেদায় বিহিতো জামদগ্ন্য ইবাস্থিতঃ
তস্য হ্যস্ত্রবলং ঘোরমপ্রসহ্যং নরৈর্ভুবি
155.27
ব্রাহ্মমুচ্চারয়ংস্তেজো হুতাহুতিরিবানলঃ
সমেত্য স দহত্যাজৌ ক্ষত্রং ব্রহ্মপুরঃসরঃ
ব্রহ্মক্ষত্রে চ বিহিতে ব্রহ্মতেজো বিশিষ্যতে
155.28
সোঽহং ক্ষত্রবলাদ্ধীনো ব্রহ্মতেজঃ প্রপেদিবান্
দ্রোণাদ্বিশিষ্টমাসাদ্য ভবন্তং ব্রহ্মবিত্তমম্
155.29
দ্রোণান্তকমহং পুত্রং লভেয়ং যুধি দুর্জয়ম্
তত্কর্ম কুরু মে যাজ নির্বপাম্যর্বুদং গবাম্
155.30
তথেত্যুক্ত্বা তু তং যাজো যাজ্যার্থমুপকল্পয়ৎ
গুর্বর্থ ইতি চাকামমুপয়াজমচোদয়ৎ
যাজো দ্রোণবিনাশায় প্রতিজজ্ঞে তথা চ সঃ
155.31
ততস্তস্য নরেন্দ্রস্য উপয়াজো মহাতপাঃ
আচখ্যৌ কর্ম বৈতানং তদা পুত্রফলায় বৈ
155.32
স চ পুত্রো মহাবীর্যো মহাতেজা মহাবলঃ
ইষ্যতে যদ্বিধো রাজন্ভবিতা তে তথাবিধঃ
155.33
ভারদ্বাজস্য হন্তারং সোঽভিসংধায় ভূমিপঃ
আজহ্রে তত্তথা সর্বং দ্রুপদঃ কর্মসিদ্ধয়ে
155.34
যাজস্তু হবনস্যান্তে দেবীমাহ্বাপয়ত্তদা
প্রৈহি মাং রাজ্ঞি পৃষতি মিথুনং ত্বামুপস্থিতম্
155.35
দেব্যুবাচ
অবলিপ্তং মে মুখং ব্রহ্মন্পুণ্যান্গন্ধান্বিভর্মি চ
সুতার্থেনোপরুদ্ধাস্মি তিষ্ঠ যাজ মম প্রিয়ে
155.36
যাজ উবাচ
যাজেন শ্রপিতং হব্যমুপয়াজেন মন্ত্রিতম্
কথং কামং ন সংদধ্যাত্সা ত্বং বিপ্রৈহি তিষ্ঠ বা
155.37
ব্রাহ্মণ উবাচ
এবমুক্তে তু যাজেন হুতে হবিষি সংস্কৃতে
উত্তস্থৌ পাবকাত্তস্মাত্কুমারো দেবসংনিভঃ
155.38
জ্বালাবর্ণো ঘোররূপঃ কিরীটী বর্ম চোত্তমম্
বিভ্রত্সখড্গঃ সশরো ধনুষ্মান্বিনদন্মুহুঃ
155.39
সোঽধ্যারোহদ্রথবরং তেন চ প্রয়য়ৌ তদা
ততঃ প্রণেদুঃ পাঞ্চালাঃ প্রহৃষ্টাঃ সাধু সাধ্বিতি
155.40
ভয়াপহো রাজপুত্রঃ পাঞ্চালানাং যশস্করঃ
রাজ্ঞঃ শোকাপহো জাত এষ দ্রোণবধায় বৈ
ইত্যুবাচ মহদ্ভূতমদৃশ্যং খেচরং তদা
155.41
কুমারী চাপি পাঞ্চালী বেদিমধ্যাত্সমুত্থিতা
সুভগা দর্শনীয়াঙ্গী বেদিমধ্যা মনোরমা
155.42
শ্যামা পদ্মপলাশাক্ষী নীলকুঞ্চিতমূর্ধজা
মানুষং বিগ্রহং কৃত্বা সাক্ষাদমরবর্ণিনী
155.43
নীলোত্পলসমো গন্ধো যস্যাঃ ক্রোশাত্প্রবায়তি
যা বিভর্তি পরং রূপং যস্যা নাস্ত্যুপমা ভুবি
155.44
তাং চাপি জাতাং সুশ্রোণীং বাগুবাচাশরীরিণী
সর্বয়োষিদ্বরা কৃষ্ণা ক্ষয়ং ক্ষত্রং নিনীষতি
155.45
সুরকার্যমিয়ং কালে করিষ্যতি সুমধ্যমা
অস্যা হেতোঃ ক্ষত্রিয়াণাং মহদুত্পত্স্যতে ভয়ম্
155.46
তচ্ছ্রুত্বা সর্বপাঞ্চালাঃ প্রণেদুঃ সিংহসংঘবৎ
ন চৈতান্হর্ষসংপূর্ণানিয়ং সেহে বসুংধরা
155.47
তৌ দৃষ্ট্বা পৃষতী যাজং প্রপেদে বৈ সুতার্থিনী
ন বৈ মদন্যাং জননীং জানীয়াতামিমাবিতি
155.48
তথেত্যুবাচ তাং যাজো রাজ্ঞঃ প্রিয়চিকীর্ষয়া
তয়োশ্চ নামনী চক্রুর্দ্বিজাঃ সংপূর্ণমানসাঃ
155.49
ধৃষ্টত্বাদতিধৃষ্ণুত্বাদ্ধর্মাদ্দ্যুত্সংভবাদপি
ধৃষ্টদ্যুম্নঃ কুমারোঽয়ং দ্রুপদস্য ভবত্বিতি
155.50
কৃষ্ণেত্যেবাব্রুবন্কৃষ্ণাং কৃষ্ণাভূত্সা হি বর্ণতঃ
তথা তন্মিথুনং জজ্ঞে দ্রুপদস্য মহামখে
155.51
ধৃষ্টদ্যুম্নং তু পাঞ্চাল্যমানীয় স্বং বিবেশনম্
উপাকরোদস্ত্রহেতোর্ভারদ্বাজঃ প্রতাপবান্
155.52
অমোক্ষণীয়ং দৈবং হি ভাবি মত্বা মহামতিঃ
তথা তত্কৃতবান্দ্রোণ আত্মকীর্ত্যনুরক্ষণাৎ