Utshovঅধ্যায় 154
154.1
ব্রাহ্মণ উবাচ
গঙ্গাদ্বারং প্রতি মহান্বভূবর্ষির্মহাতপাঃ
ভরদ্বাজো মহাপ্রাজ্ঞঃ সততং সংশিতব্রতঃ
154.2
সোঽভিষেক্তুং গতো গঙ্গাং পূর্বমেবাগতাং সতীম্
দদর্শাপ্সরসং তত্র ঘৃতাচীমাপ্লুতামৃষিঃ
154.3
তস্যা বায়ুর্নদীতীরে বসনং ব্যহরত্তদা
অপকৃষ্টাম্বরাং দৃষ্ট্বা তামৃষিশ্চকমে ততঃ
154.4
তস্যাং সংসক্তমনসঃ কৌমারব্রহ্মচারিণঃ
হৃষ্টস্য রেতশ্চস্কন্দ তদৃষির্দ্রোণ আদধে
154.5
ততঃ সমভবদ্দ্রোণঃ কুমারস্তস্য ধীমতঃ
অধ্যগীষ্ট স বেদাংশ্চ বেদাঙ্গানি চ সর্বশঃ
154.6
ভরদ্বাজস্য তু সখা পৃষতো নাম পার্থিবঃ
তস্যাপি দ্রুপদো নাম তদা সমভবত্সুতঃ
154.7
স নিত্যমাশ্রমং গত্বা দ্রোণেন সহ পার্ষতঃ
চিক্রীডাধ্যয়নং চৈব চকার ক্ষত্রিয়র্ষভঃ
154.8
ততস্তু পৃষতেঽতীতে স রাজা দ্রুপদোঽভবৎ
দ্রোণোঽপি রামং শুশ্রাব দিত্সন্তং বসু সর্বশঃ
154.9
বনং তু প্রস্থিতং রামং ভরদ্বাজসুতোঽব্রবীৎ
আগতং বিত্তকামং মাং বিদ্ধি দ্রোণং দ্বিজর্ষভ
154.10
রাম উবাচ
শরীরমাত্রমেবাদ্য ময়েদমবশেষিতম্
অস্ত্রাণি বা শরীরং বা ব্রহ্মন্নন্যতরং বৃণু
154.11
দ্রোণ উবাচ
অস্ত্রাণি চৈব সর্বাণি তেষাং সংহারমেব চ
প্রয়োগং চৈব সর্বেষাং দাতুমর্হতি মে ভবান্
154.12
ব্রাহ্মণ উবাচ
তথেত্যুক্ত্বা ততস্তস্মৈ প্রদদৌ ভৃগুনন্দনঃ
প্রতিগৃহ্য ততো দ্রোণঃ কৃতকৃত্যোঽভবত্তদা
154.13
সংপ্রহৃষ্টমনাশ্চাপি রামাত্পরমসংমতম্
ব্রহ্মাস্ত্রং সমনুপ্রাপ্য নরেষ্বভ্যধিকোঽভবৎ
154.14
ততো দ্রুপদমাসাদ্য ভারদ্বাজঃ প্রতাপবান্
অব্রবীত্পুরুষব্যাঘ্রঃ সখায়ং বিদ্ধি মামিতি
154.15
দ্রুপদ উবাচ
নাশ্রোত্রিয়ঃ শ্রোত্রিয়স্য নারথী রথিনঃ সখা
নারাজা পার্থিবস্যাপি সখিপূর্বং কিমিষ্যতে
154.16
ব্রাহ্মণ উবাচ
স বিনিশ্চিত্য মনসা পাঞ্চাল্যং প্রতি বুদ্ধিমান্
জগাম কুরুমুখ্যানাং নগরং নাগসাহ্বয়ম্
154.17
তস্মৈ পৌত্রান্সমাদায় বসূনি বিবিধানি চ
প্রাপ্তায় প্রদদৌ ভীষ্মঃ শিষ্যান্দ্রোণায় ধীমতে
154.18
দ্রোণঃ শিষ্যাংস্ততঃ সর্বানিদং বচনমব্রবীৎ
সমানীয় তদা বিদ্বান্দ্রুপদস্যাসুখায় বৈ
154.19
আচার্যবেতনং কিংচিদ্ধৃদি সংপরিবর্ততে
কৃতাস্ত্রৈস্তত্প্রদেয়ং স্যাত্তদৃতং বদতানঘাঃ
154.20
যদা চ পাণ্ডবাঃ সর্বে কৃতাস্ত্রাঃ কৃতনিশ্রমাঃ
ততো দ্রোণোঽব্রবীদ্ভূয়ো বেতনার্থমিদং বচঃ
154.21
পার্ষতো দ্রুপদো নাম ছত্রবত্যাং নরেশ্বরঃ
তস্যাপকৃষ্য তদ্রাজ্যং মম শীঘ্রং প্রদীয়তাম্
154.22
ততঃ পাণ্ডুসুতাঃ পঞ্চ নির্জিত্য দ্রুপদং যুধি
দ্রোণায় দর্শয়ামাসুর্বদ্ধ্বা সসচিবং তদা
154.23
দ্রোণ উবাচ
প্রার্থয়ামি ত্বয়া সখ্যং পুনরেব নরাধিপ
অরাজা কিল নো রাজ্ঞঃ সখা ভবিতুমর্হতি
154.24
অতঃ প্রয়তিতং রাজ্যে যজ্ঞসেন ময়া তব
রাজাসি দক্ষিণে কূলে ভাগীরথ্যাহমুত্তরে
154.25
ব্রাহ্মণ উবাচ
অসত্কারঃ স সুমহান্মুহূর্তমপি তস্য তু
ন ব্যেতি হৃদয়াদ্রাজ্ঞো দুর্মনাঃ স কৃশোঽভবৎ