অধ্যায় 153

153.1

জনমেজয় উবাচ
তে তথা পুরুষব্যাঘ্রা নিহত্য বকরাক্ষসম্
অত ঊর্ধ্বং ততো ব্রহ্মন্কিমকুর্বত পাণ্ডবাঃ

বৈশংপায়ন উবাচ
তত্রৈব ন্যবসন্রাজন্নিহত্য বকরাক্ষসম্
অধীয়ানাঃ পরং ব্রহ্ম ব্রাহ্মণস্য নিবেশনে

ততঃ কতিপয়াহস্য ব্রাহ্মণঃ সংশিতব্রতঃ
প্রতিশ্রয়ার্থং তদ্বেশ্ম ব্রাহ্মণস্যাজগাম হ

স সম্যক্পূজয়িত্বা তং বিদ্বান্বিপ্রর্ষভস্তদা
দদৌ প্রতিশ্রয়ং তস্মৈ সদা সর্বাতিথিব্রতী

ততস্তে পাণ্ডবাঃ সর্বে সহ কুন্ত্যা নরর্ষভাঃ
উপাসাং চক্রিরে বিপ্রং কথয়ানং কথাস্তদা

কথয়ামাস দেশান্স তীর্থানি বিবিধানি চ
রাজ্ঞাং চ বিবিধাশ্চর্যাঃ পুরাণি বিবিধানি চ

স তত্রাকথয়দ্বিপ্রঃ কথান্তে জনমেজয়
পাঞ্চালেষ্বদ্ভুতাকারং যাজ্ঞসেন্যাঃ স্বয়ংবরম্

ধৃষ্টদ্যুম্নস্য চোত্পত্তিমুত্পত্তিং চ শিখণ্ডিনঃ
অয়োনিজত্বং কৃষ্ণায়া দ্রুপদস্য মহামখে

তদদ্ভুততমং শ্রুত্বা লোকে তস্য মহাত্মনঃ
বিস্তরেণৈব পপ্রচ্ছুঃ কথাং তাং পুরুষর্ষভাঃ

কথং দ্রুপদপুত্রস্য ধৃষ্টদ্যুম্নস্য পাবকাৎ
বেদিমধ্যাচ্চ কৃষ্ণায়াঃ সংভবঃ কথমদ্ভুতঃ

কথং দ্রোণান্মহেষ্বাসাত্সর্বাণ্যস্ত্রাণ্যশিক্ষত
কথং প্রিয়সখায়ৌ তৌ ভিন্নৌ কস্য কৃতেন চ

এবং তৈশ্চোদিতো রাজন্স বিপ্রঃ পুরুষর্ষভৈঃ
কথয়ামাস তত্সর্বং দ্রৌপদীসংভবং তদা