অধ্যায় 152

152.1

বৈশংপায়ন উবাচ
তেন শব্দেন বিত্রস্তো জনস্তস্যাথ রক্ষসঃ
নিষ্পপাত গৃহাদ্রাজন্সহৈব পরিচারিভিঃ

তান্ভীতান্বিগতজ্ঞানান্ভীমঃ প্রহরতাং বরঃ
সান্ত্বয়ামাস বলবান্সময়ে চ ন্যবেশয়ৎ

ন হিংস্যা মানুষা ভূয়ো যুষ্মাভিরিহ কর্হিচিৎ
হিংসতাং হি বধঃ শীঘ্রমেবমেব ভবেদিতি

তস্য তদ্বচনং শ্রুত্বা তানি রক্ষাংসি ভারত
এবমস্ত্বিতি তং প্রাহুর্জগৃহুঃ সময়ং চ তম্

ততঃ প্রভৃতি রক্ষাংসি তত্র সৌম্যানি ভারত
নগরে প্রত্যদৃশ্যন্ত নরৈর্নগরবাসিভিঃ

ততো ভীমস্তমাদায় গতাসুং পুরুষাদকম্
দ্বারদেশে বিনিক্ষিপ্য জগামানুপলক্ষিতঃ

ততঃ স ভীমস্তং হত্বা গত্বা ব্রাহ্মণবেশ্ম তৎ
আচচক্ষে যথাবৃত্তং রাজ্ঞঃ সর্বমশেষতঃ

ততো নরা বিনিষ্ক্রান্তা নগরাত্কাল্যমেব তু
দদৃশুর্নিহতং ভূমৌ রাক্ষসং রুধিরোক্ষিতম্

তমদ্রিকূটসদৃশং বিনিকীর্ণং ভয়াবহম্
একচক্রাং ততো গত্বা প্রবৃত্তিং প্রদদুঃ পরে

ততঃ সহস্রশো রাজন্নরা নগরবাসিনঃ
তত্রাজগ্মুর্বকং দ্রষ্টুং সস্ত্রীবৃদ্ধকুমারকাঃ

ততস্তে বিস্মিতাঃ সর্বে কর্ম দৃষ্ট্বাতিমানুষম্
দৈবতান্যর্চয়াং চক্রুঃ সর্ব এব বিশাং পতে

ততঃ প্রগণয়ামাসুঃ কস্য বারোঽদ্য ভোজনে
জ্ঞাত্বা চাগম্য তং বিপ্রং পপ্রচ্ছুঃ সর্ব এব তৎ

এবং পৃষ্টস্তু বহুশো রক্ষমাণশ্চ পাণ্ডবান্
উবাচ নাগরান্সর্বানিদং বিপ্রর্ষভস্তদা

আজ্ঞাপিতং মামশনে রুদন্তং সহ বন্ধুভিঃ
দদর্শ ব্রাহ্মণঃ কশ্চিন্মন্ত্রসিদ্ধো মহাবলঃ

পরিপৃচ্ছ্য স মাং পূর্বং পরিক্লেশং পুরস্য চ
অব্রবীদ্ব্রাহ্মণশ্রেষ্ঠ আশ্বাস্য প্রহসন্নিব

প্রাপয়িষ্যাম্যহং তস্মৈ ইদমন্নং দুরাত্মনে
মন্নিমিত্তং ভয়ং চাপি ন কার্যমিতি বীর্যবান্

স তদন্নমুপাদায় গতো বকবনং প্রতি
তেন নূনং ভবেদেতত্কর্ম লোকহিতং কৃতম্

ততস্তে ব্রাহ্মণাঃ সর্বে ক্ষত্রিয়াশ্চ সুবিস্মিতাঃ
বৈশ্যাঃ শূদ্রাশ্চ মুদিতাশ্চক্রুর্ব্রহ্মমহং তদা

ততো জানপদাঃ সর্বে আজগ্মুর্নগরং প্রতি
তদদ্ভুততমং দ্রষ্টুং পার্থাস্তত্রৈব চাবসন্