UtshovChapter 152
152.1
वैशंपायन उवाच
तेन शब्देन वित्रस्तो जनस्तस्याथ रक्षसः
निष्पपात गृहाद्राजन्सहैव परिचारिभिः
Vaishampayana uvacha
Tena shabdena vitrasto janastasyatha rakshasah
Nishpapata grihadrajansahaiva paricharibhih
152.2
तान्भीतान्विगतज्ञानान्भीमः प्रहरतां वरः
सान्त्वयामास बलवान्समये च न्यवेशयत्
Tanbhitanvigatagyananbhimah praharatam varah
Santvayamasa balavansamaye cha nyaveshayat
152.3
न हिंस्या मानुषा भूयो युष्माभिरिह कर्हिचित्
हिंसतां हि वधः शीघ्रमेवमेव भवेदिति
Na hinsya manusha bhuyo yushmabhiriha karhichit
Hinsatam hi vadhah shighramevameva bhavediti
152.4
तस्य तद्वचनं श्रुत्वा तानि रक्षांसि भारत
एवमस्त्विति तं प्राहुर्जगृहुः समयं च तम्
Tasya tadvachanam shrutva tani rakshansi bharata
Evamastviti tam prahurjagrihuh samayam cha tam
152.5
ततः प्रभृति रक्षांसि तत्र सौम्यानि भारत
नगरे प्रत्यदृश्यन्त नरैर्नगरवासिभिः
Tatah prabhriti rakshansi tatra saumyani bharata
Nagare pratyadrishyanta narairnagaravasibhih
152.6
ततो भीमस्तमादाय गतासुं पुरुषादकम्
द्वारदेशे विनिक्षिप्य जगामानुपलक्षितः
Tato bhimastamadaya gatasum purushadakam
Dvaradeshe vinikshipya jagamanupalakshitah
152.7
ततः स भीमस्तं हत्वा गत्वा ब्राह्मणवेश्म तत्
आचचक्षे यथावृत्तं राज्ञः सर्वमशेषतः
Tatah sa bhimastam hatva gatva brahmanaveshma tat
Achachakshe yathavrittam ragyah sarvamasheshatah
152.8
ततो नरा विनिष्क्रान्ता नगरात्काल्यमेव तु
ददृशुर्निहतं भूमौ राक्षसं रुधिरोक्षितम्
Tato nara vinishkranta nagaratkalyameva tu
Dadrishurnihatam bhumau rakshasam rudhirokshitam
152.9
तमद्रिकूटसदृशं विनिकीर्णं भयावहम्
एकचक्रां ततो गत्वा प्रवृत्तिं प्रददुः परे
Tamadrikutasadrisham vinikirnam bhayavaham
Ekachakram tato gatva pravrittim pradaduh pare
152.10
ततः सहस्रशो राजन्नरा नगरवासिनः
तत्राजग्मुर्बकं द्रष्टुं सस्त्रीवृद्धकुमारकाः
Tatah sahasrasho rajannara nagaravasinah
Tatrajagmurbakam drashtum sastrivriddhakumarakah
152.11
ततस्ते विस्मिताः सर्वे कर्म दृष्ट्वातिमानुषम्
दैवतान्यर्चयां चक्रुः सर्व एव विशां पते
Tataste vismitah sarve karma drishtvatimanusham
Daivatanyarchayam chakruh sarva eva visham pate
152.12
ततः प्रगणयामासुः कस्य वारोऽद्य भोजने
ज्ञात्वा चागम्य तं विप्रं पप्रच्छुः सर्व एव तत्
Tatah praganayamasuh kasya varodya bhojane
Gyatva chagamya tam vipram paprachchhuh sarva eva tat
152.13
एवं पृष्टस्तु बहुशो रक्षमाणश्च पाण्डवान्
उवाच नागरान्सर्वानिदं विप्रर्षभस्तदा
Evam prishtastu bahusho rakshamanashcha pandavan
Uvacha nagaransarvanidam viprarshabhastada
152.14
आज्ञापितं मामशने रुदन्तं सह बन्धुभिः
ददर्श ब्राह्मणः कश्चिन्मन्त्रसिद्धो महाबलः
Agyapitam mamashane rudantam saha bandhubhih
Dadarsha brahmanah kashchinmantrasiddho mahabalah
152.15
परिपृच्छ्य स मां पूर्वं परिक्लेशं पुरस्य च
अब्रवीद्ब्राह्मणश्रेष्ठ आश्वास्य प्रहसन्निव
Pariprichchhya sa mam purvam pariklesham purasya cha
Abravidbrahmanashreshtha ashvasya prahasanniva
152.16
प्रापयिष्याम्यहं तस्मै इदमन्नं दुरात्मने
मन्निमित्तं भयं चापि न कार्यमिति वीर्यवान्
Prapayishyamyaham tasmai idamannam duratmane
Mannimittam bhayam chapi na karyamiti viryavan
152.17
स तदन्नमुपादाय गतो बकवनं प्रति
तेन नूनं भवेदेतत्कर्म लोकहितं कृतम्
Sa tadannamupadaya gato bakavanam prati
Tena nunam bhavedetatkarma lokahitam kritam
152.18
ततस्ते ब्राह्मणाः सर्वे क्षत्रियाश्च सुविस्मिताः
वैश्याः शूद्राश्च मुदिताश्चक्रुर्ब्रह्ममहं तदा
Tataste brahmanah sarve kshatriyashcha suvismitah
Vaishyah shudrashcha muditashchakrurbrahmamaham tada
152.19
ततो जानपदाः सर्वे आजग्मुर्नगरं प्रति
तदद्भुततमं द्रष्टुं पार्थास्तत्रैव चावसन्
Tato janapadah sarve ajagmurnagaram prati
Tadadbhutatamam drashtum parthastatraiva chavasan