Utshovঅধ্যায় 151
151.1
বৈশংপায়ন উবাচ
ততো রাত্র্যাং ব্যতীতায়ামন্নমাদায় পাণ্ডবঃ
ভীমসেনো যয়ৌ তত্র যত্রাসৌ পুরুষাদকঃ
151.2
আসাদ্য তু বনং তস্য রক্ষসঃ পাণ্ডবো বলী
আজুহাব ততো নাম্না তদন্নমুপয়োজয়ন্
151.3
ততঃ স রাক্ষসঃ শ্রুত্বা ভীমসেনস্য তদ্বচঃ
আজগাম সুসংক্রুদ্ধো যত্র ভীমো ব্যবস্থিতঃ
151.4
মহাকায়ো মহাবেগো দারয়ন্নিব মেদিনীম্
ত্রিশিখাং ভৃকুটিং কৃত্বা সংদশ্য দশনচ্ছদম্
151.5
ভুঞ্জানমন্নং তং দৃষ্ট্বা ভীমসেনং স রাক্ষসঃ
বিবৃত্য নয়নে ক্রুদ্ধ ইদং বচনমব্রবীৎ
151.6
কোঽয়মন্নমিদং ভুঙ্ক্তে মদর্থমুপকল্পিতম্
পশ্যতো মম দুর্বুদ্ধির্যিয়াসুর্যমসাদনম্
151.7
ভীমসেনস্তু তচ্ছ্রুত্বা প্রহসন্নিব ভারত
রাক্ষসং তমনাদৃত্য ভুঙ্ক্ত এব পরাঙ্মুখঃ
151.8
ততঃ স ভৈরবং কৃত্বা সমুদ্যম্য করাবুভৌ
অভ্যদ্রবদ্ভীমসেনং জিঘাংসুঃ পুরুষাদকঃ
151.9
তথাপি পরিভূয়ৈনং নেক্ষমাণো বৃকোদরঃ
রাক্ষসং ভুঙ্ক্ত এবান্নং পাণ্ডবঃ পরবীরহা
151.10
অমর্ষেণ তু সংপূর্ণঃ কুন্তীপুত্রস্য রাক্ষসঃ
জঘান পৃষ্ঠং পাণিভ্যামুভাভ্যাং পৃষ্ঠতঃ স্থিতঃ
151.11
তথা বলবতা ভীমঃ পাণিভ্যাং ভৃশমাহতঃ
নৈবাবলোকয়ামাস রাক্ষসং ভুঙ্ক্ত এব সঃ
151.12
ততঃ স ভূয়ঃ সংক্রুদ্ধো বৃক্ষমাদায় রাক্ষসঃ
তাডয়িষ্যংস্তদা ভীমং পুনরভ্যদ্রবদ্বলী
151.13
ততো ভীমঃ শনৈর্ভুক্ত্বা তদন্নং পুরুষর্ষভঃ
বার্যুপস্পৃশ্য সংহৃষ্টস্তস্থৌ যুধি মহাবলঃ
151.14
ক্ষিপ্তং ক্রুদ্ধেন তং বৃক্ষং প্রতিজগ্রাহ বীর্যবান্
সব্যেন পাণিনা ভীমঃ প্রহসন্নিব ভারত
151.15
ততঃ স পুনরুদ্যম্য বৃক্ষান্বহুবিধান্বলী
প্রাহিণোদ্ভীমসেনায় তস্মৈ ভীমশ্চ পাণ্ডবঃ
151.16
তদ্বৃক্ষয়ুদ্ধমভবন্মহীরুহবিনাশনম্
ঘোররূপং মহারাজ বকপাণ্ডবয়োর্মহৎ
151.17
নাম বিশ্রাব্য তু বকঃ সমভিদ্রুত্য পাণ্ডবম্
ভুজাভ্যাং পরিজগ্রাহ ভীমসেনং মহাবলম্
151.18
ভীমসেনোঽপি তদ্রক্ষঃ পরিরভ্য মহাভুজঃ
বিস্ফুরন্তং মহাবেগং বিচকর্ষ বলাদ্বলী
151.19
স কৃষ্যমাণো ভীমেন কর্ষমাণশ্চ পাণ্ডবম্
সময়ুজ্যত তীব্রেণ শ্রমেণ পুরুষাদকঃ
151.20
তয়োর্বেগেন মহতা পৃথিবী সমকম্পত
পাদপাংশ্চ মহাকায়াংশ্চূর্ণয়ামাসতুস্তদা
151.21
হীয়মানং তু তদ্রক্ষঃ সমীক্ষ্য ভরতর্ষভ
নিষ্পিষ্য ভূমৌ পাণিভ্যাং সমাজঘ্নে বৃকোদরঃ
151.22
ততোঽস্য জানুনা পৃষ্ঠমবপীড্য বলাদিব
বাহুনা পরিজগ্রাহ দক্ষিণেন শিরোধরাম্
151.23
সব্যেন চ কটীদেশে গৃহ্য বাসসি পাণ্ডবঃ
তদ্রক্ষো দ্বিগুণং চক্রে নদন্তং ভৈরবান্রবান্
151.24
ততোঽস্য রুধিরং বক্ত্রাত্প্রাদুরাসীদ্বিশাং পতে
ভজ্যমানস্য ভীমেন তস্য ঘোরস্য রক্ষসঃ