Utshovঅধ্যায় 150
150.1
বৈশংপায়ন উবাচ
করিষ্য ইতি ভীমেন প্রতিজ্ঞাতে তু ভারত
আজগ্মুস্তে ততঃ সর্বে ভৈক্ষমাদায় পাণ্ডবাঃ
150.2
আকারেণৈব তং জ্ঞাত্বা পাণ্ডুপুত্রো যুধিষ্ঠিরঃ
রহঃ সমুপবিশ্যৈকস্ততঃ পপ্রচ্ছ মাতরম্
150.3
কিং চিকীর্ষত্যয়ং কর্ম ভীমো ভীমপরাক্রমঃ
ভবত্যনুমতে কচ্চিদয়ং কর্তুমিহেচ্ছতি
150.4
কুন্ত্যুবাচ
মমৈব বচনাদেষ করিষ্যতি পরংতপঃ
ব্রাহ্মণার্থে মহত্কৃত্যং মোষ্কায় নগরস্য চ
150.5
যুধিষ্ঠির উবাচ
কিমিদং সাহসং তীক্ষ্ণং ভবত্যা দুষ্কৃতং কৃতম্
পরিত্যাগং হি পুত্রস্য ন প্রশংসন্তি সাধবঃ
150.6
কথং পরসুতস্যার্থে স্বসুতং ত্যক্তুমিচ্ছসি
লোকবৃত্তিবিরুদ্ধং বৈ পুত্রত্যাগাত্কৃতং ত্বয়া
150.7
যস্য বাহূ সমাশ্রিত্য সুখং সর্বে স্বপামহে
রাজ্যং চাপহৃতং ক্ষুদ্রৈরাজিহীর্ষামহে পুনঃ
150.8
যস্য দুর্যোধনো বীর্যং চিন্তয়ন্নমিতৌজসঃ
ন শেতে বসতীঃ সর্বা দুঃখাচ্ছকুনিনা সহ
150.9
যস্য বীরস্য বীর্যেণ মুক্তা জতুগৃহাদ্বয়ম্
অন্যেভ্যশ্চৈব পাপেভ্যো নিহতশ্চ পুরোচনঃ
150.10
যস্য বীর্যং সমাশ্রিত্য বসুপূর্ণাং বসুংধরাম্
ইমাং মন্যামহে প্রাপ্তাং নিহত্য ধৃতরাষ্ট্রজান্
150.11
তস্য ব্যবসিতস্ত্যাগো বুদ্ধিমাস্থায় কাং ত্বয়া
কচ্চিন্ন দুঃখৈর্বুদ্ধিস্তে বিপ্লুতা গতচেতসঃ
150.12
কুন্ত্যুবাচ
যুধিষ্ঠির ন সংতাপঃ কার্যঃ প্রতি বৃকোদরম্
ন চায়ং বুদ্ধিদৌর্বল্যাদ্ব্যবসায়ঃ কৃতো ময়া
150.13
ইহ বিপ্রস্য ভবনে বয়ং পুত্র সুখোষিতাঃ
তস্য প্রতিক্রিয়া তাত ময়েয়ং প্রসমীক্ষিতা
এতাবানেব পুরুষঃ কৃতং যস্মিন্ন নশ্যতি
150.14
দৃষ্ট্বা ভীমস্য বিক্রান্তং তদা জতুগৃহে মহৎ
হিডিম্বস্য বধাচ্চৈব বিশ্বাসো মে বৃকোদরে
150.15
বাহ্বোর্বলং হি ভীমস্য নাগায়ুতসমং মহৎ
যেন যূয়ং গজপ্রখ্যা নির্ব্যূঢা বারণাবতাৎ
150.16
বৃকোদরবলো নান্যো ন ভূতো ন ভবিষ্যতি
যোঽভ্যুদীয়াদ্যুধি শ্রেষ্ঠমপি বজ্রধরং স্বয়ম্
150.17
জাতমাত্রঃ পুরা চৈষ মমাঙ্কাত্পতিতো গিরৌ
শরীরগৌরবাত্তস্য শিলা গাত্রৈর্বিচূর্ণিতা
150.18
তদহং প্রজ্ঞয়া স্মৃত্বা বলং ভীমস্য পাণ্ডব
প্রতীকারং চ বিপ্রস্য ততঃ কৃতবতী মতিম্
150.19
নেদং লোভান্ন চাজ্ঞানান্ন চ মোহাদ্বিনিশ্চিতম্
বুদ্ধিপূর্বং তু ধর্মস্য ব্যবসায়ঃ কৃতো ময়া
150.20
অর্থৌ দ্বাবপি নিষ্পন্নৌ যুধিষ্ঠির ভবিষ্যতঃ
প্রতীকারশ্চ বাসস্য ধর্মশ্চ চরিতো মহান্
150.21
যো ব্রাহ্মণস্য সাহায্যং কুর্যাদর্থেষু কর্হিচিৎ
ক্ষত্রিয়ঃ স শুভাঁল্লোকান্প্রাপ্নুয়াদিতি মে শ্রুতম্
150.22
ক্ষত্রিয়ঃ ক্ষত্রিয়স্যৈব কুর্বাণো বধমোক্ষণম্
বিপুলাং কীর্তিমাপ্নোতি লোকেঽস্মিংশ্চ পরত্র চ
150.23
বৈশ্যস্যৈব তু সাহায্যং কুর্বাণঃ ক্ষত্রিয়ো যুধি
স সর্বেষ্বপি লোকেষু প্রজা রঞ্জয়তে ধ্রুবম্
150.24
শূদ্রং তু মোক্ষয়ন্রাজা শরণার্থিনমাগতম্
প্রাপ্নোতীহ কুলে জন্ম সদ্রব্যে রাজসত্কৃতে
150.25
এবং স ভগবান্ব্যাসঃ পুরা কৌরবনন্দন
প্রোবাচ সুতরাং প্রাজ্ঞস্তস্মাদেতচ্চিকীর্ষিতম্
150.26
যুধিষ্ঠির উবাচ
উপপন্নমিদং মাতস্ত্বয়া যদ্বুদ্ধিপূর্বকম্
আর্তস্য ব্রাহ্মণস্যৈবমনুক্রোশাদিদং কৃতম্
ধ্রুবমেষ্যতি ভীমোঽয়ং নিহত্য পুরুষাদকম্
150.27
যথা ত্বিদং ন বিন্দেয়ুর্নরা নগরবাসিনঃ
তথায়ং ব্রাহ্মণো বাচ্যঃ পরিগ্রাহ্যশ্চ যত্নতঃ