অধ্যায় 149

149.1

কুন্ত্যুবাচ
ন বিষাদস্ত্বয়া কার্যো ভয়াদস্মাত্কথংচন
উপায়ঃ পরিদৃষ্টোঽত্র তস্মান্মোক্ষায় রক্ষসঃ

একস্তব সুতো বালঃ কন্যা চৈকা তপস্বিনী
ন তে তয়োস্তথা পত্ন্যা গমনং তত্র রোচয়ে

মম পঞ্চ সুতা ব্রহ্মংস্তেষামেকো গমিষ্যতি
ত্বদর্থং বলিমাদায় তস্য পাপস্য রক্ষসঃ

ব্রাহ্মণ উবাচ
নাহমেতত্করিষ্যামি জীবিতার্থী কথংচন
ব্রাহ্মণস্যাতিথেশ্চৈব স্বার্থে প্রাণৈর্বিয়োজনম্

ন ত্বেতদকুলীনাসু নাধর্মিষ্ঠাসু বিদ্যতে
যদ্ব্রাহ্মণার্থে বিসৃজেদাত্মানমপি চাত্মজম্

আত্মনস্তু ময়া শ্রেয়ো বোদ্ধব্যমিতি রোচয়ে
ব্রহ্মবধ্যাত্মবধ্যা বা শ্রেয় আত্মবধো মম

ব্রহ্মবধ্যা পরং পাপং নিষ্কৃতির্নাত্র বিদ্যতে
অবুদ্ধিপূর্বং কৃত্বাপি শ্রেয় আত্মবধো মম

ন ত্বহং বধমাকাঙ্ক্ষে স্বয়মেবাত্মনঃ শুভে
পরৈঃ কৃতে বধে পাপং ন কিংচিন্ময়ি বিদ্যতে

অভিসংধিকৃতে তস্মিন্ব্রাহ্মণস্য বধে ময়া
নিষ্কৃতিং ন প্রপশ্যামি নৃশংসং ক্ষুদ্রমেব চ

আগতস্য গৃহে ত্যাগস্তথৈব শরণার্থিনঃ
যাচমানস্য চ বধো নৃশংসং পরমং মতম্

কুর্যান্ন নিন্দিতং কর্ম ন নৃশংসং কদাচন
ইতি পূর্বে মহাত্মান আপদ্ধর্মবিদো বিদুঃ

শ্রেয়াংস্তু সহদারস্য বিনাশোঽদ্য মম স্বয়ম্
ব্রাহ্মণস্য বধং নাহমনুমংস্যে কথংচন

কুন্ত্যুবাচ
মমাপ্যেষা মতির্ব্রহ্মন্বিপ্রা রক্ষ্যা ইতি স্থিরা
ন চাপ্যনিষ্টঃ পুত্রো মে যদি পুত্রশতং ভবেৎ

ন চাসৌ রাক্ষসঃ শক্তো মম পুত্রবিনাশনে
বীর্যবান্মন্ত্রসিদ্ধশ্চ তেজস্বী চ সুতো মম

রাক্ষসায় চ তত্সর্বং প্রাপয়িষ্যতি ভোজনম্
মোক্ষয়িষ্যতি চাত্মানমিতি মে নিশ্চিতা মতিঃ

সমাগতাশ্চ বীরেণ দৃষ্টপূর্বাশ্চ রাক্ষসাঃ
বলবন্তো মহাকায়া নিহতাশ্চাপ্যনেকশঃ

ন ত্বিদং কেষুচিদ্ব্রহ্মন্ব্যাহর্তব্যং কথংচন
বিদ্যার্থিনো হি মে পুত্রান্বিপ্রকুর্যুঃ কুতূহলাৎ

গুরুণা চাননুজ্ঞাতো গ্রাহয়েদ্যং সুতো মম
ন স কুর্যাত্তয়া কার্যং বিদ্যয়েতি সতাং মতম্

বৈশংপায়ন উবাচ
এবমুক্তস্তু পৃথয়া স বিপ্রো ভার্যয়া সহ
হৃষ্টঃ সংপূজয়ামাস তদ্বাক্যমমৃতোপমম্

ততঃ কুন্তী চ বিপ্রশ্চ সহিতাবনিলাত্মজম্
তমব্রূতাং কুরুষ্বেতি স তথেত্যব্রবীচ্চ তৌ