অধ্যায় 148

148.1

কুন্ত্যুবাচ
কুতোমূলমিদং দুঃখং জ্ঞাতুমিচ্ছামি তত্ত্বতঃ
বিদিত্বা অপকর্ষেয়ং শক্যং চেদপকর্ষিতুম্

ব্রাহ্মণ উবাচ
উপপন্নং সতামেতদ্যদ্ব্রবীষি তপোধনে
ন তু দুঃখমিদং শক্যং মানুষেণ ব্যপোহিতুম্

সমীপে নগরস্যাস্য বকো বসতি রাক্ষসঃ
ঈশো জনপদস্যাস্য পুরস্য চ মহাবলঃ

পুষ্টো মানুষমাংসেন দুর্বুদ্ধিঃ পুরুষাদকঃ
রক্ষত্যসুররাণ্নিত্যমিমং জনপদং বলী

নগরং চৈব দেশং চ রক্ষোবলসমন্বিতঃ
তত্কৃতে পরচক্রাচ্চ ভূতেভ্যশ্চ ন নো ভয়ম্

বেতনং তস্য বিহিতং শালিবাহস্য ভোজনম্
মহিষৌ পুরুষশ্চৈকো যস্তদাদায় গচ্ছতি

একৈকশ্চৈব পুরুষস্তত্প্রয়চ্ছতি ভোজনম্
স বারো বহুভির্বর্ষৈর্ভবত্যসুতরো নরৈঃ

তদ্বিমোক্ষায় যে চাপি যতন্তে পুরুষাঃ ক্বচিৎ
সপুত্রদারাংস্তান্হত্বা তদ্রক্ষো ভক্ষয়ত্যুত

বেত্রকীয়গৃহে রাজা নায়ং নয়মিহাস্থিতঃ
অনাময়ং জনস্যাস্য যেন স্যাদদ্য শাশ্বতম্

এতদর্হা বয়ং নূনং বসামো দুর্বলস্য যে
বিষয়ে নিত্যমুদ্বিগ্নাঃ কুরাজানমুপাশ্রিতাঃ

ব্রাহ্মণাঃ কস্য বক্তব্যাঃ কস্য বা ছন্দচারিণঃ
গুণৈরেতে হি বাস্যন্তে কামগাঃ পক্ষিণো যথা

রাজানং প্রথমং বিন্দেত্ততো ভার্যাং ততো ধনম্
ত্রয়স্য সংচয়ে চাস্য জ্ঞাতীন্পুত্রাংশ্চ ধারয়েৎ

বিপরীতং ময়া চেদং ত্রয়ং সর্বমুপার্জিতম্
ত ইমামাপদং প্রাপ্য ভৃশং তপ্স্যামহে বয়ম্

সোঽয়মস্মাননুপ্রাপ্তো বারঃ কুলবিনাশনঃ
ভোজনং পুরুষশ্চৈকঃ প্রদেয়ং বেতনং ময়া

ন চ মে বিদ্যতে বিত্তং সংক্রেতুং পুরুষং ক্বচিৎ
সুহৃজ্জনং প্রদাতুং চ ন শক্ষ্যামি কথংচন
গতিং চাপি ন পশ্যামি তস্মান্মোক্ষায় রক্ষসঃ

সোঽহং দুঃখার্ণবে মগ্নো মহত্যসুতরে ভৃশম্
সহৈবৈতৈর্গমিষ্যামি বান্ধবৈরদ্য রাক্ষসম্
ততো নঃ সহিতন্ক্ষুদ্রঃ সর্বানেবোপভোক্ষ্যতি