UtshovChapter 148
148.1
कुन्त्युवाच
कुतोमूलमिदं दुःखं ज्ञातुमिच्छामि तत्त्वतः
विदित्वा अपकर्षेयं शक्यं चेदपकर्षितुम्
Kuntyuvacha
Kutomulamidam duhkham gyatumichchhami tattvatah
Viditva apakarsheyam shakyam chedapakarshitum
148.2
ब्राह्मण उवाच
उपपन्नं सतामेतद्यद्ब्रवीषि तपोधने
न तु दुःखमिदं शक्यं मानुषेण व्यपोहितुम्
Brahmana uvacha
Upapannam satametadyadbravishi tapodhane
Na tu duhkhamidam shakyam manushena vyapohitum
148.3
समीपे नगरस्यास्य बको वसति राक्षसः
ईशो जनपदस्यास्य पुरस्य च महाबलः
Samipe nagarasyasya bako vasati rakshasah
Isho janapadasyasya purasya cha mahabalah
148.4
पुष्टो मानुषमांसेन दुर्बुद्धिः पुरुषादकः
रक्षत्यसुरराण्नित्यमिमं जनपदं बली
Pushto manushamansena durbuddhih purushadakah
Rakshatyasurarannityamimam janapadam bali
148.5
नगरं चैव देशं च रक्षोबलसमन्वितः
तत्कृते परचक्राच्च भूतेभ्यश्च न नो भयम्
Nagaram chaiva desham cha rakshobalasamanvitah
Tatkrite parachakrachcha bhutebhyashcha na no bhayam
148.6
वेतनं तस्य विहितं शालिवाहस्य भोजनम्
महिषौ पुरुषश्चैको यस्तदादाय गच्छति
Vetanam tasya vihitam shalivahasya bhojanam
Mahishau purushashchaiko yastadadaya gachchhati
148.7
एकैकश्चैव पुरुषस्तत्प्रयच्छति भोजनम्
स वारो बहुभिर्वर्षैर्भवत्यसुतरो नरैः
Ekaikashchaiva purushastatprayachchhati bhojanam
Sa varo bahubhirvarshairbhavatyasutaro naraih
148.8
तद्विमोक्षाय ये चापि यतन्ते पुरुषाः क्वचित्
सपुत्रदारांस्तान्हत्वा तद्रक्षो भक्षयत्युत
Tadvimokshaya ye chapi yatante purushah kvachit
Saputradaranstanhatva tadraksho bhakshayatyuta
148.9
वेत्रकीयगृहे राजा नायं नयमिहास्थितः
अनामयं जनस्यास्य येन स्यादद्य शाश्वतम्
Vetrakiyagrihe raja nayam nayamihasthitah
Anamayam janasyasya yena syadadya shashvatam
148.10
एतदर्हा वयं नूनं वसामो दुर्बलस्य ये
विषये नित्यमुद्विग्नाः कुराजानमुपाश्रिताः
Etadarha vayam nunam vasamo durbalasya ye
Vishaye nityamudvignah kurajanamupashritah
148.11
ब्राह्मणाः कस्य वक्तव्याः कस्य वा छन्दचारिणः
गुणैरेते हि वास्यन्ते कामगाः पक्षिणो यथा
Brahmanah kasya vaktavyah kasya va chhandacharinah
Gunairete hi vasyante kamagah pakshino yatha
148.12
राजानं प्रथमं विन्देत्ततो भार्यां ततो धनम्
त्रयस्य संचये चास्य ज्ञातीन्पुत्रांश्च धारयेत्
Rajanam prathamam vindettato bharyam tato dhanam
Trayasya sanchaye chasya gyatinputranshcha dharayet
148.13
विपरीतं मया चेदं त्रयं सर्वमुपार्जितम्
त इमामापदं प्राप्य भृशं तप्स्यामहे वयम्
Viparitam maya chedam trayam sarvamuparjitam
Ta imamapadam prapya bhrisham tapsyamahe vayam
148.14
सोऽयमस्माननुप्राप्तो वारः कुलविनाशनः
भोजनं पुरुषश्चैकः प्रदेयं वेतनं मया
Soyamasmananuprapto varah kulavinashanah
Bhojanam purushashchaikah pradeyam vetanam maya
148.15
न च मे विद्यते वित्तं संक्रेतुं पुरुषं क्वचित्
सुहृज्जनं प्रदातुं च न शक्ष्यामि कथंचन
गतिं चापि न पश्यामि तस्मान्मोक्षाय रक्षसः
Na cha me vidyate vittam sankretum purusham kvachit
Suhrijjanam pradatum cha na shakshyami kathanchana
Gatim chapi na pashyami tasmanmokshaya rakshasah
148.16
सोऽहं दुःखार्णवे मग्नो महत्यसुतरे भृशम्
सहैवैतैर्गमिष्यामि बान्धवैरद्य राक्षसम्
ततो नः सहितन्क्षुद्रः सर्वानेवोपभोक्ष्यति
Soham duhkharnave magno mahatyasutare bhrisham
Sahaivaitairgamishyami bandhavairadya rakshasam
Tato nah sahitankshudrah sarvanevopabhokshyati