Utshovঅধ্যায় 147
147.1
বৈশংপায়ন উবাচ
তয়োর্দুঃখিতয়োর্বাক্যমতিমাত্রং নিশম্য তৎ
ভৃশং দুঃখপরীতাঙ্গী কন্যা তাবভ্যভাষত
147.2
কিমিদং ভৃশদুঃখার্তৌ রোরবীথো অনাথবৎ
মমাপি শ্রূয়তাং কিংচিচ্ছ্রুত্বা চ ক্রিয়তাং ক্ষমম্
147.3
ধর্মতোঽহং পরিত্যাজ্যা যুবয়োর্নাত্র সংশয়ঃ
ত্যক্তব্যাং মাং পরিত্যজ্য ত্রাতং সর্বং ময়ৈকয়া
147.4
ইত্যর্থমিষ্যতেঽপত্যং তারয়িষ্যতি মামিতি
তস্মিন্নুপস্থিতে কালে তরতং প্লববন্ময়া
147.5
ইহ বা তারয়েদ্দুর্গাদুত বা প্রেত্য তারয়েৎ
সর্বথা তারয়েত্পুত্রঃ পুত্র ইত্যুচ্যতে বুধৈঃ
147.6
আকাঙ্ক্ষন্তে চ দৌহিত্রানপি নিত্যং পিতামহাঃ
তান্স্বয়ং বৈ পরিত্রাস্যে রক্ষন্তী জীবিতং পিতুঃ
147.7
ভ্রাতা চ মম বালোঽয়ং গতে লোকমমুং ত্বয়ি
অচিরেণৈব কালেন বিনশ্যেত ন সংশয়ঃ
147.8
তাতেঽপি হি গতে স্বর্গং বিনষ্টে চ মমানুজে
পিণ্ডঃ পিতৄণাং ব্যুচ্ছিদ্যেত্তত্তেষামপ্রিয়ং ভবেৎ
147.9
পিত্রা ত্যক্তা তথা মাত্রা ভ্রাত্রা চাহমসংশয়ম্
দুঃখাদ্দুঃখতরং প্রাপ্য ম্রিয়েয়মতথোচিতা
147.10
ত্বয়ি ত্বরোগে নির্মুক্তে মাতা ভ্রাতা চ মে শিশুঃ
সংতানশ্চৈব পিণ্ডশ্চ প্রতিষ্ঠাস্যত্যসংশয়ম্
147.11
আত্মা পুত্রঃ সখা ভার্যা কৃচ্ছ্রং তু দুহিতা কিল
স কৃচ্ছ্রান্মোচয়াত্মানং মাং চ ধর্মেণ যোজয়
147.12
অনাথা কৃপণা বালা যত্রক্বচনগামিনী
ভবিষ্যামি ত্বয়া তাত বিহীনা কৃপণা বত
147.13
অথ বাহং করিষ্যামি কুলস্যাস্য বিমোক্ষণম্
ফলসংস্থা ভবিষ্যামি কৃত্বা কর্ম সুদুষ্করম্
147.14
অথ বা যাস্যসে তত্র ত্যক্ত্বা মাং দ্বিজসত্তম
পীডিতাহং ভবিষ্যামি তদবেক্ষস্ব মামপি
147.15
তদস্মদর্থং ধর্মার্থং প্রসবার্থং চ সত্তম
আত্মানং পরিরক্ষস্ব ত্যক্তব্যাং মাং চ সংত্যজ
147.16
অবশ্যকরণীয়েঽর্থে মা ত্বাং কালোঽত্যগাদয়ম্
ত্বয়া দত্তেন তোয়েন ভবিষ্যতি হিতং চ মে
147.17
কিং ন্বতঃ পরমং দুঃখং যদ্বয়ং স্বর্গতে ত্বয়ি
যাচমানাঃ পরাদন্নং পরিধাবেমহি শ্ববৎ
147.18
ত্বয়ি ত্বরোগে নির্মুক্তে ক্লেশাদস্মাত্সবান্ধবে
অমৃতে বসতী লোকে ভবিষ্যামি সুখান্বিতা
147.19
এবং বহুবিধং তস্যা নিশম্য পরিদেবিতম্
পিতা মাতা চ সা চৈব কন্যা প্ররুরুদুস্ত্রয়ঃ
147.20
ততঃ প্ররুদিতান্সর্বান্নিশম্যাথ সুতস্তয়োঃ
উত্ফুল্লনয়নো বালঃ কলমব্যক্তমব্রবীৎ
147.21
মা রোদীস্তাত মা মাতর্মা স্বসস্ত্বমিতি ব্রুবন্
প্রহসন্নিব সর্বাংস্তানেকৈকং সোঽপসর্পতি
147.22
ততঃ স তৃণমাদায় প্রহৃষ্টঃ পুনরব্রবীৎ
অনেন তং হনিষ্যামি রাক্ষসং পুরুষাদকম্
147.23
তথাপি তেষাং দুঃখেন পরীতানাং নিশম্য তৎ
বালস্য বাক্যমব্যক্তং হর্ষঃ সমভবন্মহান্
147.24
অয়ং কাল ইতি জ্ঞাত্বা কুন্তী সমুপসৃত্য তান্
গতাসূনমৃতেনেব জীবয়ন্তীদমব্রবীৎ