Utshovঅধ্যায় 146
146.1
ব্রাহ্মণ্যুবাচ
ন সংতাপস্ত্বয়া কার্যঃ প্রাকৃতেনেব কর্হিচিৎ
ন হি সংতাপকালোঽয়ং বৈদ্যস্য তব বিদ্যতে
146.2
অবশ্যং নিধনং সর্বৈর্গন্তব্যমিহ মানবৈঃ
অবশ্যভাবিন্যর্থে বৈ সংতাপো নেহ বিদ্যতে
146.3
ভার্যা পুত্রোঽথ দুহিতা সর্বমাত্মার্থমিষ্যতে
ব্যথাং জহি সুবুদ্ধ্যা ত্বং স্বয়ং যাস্যামি তত্র বৈ
146.4
এতদ্ধি পরমং নার্যাঃ কার্যং লোকে সনাতনম্
প্রাণানপি পরিত্যজ্য যদ্ভর্তৃহিতমাচরেৎ
146.5
তচ্চ তত্র কৃতং কর্ম তবাপীহ সুখাবহম্
ভবত্যমুত্র চাক্ষয্যং লোকেঽস্মিংশ্চ যশস্করম্
146.6
এষ চৈব গুরুর্ধর্মো যং প্রবক্ষাম্যহং তব
অর্থশ্চ তব ধর্মশ্চ ভূয়ানত্র প্রদৃশ্যতে
146.7
যদর্থমিষ্যতে ভার্যা প্রাপ্তঃ সোঽর্থস্ত্বয়া ময়ি
কন্যা চৈব কুমারশ্চ কৃতাহমনৃণা ত্বয়া
146.8
সমর্থঃ পোষণে চাসি সুতয়ো রক্ষণে তথা
ন ত্বহং সুতয়োঃ শক্তা তথা রক্ষণপোষণে
146.9
মম হি ত্বদ্বিহীনায়াঃ সর্বকামা ন আপদঃ
কথং স্যাতাং সুতৌ বালৌ ভবেয়ং চ কথং ত্বহম্
146.10
কথং হি বিধবানাথা বালপুত্রা বিনা ত্বয়া
মিথুনং জীবয়িষ্যামি স্থিতা সাধুগতে পথি
146.11
অহংকৃতাবলিপ্তৈশ্চ প্রার্থ্যমানামিমাং সুতাম্
অয়ুক্তৈস্তব সংবন্ধে কথং শক্ষ্যামি রক্ষিতুম্
146.12
উত্সৃষ্টমামিষং ভূমৌ প্রার্থয়ন্তি যথা খগাঃ
প্রার্থয়ন্তি জনাঃ সর্বে বীরহীনাং তথা স্ত্রিয়ম্
146.13
সাহং বিচাল্যমানা বৈ প্রার্থ্যমানা দুরাত্মভিঃ
স্থাতুং পথি ন শক্ষ্যামি সজ্জনেষ্টে দ্বিজোত্তম
146.14
কথং তব কুলস্যৈকামিমাং বালামসংস্কৃতাম্
পিতৃপৈতামহে মার্গে নিয়োক্তুমহমুত্সহে
146.15
কথং শক্ষ্যামি বালেঽস্মিন্গুণানাধাতুমীপ্ষিতান্
অনাথে সর্বতো লুপ্তে যথা ত্বং ধর্মদর্শিবান্
146.16
ইমামপি চ তে বালামনাথাং পরিভূয় মাম্
অনর্হাঃ প্রার্থয়িষ্যন্তি শূদ্রা বেদশ্রুতিং যথা
146.17
তাং চেদহং ন দিত্সেয়ং ত্বদ্গুণৈরুপবৃংহিতাম্
প্রমথ্যৈনাং হরেয়ুস্তে হবির্ধ্বাঙ্ক্ষা ইবাধ্বরাৎ
146.18
সংপ্রেক্ষমাণা পুত্রং তে নানুরূপমিবাত্মনঃ
অনর্হবশমাপন্নামিমাং চাপি সুতাং তব
146.19
অবজ্ঞাতা চ লোকস্য তথাত্মানমজানতী
অবলিপ্তৈর্নরৈর্ব্রহ্মন্মরিষ্যামি ন সংশয়ঃ
146.20
তৌ বিহীনৌ ময়া বালৌ ত্বয়া চৈব মমাত্মজৌ
বিনশ্যেতাং ন সংদেহো মত্স্যাবিব জলক্ষয়ে
146.21
ত্রিতয়ং সর্বথাপ্যেবং বিনশিষ্যত্যসংশয়ম্
ত্বয়া বিহীনং তস্মাত্ত্বং মাং পরিত্যক্তুমর্হসি
146.22
ব্যুষ্টিরেষা পরা স্ত্রীণাং পূর্বং ভর্তুঃ পরা গতিঃ
ন তু ব্রাহ্মণ পুত্রাণাং বিষয়ে পরিবর্তিতুম্
146.23
পরিত্যক্তঃ সুতশ্চায়ং দুহিতেয়ং তথা ময়া
বান্ধবাশ্চ পরিত্যক্তাস্ত্বদর্থং জীবিতং চ মে
146.24
যজ্ঞৈস্তপোভির্নিয়মৈর্দানৈশ্চ বিবিধৈস্তথা
বিশিষ্যতে স্ত্রিয়া ভর্তুর্নিত্যং প্রিয়হিতে স্থিতিঃ
146.25
তদিদং যচ্চিকীর্ষামি ধর্ম্যং পরমসংমতম্
ইষ্টং চৈব হিতং চৈব তব চৈব কুলস্য চ
146.26
ইষ্টানি চাপ্যপত্যানি দ্রব্যাণি সুহৃদঃ প্রিয়াঃ
আপদ্ধর্মবিমোক্ষায় ভার্যা চাপি সতাং মতম্
146.27
একতো বা কুলং কৃত্স্নমাত্মা বা কুলবর্ধন
ন সমং সর্বমেবেতি বুধানামেষ নিশ্চয়ঃ
146.28
স কুরুষ্ব ময়া কার্যং তারয়াত্মানমাত্মনা
অনুজানীহি মামার্য সুতৌ মে পরিরক্ষ চ
146.29
অবধ্যাঃ স্ত্রিয় ইত্যাহুর্ধর্মজ্ঞা ধর্মনিশ্চয়ে
ধর্মজ্ঞান্রাক্ষসানাহুর্ন হন্যাত্স চ মামপি
146.30
নিঃসংশয়ো বধঃ পুংসাং স্ত্রীণাং সংশয়িতো বধঃ
অতো মামেব ধর্মজ্ঞ প্রস্থাপয়িতুমর্হসি
146.31
ভুক্তং প্রিয়াণ্যবাপ্তানি ধর্মশ্চ চরিতো ময়া
ত্বত্প্রসূতিঃ প্রিয়া প্রাপ্তা ন মাং তপ্স্যত্যজীবিতম্
146.32
জাতপুত্রা চ বৃদ্ধা চ প্রিয়কামা চ তে সদা
সমীক্ষ্যৈতদহং সর্বং ব্যবসায়ং করোম্যতঃ
146.33
উত্সৃজ্যাপি চ মামার্য বেত্স্যস্যন্যামপি স্ত্রিয়ম্
ততঃ প্রতিষ্ঠিতো ধর্মো ভবিষ্যতি পুনস্তব
146.34
ন চাপ্যধর্মঃ কল্যাণ বহুপত্নীকতা নৃণাম্
স্ত্রীণামধর্মঃ সুমহান্ভর্তুঃ পূর্বস্য লঙ্ঘনে
146.35
এতত্সর্বং সমীক্ষ্য ত্বমাত্মত্যাগং চ গর্হিতম্
আত্মানং তারয় ময়া কুলং চেমৌ চ দারকৌ
146.36
বৈশংপায়ন উবাচ
এবমুক্তস্তয়া ভর্তা তাং সমালিঙ্গ্য ভারত
মুমোচ বাষ্পং শনকৈঃ সভার্যো ভৃশদুঃখিতঃ