Utshovঅধ্যায় 145
145.1
জনমেজয় উবাচ
একচক্রাং গতাস্তে তু কুন্তীপুত্রা মহারথাঃ
অতঃ পরং দ্বিজশ্রেষ্ঠ কিমকুর্বত পাণ্ডবাঃ
145.2
বৈশংপায়ন উবাচ
একচক্রাং গতাস্তে তু কুন্তীপুত্রা মহারথাঃ
ঊষুর্নাতিচিরং কালং ব্রাহ্মণস্য নিবেশনে
145.3
রমণীয়ানি পশ্যন্তো বনানি বিবিধানি চ
পার্থিবানপি চোদ্দেশান্সরিতশ্চ সরাংসি চ
145.4
চেরুর্ভৈক্ষং তদা তে তু সর্ব এব বিশাং পতে
বভূবুর্নাগরাণাং চ স্বৈর্গুণৈঃ প্রিয়দর্শনাঃ
145.5
নিবেদয়ন্তি স্ম চ তে ভৈক্ষং কুন্ত্যাঃ সদা নিশি
তয়া বিভক্তান্ভাগাংস্তে ভুঞ্জতে স্ম পৃথক্পৃথক্
145.6
অর্ধং তে ভুঞ্জতে বীরাঃ সহ মাত্রা পরংতপাঃ
অর্ধং ভৈক্ষস্য সর্বস্য ভীমো ভুঙ্ক্তে মহাবলঃ
145.7
তথা তু তেষাং বসতাং তত্র রাজন্মহাত্মনাম্
অতিচক্রাম সুমহান্কালোঽথ ভরতর্ষভ
145.8
ততঃ কদাচিদ্ভৈক্ষায় গতাস্তে ভরতর্ষভাঃ
সংগত্যা ভীমসেনস্তু তত্রাস্তে পৃথয়া সহ
145.9
অথার্তিজং মহাশব্দং ব্রাহ্মণস্য নিবেশনে
ভৃশমুত্পতিতং ঘোরং কুন্তী শুশ্রাব ভারত
145.10
রোরূয়মাণাংস্তান্সর্বান্পরিদেবয়তশ্চ সা
কারুণ্যাত্সাধুভাবাচ্চ দেবী রাজন্ন চক্ষমে
145.11
মথ্যমানেব দুঃখেন হৃদয়েন পৃথা ততঃ
উবাচ ভীমং কল্যাণী কৃপান্বিতমিদং বচঃ
145.12
বসামঃ সুসুখং পুত্র ব্রাহ্মণস্য নিবেশনে
অজ্ঞাতা ধার্তরাষ্ট্রাণাং সত্কৃতা বীতমন্যবঃ
145.13
সা চিন্তয়ে সদা পুত্র ব্রাহ্মণস্যাস্য কিং ন্বহম্
প্রিয়ং কুর্যামিতি গৃহে যত্কুর্যুরুষিতাঃ সুখম্
145.14
এতাবান্পুরুষস্তাত কৃতং যস্মিন্ন নশ্যতি
যাবচ্চ কুর্যাদন্যোঽস্য কুর্যাদভ্যধিকং ততঃ
145.15
তদিদং ব্রাহ্মণস্যাস্য দুঃখমাপতিতং ধ্রুবম্
তত্রাস্য যদি সাহায্যং কুর্যাম সুকৃতং ভবেৎ
145.16
ভীম উবাচ
জ্ঞায়তামস্য যদ্দুঃখং যতশ্চৈব সমুত্থিতম্
বিদিতে ব্যবসিষ্যামি যদ্যপি স্যাত্সুদুষ্করম্
145.17
বৈশংপায়ন উবাচ
তথা হি কথয়ন্তৌ তৌ ভূয়ঃ শুশ্রুবতুঃ স্বনম্
আর্তিজং তস্য বিপ্রস্য সভার্যস্য বিশাং পতে
145.18
অন্তঃপুরং ততস্তস্য ব্রাহ্মণস্য মহাত্মনঃ
বিবেশ কুন্তী ত্বরিতা বদ্ধবত্সেব সৌরভী
145.19
ততস্তং ব্রাহ্মণং তত্র ভার্যয়া চ সুতেন চ
দুহিত্রা চৈব সহিতং দদর্শ বিকৃতাননম্
145.20
ব্রাহ্মণ উবাচ
ধিগিদং জীবিতং লোকেঽনলসারমনর্থকম্
দুঃখমূলং পরাধীনং ভৃশমপ্রিয়ভাগি চ
145.21
জীবিতে পরমং দুঃখং জীবিতে পরমো জ্বরঃ
জীবিতে বর্তমানস্য দ্বন্দ্বানামাগমো ধ্রুবঃ
145.22
একাত্মাপি হি ধর্মার্থৌ কামং চ ন নিষেবতে
এতৈশ্চ বিপ্রয়োগোঽপি দুঃখং পরমকং মতম্
145.23
আহুঃ কেচিত্পরং মোক্ষং স চ নাস্তি কথংচন
অর্থপ্রাপ্তৌ চ নরকঃ কৃত্স্ন এবোপপদ্যতে
145.24
অর্থেপ্সুতা পরং দুঃখমর্থপ্রাপ্তৌ ততোঽধিকম্
জাতস্নেহস্য চার্থেষু বিপ্রয়োগে মহত্তরম্
145.25
ন হি যোগং প্রপশ্যামি যেন মুচ্যেয়মাপদঃ
পুত্রদারেণ বা সার্ধং প্রাদ্রবেয়ামনাময়ম্
145.26
যতিতং বৈ ময়া পূর্বং যথা ত্বং বেত্থ ব্রাহ্মণি
যতঃ ক্ষেমং ততো গন্তুং ত্বয়া তু মম ন শ্রুতম্
145.27
ইহ জাতা বিবৃদ্ধাস্মি পিতা চেহ মমেতি চ
উক্তবত্যসি দুর্মেধে যাচ্যমানা ময়াসকৃৎ
145.28
স্বর্গতো হি পিতা বৃদ্ধস্তথা মাতা চিরং তব
বান্ধবা ভূতপূর্বাশ্চ তত্র বাসে তু কা রতিঃ
145.29
সোঽয়ং তে বন্ধুকামায়া অশৃণ্বন্ত্যা বচো মম
বন্ধুপ্রণাশঃ সংপ্রাপ্তো ভৃশং দুঃখকরো মম
145.30
অথ বা মদ্বিনাশোঽয়ং ন হি শক্ষ্যামি কংচন
পরিত্যক্তুমহং বন্ধুং স্বয়ং জীবন্নৃশংসবৎ
145.31
সহধর্মচরীং দান্তাং নিত্যং মাতৃসমাং মম
সখায়ং বিহিতাং দেবৈর্নিত্যং পরমিকাং গতিম্
145.32
মাত্রা পিত্রা চ বিহিতাং সদা গার্হস্থ্যভাগিনীম্
বরয়িত্বা যথান্যায়ং মন্ত্রবত্পরিণীয় চ
145.33
কুলীনাং শীলসংপন্নামপত্যজননীং মম
ত্বামহং জীবিতস্যার্থে সাধ্বীমনপকারিণীম্
পরিত্যক্তুং ন শক্ষ্যামি ভার্যাং নিত্যমনুব্রতাম্
145.34
কুত এব পরিত্যক্তুং সুতাং শক্ষ্যাম্যহং স্বয়ম্
বালামপ্রাপ্তবয়সমজাতব্যঞ্জনাকৃতিম্
145.35
ভর্তুরর্থায় নিক্ষিপ্তাং ন্যাসং ধাত্রা মহাত্মনা
যস্যাং দৌহিত্রজাঁল্লোকানাশংসে পিতৃভিঃ সহ
স্বয়মুত্পাদ্য তাং বালাং কথমুত্স্রষ্টুমুত্সহে
145.36
মন্যন্তে কেচিদধিকং স্নেহং পুত্রে পিতুর্নরাঃ
কন্যায়াং নৈব তু পুনর্মম তুল্যাবুভৌ মতৌ
145.37
যস্মিঁল্লোকাঃ প্রসূতিশ্চ স্থিতা নিত্যমথো সুখম্
অপাপাং তামহং বালাং কথমুত্স্রষ্টুমুত্সহে
145.38
আত্মানমপি চোত্সৃজ্য তপ্স্যে প্রেতবশং গতঃ
ত্যক্তা হ্যেতে ময়া ব্যক্তং নেহ শক্ষ্যন্তি জীবিতুম্
145.39
এষাং চান্যতমত্যাগো নৃশংসো গর্হিতো বুধৈঃ
আত্মত্যাগে কৃতে চেমে মরিষ্যন্তি ময়া বিনা
145.40
স কৃচ্ছ্রামহমাপন্নো ন শক্তস্তর্তুমাপদম্
অহো ধিক্কাং গতিং ত্বদ্য গমিষ্যামি সবান্ধবঃ
সর্বৈঃ সহ মৃতং শ্রেয়ো ন তু মে জীবিতং ক্ষমম্