অধ্যায় 144

144.1

বৈশংপায়ন উবাচ
তে বনেন বনং বীরা ঘ্নন্তো মৃগগণান্বহূন্
অপক্রম্য যয়ূ রাজংস্ত্বরমাণা মহারথাঃ

মত্স্যাংস্ত্রিগর্তান্পাঞ্চালান্কীচকানন্তরেণ চ
রমণীয়ান্বনোদ্দেশান্প্রেক্ষমাণাঃ সরাংসি চ

জটাঃ কৃত্বাত্মনঃ সর্বে বল্কলাজিনবাসসঃ
সহ কুন্ত্যা মহাত্মানো বিভ্রতস্তাপসং বপুঃ

ক্বচিদ্বহন্তো জননীং ত্বরমাণা মহারথাঃ
ক্বচিচ্ছন্দেন গচ্ছন্তস্তে জগ্মুঃ প্রসভং পুনঃ

ব্রাহ্মং বেদমধীয়ানা বেদাঙ্গানি চ সর্বশঃ
নীতিশাস্ত্রং চ ধর্মজ্ঞা দদৃশুস্তে পিতামহম্

তেঽভিবাদ্য মহাত্মানং কৃষ্ণদ্বৈপায়নং তদা
তস্থুঃ প্রাঞ্জলয়ঃ সর্বে সহ মাত্রা পরংতপাঃ

ব্যাস উবাচ
ময়েদং মনসা পূর্বং বিদিতং ভরতর্ষভাঃ
যথা স্থিতৈরধর্মেণ ধার্তরাষ্ট্রৈর্বিবাসিতাঃ

তদ্বিদিত্বাস্মি সংপ্রাপ্তশ্চিকীর্ষুঃ পরমং হিতম্
ন বিষাদোঽত্র কর্তব্যঃ সর্বমেতত্সুখায় বঃ

সমাস্তে চৈব মে সর্বে যূয়ং চৈব ন সংশয়ঃ
দীনতো বালতশ্চৈব স্নেহং কুর্বন্তি বান্ধবাঃ

তস্মাদভ্যধিকঃ স্নেহো যুষ্মাসু মম সাংপ্রতম্
স্নেহপূর্বং চিকীর্ষামি হিতং বস্তন্নিবোধত

ইদং নগরমভ্যাশে রমণীয়ং নিরাময়ম্
বসতেহ প্রতিচ্ছন্না মমাগমনকাঙ্ক্ষিণঃ

বৈশংপায়ন উবাচ
এবং স তান্সমাশ্বাস্য ব্যাসঃ পার্থানরিংদমান্
একচক্রামভিগতঃ কুন্তীমাশ্বাসয়ত্প্রভুঃ

জীবপুত্রি সুতস্তেঽয়ং ধর্মপুত্রো যুধিষ্ঠিরঃ
পৃথিব্যাং পার্থিবান্সর্বান্প্রশাসিষ্যতি ধর্মরাট্

ধর্মেণ জিত্বা পৃথিবীমখিলাং ধর্মবিদ্বশী
ভীমসেনার্জুনবলাদ্ভোক্ষ্যত্যয়মসংশয়ঃ

পুত্রাস্তব চ মাদ্র্যাশ্চ সর্ব এব মহারথাঃ
স্বরাষ্ট্রে বিহরিষ্যন্তি সুখং সুমনসস্তদা

যক্ষ্যন্তি চ নরব্যাঘ্রা বিজিত্য পৃথিবীমিমাম্
রাজসূয়াশ্বমেধাদ্যৈঃ ক্রতুভির্ভূরিদক্ষিণৈঃ

অনুগৃহ্য সুহৃদ্বর্গং ধনেন চ সুখেন চ
পিতৃপৈতামহং রাজ্যমিহ ভোক্ষ্যন্তি তে সুতাঃ

এবমুক্ত্বা নিবেশ্যৈনান্ব্রাহ্মণস্য নিবেশনে
অব্রবীত্পার্থিবশ্রেষ্ঠমৃষির্দ্বৈপায়নস্তদা

ইহ মাং সংপ্রতীক্ষধ্বমাগমিষ্যাম্যহং পুনঃ
দেশকালৌ বিদিত্বৈব বেত্স্যধ্বং পরমাং মুদম্

স তৈঃ প্রাঞ্জলিভিঃ সর্বৈস্তথেত্যুক্তো নরাধিপ
জগাম ভগবান্ব্যাসো যথাকামমৃষিঃ প্রভুঃ