Utshovঅধ্যায় 143
143.1
ভীম উবাচ
স্মরন্তি বৈরং রক্ষাংসি মায়ামাশ্রিত্য মোহিনীম্
হিডিম্বে ব্রজ পন্থানং ত্বং বৈ ভ্রাতৃনিষেবিতম্
143.2
যুধিষ্ঠির উবাচ
ক্রুদ্ধোঽপি পুরুষব্যাঘ্র ভীম মা স্ম স্ত্রিয়ং বধীঃ
শরীরগুপ্ত্যাভ্যধিকং ধর্মং গোপয় পাণ্ডব
143.3
বধাভিপ্রায়মায়ান্তমবধীস্ত্বং মহাবলম্
রক্ষসস্তস্য ভগিনী কিং নঃ ক্রুদ্ধা করিষ্যতি
143.4
বৈশংপায়ন উবাচ
হিডিম্বা তু ততঃ কুন্তীমভিবাদ্য কৃতাঞ্জলিঃ
যুধিষ্ঠিরং চ কৌন্তেয়মিদং বচনমব্রবীৎ
143.5
আর্যে জানাসি যদ্দুঃখমিহ স্ত্রীণামনঙ্গজম্
তদিদং মামনুপ্রাপ্তং ভীমসেনকৃতং শুভে
143.6
সোঢং তত্পরমং দুঃখং ময়া কালপ্রতীক্ষয়া
সোঽয়মভ্যাগতঃ কালো ভবিতা মে সুখায় বৈ
143.7
ময়া হ্যুত্সৃজ্য সুহৃদঃ স্বধর্মং স্বজনং তথা
বৃতোঽয়ং পুরুষব্যাঘ্রস্তব পুত্রঃ পতিঃ শুভে
143.8
বরেণাপি তথানেন ত্বয়া চাপি যশস্বিনি
তথা ব্রুবন্তী হি তদা প্রত্যাখ্যাতা ক্রিয়াং প্রতি
143.9
ত্বং মাং মূঢেতি বা মত্বা ভক্তা বানুগতেতি বা
ভর্ত্রানেন মহাভাগে সংয়োজয় সুতেন তে
143.10
তমুপাদায় গচ্ছেয়ং যথেষ্টং দেবরূপিণম্
পুনশ্চৈবাগমিষ্যামি বিশ্রম্ভং কুরু মে শুভে
143.11
অহং হি মনসা ধ্যাতা সর্বান্নেষ্যামি বঃ সদা
বৃজিনে তারয়িষ্যামি দুর্গেষু চ নরর্ষভান্
143.12
পৃষ্ঠেন বো বহিষ্যামি শীঘ্রাং গতিমভীপ্সতঃ
যূয়ং প্রসাদং কুরুত ভীমসেনো ভজেত মাম্
143.13
আপদস্তরণে প্রাণান্ধারয়েদ্যেন যেন হি
সর্বমাদৃত্য কর্তব্যং তদ্ধর্মমনুবর্ততা
143.14
আপত্সু যো ধারয়তি ধর্মং ধর্মবিদুত্তমঃ
ব্যসনং হ্যেব ধর্মস্য ধর্মিণামাপদুচ্যতে
143.15
পুণ্যং প্রাণান্ধারয়তি পুণ্যং প্রাণদমুচ্যতে
যেন যেনাচরেদ্ধর্মং তস্মিন্গর্হা ন বিদ্যতে
143.16
যুধিষ্ঠির উবাচ
এবমেতদ্যথাত্থ ত্বং হিডিম্বে নাত্র সংশয়ঃ
স্থাতব্যং তু ত্বয়া ধর্মে যথা ব্রূয়াং সুমধ্যমে
143.17
স্নাতং কৃতাহ্নিকং ভদ্রে কৃতকৌতুকমঙ্গলম্
ভীমসেনং ভজেথাস্ত্বং প্রাগস্তগমনাদ্রবেঃ
143.18
অহঃসু বিহরানেন যথাকামং মনোজবা
অয়ং ত্বানয়িতব্যস্তে ভীমসেনঃ সদা নিশি
143.19
বৈশংপায়ন উবাচ
তথেতি তত্প্রতিজ্ঞায় হিডিম্বা রাক্ষসী তদা
ভীমসেনমুপাদায় ঊর্ধ্বমাচক্রমে ততঃ
143.20
শৈলশৃঙ্গেষু রম্যেষু দেবতায়তনেষু চ
মৃগপক্ষিবিঘুষ্টেষু রমণীয়েষু সর্বদা
143.21
কৃত্বা চ পরমং রূপং সর্বাভরণভূষিতা
সংজল্পন্তী সুমধুরং রময়ামাস পাণ্ডবম্
143.22
তথৈব বনদুর্গেষু পুষ্পিতদ্রুমসানুষু
সরঃসু রমণীয়েষু পদ্মোত্পলয়ুতেষু চ
143.23
নদীদ্বীপপ্রদেশেষু বৈডূর্যসিকতাসু চ
সুতীর্থবনতোয়াসু তথা গিরিনদীষু চ
143.24
সগরস্য প্রদেশেষু মণিহেমচিতেষু চ
পত্তনেষু চ রম্যেষু মহাশালবনেষু চ
143.25
দেবারণ্যেষু পুণ্যেষু তথা পর্বতসানুষু
গুহ্যকানাং নিবাসেষু তাপসায়তনেষু চ
143.26
সর্বর্তুফলপুষ্পেষু মানসেষু সরঃসু চ
বিভ্রতী পরমং রূপং রময়ামাস পাণ্ডবম্
143.27
রময়ন্তী তথা ভীমং তত্র তত্র মনোজবা
প্রজজ্ঞে রাক্ষসী পুত্রং ভীমসেনান্মহাবলম্
143.28
বিরূপাক্ষং মহাবক্ত্রং শঙ্কুকর্ণং বিভীষণম্
ভীমরূপং সুতাম্রোষ্ঠং তীক্ষ্ণদংষ্ট্রং মহাবলম্
143.29
মহেষ্বাসং মহাবীর্যং মহাসত্ত্বং মহাভুজম্
মহাজবং মহাকায়ং মহামায়মরিংদমম্
143.30
অমানুষং মানুষজং ভীমবেগং মহাবলম্
যঃ পিশাচানতীবান্যান্বভূবাতি স মানুষান্
143.31
বালোঽপি যৌবনং প্রাপ্তো মানুষেষু বিশাং পতে
সর্বাস্ত্রেষু পরং বীরঃ প্রকর্ষমগমদ্বলী
143.32
সদ্যো হি গর্ভং রাক্ষস্যো লভন্তে প্রসবন্তি চ
কামরূপধরাশ্চৈব ভবন্তি বহুরূপিণঃ
143.33
প্রণম্য বিকচঃ পাদাবগৃহ্ণাত্স পিতুস্তদা
মাতুশ্চ পরমেষ্বাসস্তৌ চ নামাস্য চক্রতুঃ
143.34
ঘটভাসোত্কচ ইতি মাতরং সোঽভ্যভাষত
অভবত্তেন নামাস্য ঘটোত্কচ ইতি স্ম হ
143.35
অনুরক্তশ্চ তানাসীত্পাণ্ডবান্স ঘটোত্কচঃ
তেষাং চ দয়িতো নিত্যমাত্মভূতো বভূব সঃ
143.36
সংবাসসময়ো জীর্ণ ইত্যভাষত তং ততঃ
হিডিম্বা সময়ং কৃত্বা স্বাং গতিং প্রত্যপদ্যত
143.37
কৃত্যকাল উপস্থাস্যে পিতৄনিতি ঘটোত্কচঃ
আমন্ত্র্য রাক্ষসশ্রেষ্ঠঃ প্রতস্থে চোত্তরাং দিশম্
143.38
স হি সৃষ্টো মঘবতা শক্তিহেতোর্মহাত্মনা
কর্ণস্যাপ্রতিবীর্যস্য বিনাশায় মহাত্মনঃ