Utshovঅধ্যায় 142
142.1
বৈশংপায়ন উবাচ
প্রবুদ্ধাস্তে হিডিম্বায়া রূপং দৃষ্ট্বাতিমানুষম্
বিস্মিতাঃ পুরুষব্যাঘ্রা বভূবুঃ পৃথয়া সহ
142.2
ততঃ কুন্তী সমীক্ষ্যৈনাং বিস্মিতা রূপসংপদা
উবাচ মধুরং বাক্যং সান্ত্বপূর্বমিদং শনৈঃ
142.3
কস্য ত্বং সুরগর্ভাভে কা চাসি বরবর্ণিনি
কেন কার্যেণ সুশ্রোণি কুতশ্চাগমনং তব
142.4
যদি বাস্য বনস্যাসি দেবতা যদি বাপ্সরাঃ
আচক্ষ্ব মম তত্সর্বং কিমর্থং চেহ তিষ্ঠসি
142.5
হিডিম্বোবাচ
যদেতত্পশ্যসি বনং নীলমেঘনিভং মহৎ
নিবাসো রাক্ষসস্যৈতদ্ধিডিম্বস্য মমৈব চ
142.6
তস্য মাং রাক্ষসেন্দ্রস্য ভগিনীং বিদ্ধি ভামিনি
ভ্রাত্রা সংপ্রেষিতামার্যে ত্বাং সপুত্রাং জিঘাংসতা
142.7
ক্রূরবুদ্ধেরহং তস্য বচনাদাগতা ইহ
অদ্রাক্ষং হেমবর্ণাভং তব পুত্রং মহৌজসম্
142.8
ততোঽহং সর্বভূতানাং ভাবে বিচরতা শুভে
চোদিতা তব পুত্রস্য মন্মথেন বশানুগা
142.9
ততো বৃতো ময়া ভর্তা তব পুত্রো মহাবলঃ
অপনেতুং চ যতিতো ন চৈব শকিতো ময়া
142.10
চিরায়মাণাং মাং জ্ঞাত্বা ততঃ স পুরুষাদকঃ
স্বয়মেবাগতো হন্তুমিমান্সর্বাংস্তবাত্মজান্
142.11
স তেন মম কান্তেন তব পুত্রেণ ধীমতা
বলাদিতো বিনিষ্পিষ্য ব্যপকৃষ্টো মহাত্মনা
142.12
বিকর্ষন্তৌ মহাবেগৌ গর্জমানৌ পরস্পরম্
পশ্যধ্বং যুধি বিক্রান্তাবেতৌ তৌ নররাক্ষসৌ
142.13
বৈশংপায়ন উবাচ
তস্যাঃ শ্রুত্বৈব বচনমুত্পপাত যুধিষ্ঠিরঃ
অর্জুনো নকুলশ্চৈব সহদেবশ্চ বীর্যবান্
142.14
তৌ তে দদৃশুরাসক্তৌ বিকর্ষন্তৌ পরস্পরম্
কাঙ্ক্ষমাণৌ জয়ং চৈব সিংহাবিব রণোত্কটৌ
142.15
তাবন্যোন্যং সমাশ্লিষ্য বিকর্ষন্তৌ পরস্পরম্
দাবাগ্নিধূমসদৃশং চক্রতুঃ পার্থিবং রজঃ
142.16
বসুধারেণুসংবীতৌ বসুধাধরসংনিভৌ
বিভ্রাজেতাং যথা শৈলৌ নীহারেণাভিসংবৃতৌ
142.17
রাক্ষসেন তথা ভীমং ক্লিশ্যমানং নিরীক্ষ্য তু
উবাচেদং বচঃ পার্থঃ প্রহসঞ্শনকৈরিব
142.18
ভীম মা ভৈর্মহাবাহো ন ত্বাং বুধ্যামহে বয়ম্
সমেতং ভীমরূপেণ প্রসুপ্তাঃ শ্রমকর্শিতাঃ
142.19
সাহায্যেঽস্মি স্থিতঃ পার্থ যোধয়িষ্যামি রাক্ষসম্
নকুলঃ সহদেবশ্চ মাতরং গোপয়িষ্যতঃ
142.20
ভীম উবাচ
উদাসীনো নিরীক্ষস্ব ন কার্যঃ সংভ্রমস্ত্বয়া
ন জাত্বয়ং পুনর্জীবেন্মদ্বাহ্বন্তরমাগতঃ
142.21
অর্জুন উবাচ
কিমনেন চিরং ভীম জীবতা পাপরক্ষসা
গন্তব্যং ন চিরং স্থাতুমিহ শক্যমরিংদম
142.22
পুরা সংরজ্যতে প্রাচী পুরা সংধ্যা প্রবর্ততে
রৌদ্রে মুহূর্তে রক্ষাংসি প্রবলানি ভবন্তি চ
142.23
ত্বরস্ব ভীম মা ক্রীড জহি রক্ষো বিভীষণম্
পুরা বিকুরুতে মায়াং ভুজয়োঃ সারমর্পয়
142.24
বৈশংপায়ন উবাচ
অর্জুনেনৈবমুক্তস্তু ভীমো ভীমস্য রক্ষসঃ
উত্ক্ষিপ্যাভ্রাময়দ্দেহং তূর্ণং গুণশতাধিকম্
142.25
ভীম উবাচ
বৃথামাংসৈর্বৃথা পুষ্টো বৃথা বৃদ্ধো বৃথামতিঃ
বৃথামরণমর্হস্ত্বং বৃথাদ্য ন ভবিষ্যসি
142.26
অর্জুন উবাচ
অথ বা মন্যসে ভারং ত্বমিমং রাক্ষসং যুধি
করোমি তব সাহায্যং শীঘ্রমেব নিহন্যতাম্
142.27
অথ বাপ্যহমেবৈনং হনিষ্যামি বৃকোদর
কৃতকর্মা পরিশ্রান্তঃ সাধু তাবদুপারম
142.28
বৈশংপায়ন উবাচ
তস্য তদ্বচনং শ্রুত্বা ভীমসেনোঽত্যমর্ষণঃ
নিষ্পিষ্যৈনং বলাদ্ভূমৌ পশুমারমমারয়ৎ
142.29
স মার্যমাণো ভীমেন ননাদ বিপুলং স্বনম্
পূরয়ংস্তদ্বনং সর্বং জলার্দ্র ইব দুন্দুভিঃ
142.30
ভুজাভ্যাং যোক্ত্রয়িত্বা তং বলবান্পাণ্ডুনন্দনঃ
মধ্যে ভঙ্ক্ত্বা স বলবান্হর্ষয়ামাস পাণ্ডবান্
142.31
হিডিম্বং নিহতং দৃষ্ট্বা সংহৃষ্টাস্তে তরস্বিনঃ
অপূজয়ন্নরব্যাঘ্রং ভীমসেনমরিংদমম্
142.32
অভিপূজ্য মহাত্মানং ভীমং ভীমপরাক্রমম্
পুনরেবার্জুনো বাক্যমুবাচেদং বৃকোদরম্
142.33
নদূরে নগরং মন্যে বনাদস্মাদহং প্রভো
শীঘ্রং গচ্ছাম ভদ্রং তে ন নো বিদ্যাত্সুয়োধনঃ
142.34
ততঃ সর্বে তথেত্যুক্ত্বা সহ মাত্রা পরংতপাঃ
প্রয়য়ুঃ পুরুষব্যাঘ্রা হিডিম্বা চৈব রাক্ষসী