অধ্যায় 141

141.1

বৈশংপায়ন উবাচ
ভীমসেনস্তু তং দৃষ্ট্বা রাক্ষসং প্রহসন্নিব
ভগিনীং প্রতি সংক্রুদ্ধমিদং বচনমব্রবীৎ

141.2

কিং তে হিডিম্ব এতৈর্বা সুখসুপ্তৈঃ প্রবোধিতৈঃ
মামাসাদয় দুর্বুদ্ধে তরসা ত্বং নরাশন

141.3

ময্যেব প্রহরৈহি ত্বং ন স্ত্রিয়ং হন্তুমর্হসি
বিশেষতোঽনপকৃতে পরেণাপকৃতে সতি

141.4

ন হীয়ং স্ববশা বালা কাময়ত্যদ্য মামিহ
চোদিতৈষা হ্যনঙ্গেন শরীরান্তরচারিণা
ভগিনী তব দুর্বুদ্ধে রাক্ষসানাং যশোহর

141.5

ত্বন্নিয়োগেন চৈবেয়ং রূপং মম সমীক্ষ্য চ
কাময়ত্যদ্য মাং ভীরুর্নৈষা দূষয়তে কুলম্

141.6

অনঙ্গেন কৃতে দোষে নেমাং ত্বমিহ রাক্ষস
ময়ি তিষ্ঠতি দুষ্টাত্মন্ন স্ত্রিয়ং হন্তুমর্হসি

141.7

সমাগচ্ছ ময়া সার্ধমেকেনৈকো নরাশন
অহমেব নয়িষ্যামি ত্বামদ্য যমসাদনম্

141.8

অদ্য তে তলনিষ্পিষ্টং শিরো রাক্ষস দীর্যতাম্
কুঞ্জরস্যেব পাদেন বিনিষ্পিষ্টং বলীয়সঃ

141.9

অদ্য গাত্রাণি ক্রব্যাদাঃ শ্যেনা গোমায়বশ্চ তে
কর্ষন্তু ভুবি সংহৃষ্টা নিহতস্য ময়া মৃধে

141.10

ক্ষণেনাদ্য করিষ্যেঽহমিদং বনমকণ্টকম্
পুরস্তাদ্দূষিতং নিত্যং ত্বয়া ভক্ষয়তা নরান্

141.11

অদ্য ত্বাং ভগিনী পাপ কৃষ্যমাণং ময়া ভুবি
দ্রক্ষত্যদ্রিপ্রতীকাশং সিংহেনেব মহাদ্বিপম্

141.12

নিরাবাধাস্ত্বয়ি হতে ময়া রাক্ষসপাংসন
বনমেতচ্চরিষ্যন্তি পুরুষা বনচারিণঃ

141.13

হিডিম্ব উবাচ
গর্জিতেন বৃথা কিং তে কত্থিতেন চ মানুষ
কৃত্বৈতত্কর্মণা সর্বং কত্থেথা মা চিরং কৃথাঃ

141.14

বলিনং মন্যসে যচ্চ আত্মানমপরাক্রমম্
জ্ঞাস্যস্যদ্য সমাগম্য ময়াত্মানং বলাধিকম্

141.15

ন তাবদেতান্হিংসিষ্যে স্বপন্ত্বেতে যথাসুখম্
এষ ত্বামেব দুর্বুদ্ধে নিহন্ম্যদ্যাপ্রিয়ংবদম্

141.16

পীত্বা তবাসৃগ্গাত্রেভ্যস্ততঃ পশ্চাদিমানপি
হনিষ্যামি ততঃ পশ্চাদিমাং বিপ্রিয়কারিণীম্

141.17

বৈশংপায়ন উবাচ
এবমুক্ত্বা ততো বাহুং প্রগৃহ্য পুরুষাদকঃ
অভ্যধাবত সংক্রুদ্ধো ভীমসেনমরিংদমম্

141.18

তস্যাভিপততস্তূর্ণং ভীমো ভীমপরাক্রমঃ
বেগেন প্রহৃতং বাহুং নিজগ্রাহ হসন্নিব

141.19

নিগৃহ্য তং বলাদ্ভীমো বিস্ফুরন্তং চকর্ষ হ
তস্মাদ্দেশাদ্ধনূংষ্যষ্টৌ সিংহঃ ক্ষুদ্রমৃগং যথা

141.20

ততঃ স রাক্ষসঃ ক্রুদ্ধঃ পাণ্ডবেন বলাদ্ধৃতঃ
ভীমসেনং সমালিঙ্গ্য ব্যনদদ্ভৈরবং রবম্

141.21

পুনর্ভীমো বলাদেনং বিচকর্ষ মহাবলঃ
মা শব্দঃ সুখসুপ্তানাং ভ্রাতৄণাং মে ভবেদিতি

141.22

অন্যোন্যং তৌ সমাসাদ্য বিচকর্ষতুরোজসা
রাক্ষসো ভীমসেনশ্চ বিক্রমং চক্রতুঃ পরম্

141.23

বভঞ্জতুর্মহাবৃক্ষাঁল্লতাশ্চাকর্ষতুস্ততঃ
মত্তাবিব সুসংরব্ধৌ বারণৌ ষষ্টিহায়নৌ

141.24

তয়োঃ শব্দেন মহতা বিবুদ্ধাস্তে নরর্ষভাঃ
সহ মাত্রা তু দদৃশুর্হিডিম্বামগ্রতঃ স্থিতাম্

Contains text from DharmicData, made available under the Open Database License (ODbL). Simple meanings are written by AI and can contain mistakes.