অধ্যায় 140

140.1

বৈশংপায়ন উবাচ
তাং বিদিত্বা চিরগতাং হিডিম্বো রাক্ষসেশ্বরঃ
অবতীর্য দ্রুমাত্তস্মাদাজগামাথ পাণ্ডবান্

লোহিতাক্ষো মহাবাহুরূর্ধ্বকেশো মহাবলঃ
মেঘসংঘাতবর্ষ্মা চ তীক্ষ্ণদংষ্ট্রোজ্জ্বলাননঃ

তমাপতন্তং দৃষ্ট্বৈব তথা বিকৃতদর্শনম্
হিডিম্বোবাচ বিত্রস্তা ভীমসেনমিদং বচঃ

আপতত্যেষ দুষ্টাত্মা সংক্রুদ্ধঃ পুরুষাদকঃ
ত্বামহং ভ্রাতৃভিঃ সার্ধং যদ্ব্রবীমি তথা কুরু

অহং কামগমা বীর রক্ষোবলসমন্বিতা
আরুহেমাং মম শ্রোণীং নেষ্যামি ত্বাং বিহায়সা

প্রবোধয়ৈনান্সংসুপ্তান্মাতরং চ পরংতপ
সর্বানেব গমিষ্যামি গৃহীত্বা বো বিহায়সা

ভীম উবাচ
মা ভৈস্ত্বং বিপুলশ্রোণি নৈষ কশ্চিন্ময়ি স্থিতে
অহমেনং হনিষ্যামি প্রেক্ষন্ত্যাস্তে সুমধ্যমে

নায়ং প্রতিবলো ভীরু রাক্ষসাপসদো মম
সোঢুং যুধি পরিস্পন্দমথ বা সর্বরাক্ষসাঃ

পশ্য বাহূ সুবৃত্তৌ মে হস্তিহস্তনিভাবিমৌ
ঊরূ পরিঘসংকাশৌ সংহতং চাপ্যুরো মম

বিক্রমং মে যথেন্দ্রস্য সাদ্য দ্রক্ষ্যসি শোভনে
মাবমংস্থাঃ পৃথুশ্রোণি মত্বা মামিহ মানুষম্

হিডিম্বোবাচ
নাবমন্যে নরব্যাঘ্র ত্বামহং দেবরূপিণম্
দৃষ্টাপদানস্তু ময়া মানুষেষ্বেব রাক্ষসঃ

বৈশংপায়ন উবাচ
তথা সংজল্পতস্তস্য ভীমসেনস্য ভারত
বাচঃ শুশ্রাব তাঃ ক্রুদ্ধো রাক্ষসঃ পুরুষাদকঃ

অবেক্ষমাণস্তস্যাশ্চ হিডিম্বো মানুষং বপুঃ
স্রগ্দামপূরিতশিখং সমগ্রেন্দুনিভাননম্

সুভ্রূনাসাক্ষিকেশান্তং সুকুমারনখত্বচম্
সর্বাভরণসংয়ুক্তং সুসূক্ষ্মাম্বরবাসসম্

তাং তথা মানুষং রূপং বিভ্রতীং সুমনোহরম্
পুংস্কামাং শঙ্কমানশ্চ চুক্রোধ পুরুষাদকঃ

সংক্রুদ্ধো রাক্ষসস্তস্যা ভগিন্যাঃ কুরুসত্তম
উত্ফাল্য বিপুলে নেত্রে ততস্তামিদমব্রবীৎ

কো হি মে ভোক্তুকামস্য বিঘ্নং চরতি দুর্মতিঃ
ন বিভেষি হিডিম্বে কিং মত্কোপাদ্বিপ্রমোহিতা

ধিক্ত্বামসতি পুংস্কামে মম বিপ্রিয়কারিণি
পূর্বেষাং রাক্ষসেন্দ্রাণাং সর্বেষাময়শস্করি

যানিমানাশ্রিতাকার্ষীরপ্রিয়ং সুমহন্মম
এষ তানদ্য বৈ সর্বান্হনিষ্যামি ত্বয়া সহ

এবমুক্ত্বা হিডিম্বাং স হিডিম্বো লোহিতেক্ষণঃ
বধায়াভিপপাতৈনাং দন্তৈর্দন্তানুপস্পৃশন্

তমাপতন্তং সংপ্রেক্ষ্য ভীমঃ প্রহরতাং বরঃ
ভর্ত্সয়ামাস তেজস্বী তিষ্ঠ তিষ্ঠেতি চাব্রবীৎ