Utshovঅধ্যায় 139
139.1
বৈশংপায়ন উবাচ
তত্র তেষু শয়ানেষু হিডিম্বো নাম রাক্ষসঃ
অবিদূরে বনাত্তস্মাচ্ছালবৃক্ষমুপাশ্রিতঃ
139.2
ক্রূরো মানুষমাংসাদো মহাবীর্যো মহাবলঃ
বিরূপরূপঃ পিঙ্গাক্ষঃ করালো ঘোরদর্শনঃ
পিশিতেপ্সুঃ ক্ষুধার্তস্তানপশ্যত যদৃচ্ছয়া
139.3
ঊর্ধ্বাঙ্গুলিঃ স কণ্ডূয়ন্ধুন্বন্রূক্ষাঞ্শিরোরুহান্
জৃম্ভমাণো মহাবক্ত্রঃ পুনঃ পুনরবেক্ষ্য চ
139.4
দুষ্টো মানুষমাংসাদো মহাকায়ো মহাবলঃ
আঘ্রায় মানুষং গন্ধং ভগিনীমিদমব্রবীৎ
139.5
উপপন্নশ্চিরস্যাদ্য ভক্ষো মম মনঃপ্রিয়ঃ
স্নেহস্রবান্প্রস্রবতি জিহ্বা পর্যেতি মে মুখম্
139.6
অষ্টৌ দংষ্ট্রাঃ সুতীক্ষ্ণাগ্রাশ্চিরস্যাপাতদুঃসহাঃ
দেহেষু মজ্জয়িষ্যামি স্নিগ্ধেষু পিশিতেষু চ
139.7
আক্রম্য মানুষং কণ্ঠমাচ্ছিদ্য ধমনীমপি
উষ্ণং নবং প্রপাস্যামি ফেনিলং রুধিরং বহু
139.8
গচ্ছ জানীহি কে ত্বেতে শেরতে বনমাশ্রিতাঃ
মানুষো বলবান্গন্ধো ঘ্রাণং তর্পয়তীব মে
139.9
হত্বৈতান্মানুষান্সর্বানানয়স্ব মমান্তিকম্
অস্মদ্বিষয়সুপ্তেভ্যো নৈতেভ্যো ভয়মস্তি তে
139.10
এষাং মাংসানি সংস্কৃত্য মানুষাণাং যথেষ্টতঃ
ভক্ষয়িষ্যাব সহিতৌ কুরু তূর্ণং বচো মম
139.11
ভ্রাতুর্বচনমাজ্ঞায় ত্বরমাণেব রাক্ষসী
জগাম তত্র যত্র স্ম পাণ্ডবা ভরতর্ষভ
139.12
দদর্শ তত্র গত্বা সা পাণ্ডবান্পৃথয়া সহ
শয়ানান্ভীমসেনং চ জাগ্রতং ত্বপরাজিতম্
139.13
দৃষ্ট্বৈব ভীমসেনং সা শালস্কন্ধমিবোদ্গতম্
রাক্ষসী কাময়ামাস রূপেণাপ্রতিমং ভুবি
139.14
অয়ং শ্যামো মহাবাহুঃ সিংহস্কন্ধো মহাদ্যুতিঃ
কম্বুগ্রীবঃ পুষ্করাক্ষো ভর্তা যুক্তো ভবেন্মম
139.15
নাহং ভ্রাতৃবচো জাতু কুর্যাং ক্রূরোপসংহিতম্
পতিস্নেহোঽতিবলবান্ন তথা ভ্রাতৃসৌহৃদম্
139.16
মুহূর্তমিব তৃপ্তিশ্চ ভবেদ্ভ্রাতুর্মমৈব চ
হতৈরেতৈরহত্বা তু মোদিষ্যে শাশ্বতীঃ সমাঃ
139.17
সা কামরূপিণী রূপং কৃত্বা মানুষমুত্তমম্
উপতস্থে মহাবাহুং ভীমসেনং শনৈঃ শনৈঃ
139.18
বিলজ্জমানেব লতা দিব্যাভরণভূষিতা
স্মিতপূর্বমিদং বাক্যং ভীমসেনমথাব্রবীৎ
139.19
কুতস্ত্বমসি সংপ্রাপ্তঃ কশ্চাসি পুরুষর্ষভ
ক ইমে শেরতে চেহ পুরুষা দেবরূপিণঃ
139.20
কেয়ং চ বৃহতী শ্যামা সুকুমারী তবানঘ
শেতে বনমিদং প্রাপ্য বিশ্বস্তা স্বগৃহে যথা
139.21
নেদং জানাতি গহনং বনং রাক্ষসসেবিতম্
বসতি হ্যত্র পাপাত্মা হিডিম্বো নাম রাক্ষসঃ
139.22
তেনাহং প্রেষিতা ভ্রাত্রা দুষ্টভাবেন রক্ষসা
বিভক্ষয়িষতা মাংসং যুষ্মাকমমরোপম
139.23
সাহং ত্বামভিসংপ্রেক্ষ্য দেবগর্ভসমপ্রভম্
নান্যং ভর্তারমিচ্ছামি সত্যমেতদ্ব্রবীমি তে
139.24
এতদ্বিজ্ঞায় ধর্মজ্ঞ যুক্তং ময়ি সমাচর
কামোপহতচিত্তাঙ্গীং ভজমানাং ভজস্ব মাম্
139.25
ত্রাস্যেঽহং ত্বাং মহাবাহো রাক্ষসাত্পুরুষাদকাৎ
বত্স্যাবো গিরিদুর্গেষু ভর্তা ভব মমানঘ
139.26
অন্তরিক্ষচরা হ্যস্মি কামতো বিচরামি চ
অতুলামাপ্নুহি প্রীতিং তত্র তত্র ময়া সহ
139.27
ভীম উবাচ
মাতরং ভ্রাতরং জ্যেষ্ঠং কনিষ্ঠানপরানিমান্
পরিত্যজেত কো ন্বদ্য প্রভবন্নিব রাক্ষসি
139.28
কো হি সুপ্তানিমান্ভ্রাতৄন্দত্ত্বা রাক্ষসভোজনম্
মাতরং চ নরো গচ্ছেত্কামার্ত ইব মদ্বিধঃ
139.29
রাক্ষস্যুবাচ
যত্তে প্রিয়ং তত্করিষ্যে সর্বানেতান্প্রবোধয়
মোক্ষয়িষ্যামি বঃ কামং রাক্ষসাত্পুরুষাদকাৎ
139.30
ভীম উবাচ
সুখসুপ্তান্বনে ভ্রাতৄন্মাতরং চৈব রাক্ষসি
ন ভয়াদ্বোধয়িষ্যামি ভ্রাতুস্তব দুরাত্মনঃ
139.31
ন হি মে রাক্ষসা ভীরু সোঢুং শক্তাঃ পরাক্রমম্
ন মনুষ্যা ন গন্ধর্বা ন যক্ষাশ্চারুলোচনে
139.32
গচ্ছ বা তিষ্ঠ বা ভদ্রে যদ্বাপীচ্ছসি তত্কুরু
তং বা প্রেষয় তন্বঙ্গি ভ্রাতরং পুরুষাদকম্