Utshovঅধ্যায় 138
138.1
বৈশংপায়ন উবাচ
তেন বিক্রমতা তূর্ণমূরুবেগসমীরিতম্
প্রববাবনিলো রাজঞ্শুচিশুক্রাগমে যথা
138.2
স মৃদ্নন্পুষ্পিতাংশ্চৈব ফলিতাংশ্চ বনস্পতীন্
আরুজন্দারুগুল্মাংশ্চ পথস্তস্য সমীপজান্
138.3
তথা বৃক্ষান্ভঞ্জমানো জগামামিতবিক্রমঃ
তস্য বেগেন পাণ্ডূনাং মূর্চ্ছেব সমজায়ত
138.4
অসকৃচ্চাপি সংতীর্য দূরপারং ভুজপ্লবৈঃ
পথি প্রচ্ছন্নমাসেদুর্ধার্তরাষ্ট্রভয়াত্তদা
138.5
কৃচ্ছ্রেণ মাতরং ত্বেকাং সুকুমারীং যশস্বিনীম্
অবহত্তত্র পৃষ্ঠেন রোধঃসু বিষমেষু চ
138.6
আগমংস্তে বনোদ্দেশমল্পমূলফলোদকম্
ক্রূরপক্ষিমৃগং ঘোরং সায়াহ্নে ভরতর্ষভাঃ
138.7
ঘোরা সমভবত্সংধ্যা দারুণা মৃগপক্ষিণঃ
অপ্রকাশা দিশঃ সর্বা বাতৈরাসন্ননার্তবৈঃ
138.8
তে শ্রমেণ চ কৌরব্যাস্তৃষ্ণয়া চ প্রপীডিতাঃ
নাশক্নুবংস্তদা গন্তুং নিদ্রয়া চ প্রবৃদ্ধয়া
138.9
ততো ভীমো বনং ঘোরং প্রবিশ্য বিজনং মহৎ
ন্যগ্রোধং বিপুলচ্ছায়ং রমণীয়মুপাদ্রবৎ
138.10
তত্র নিক্ষিপ্য তান্সর্বানুবাচ ভরতর্ষভঃ
পানীয়ং মৃগয়ামীহ বিশ্রমধ্বমিতি প্রভো
138.11
এতে রুবন্তি মধুরং সারসা জলচারিণঃ
ধ্রুবমত্র জলস্থায়ো মহানিতি মতির্মম
138.12
অনুজ্ঞাতঃ স গচ্ছেতি ভ্রাত্রা জ্যেষ্ঠেন ভারত
জগাম তত্র যত্র স্ম রুবন্তি জলচারিণঃ
138.13
স তত্র পীত্বা পানীয়ং স্নাত্বা চ ভরতর্ষভ
উত্তরীয়েণ পানীয়মাজহার তদা নৃপ
138.14
গব্যূতিমাত্রাদাগত্য ত্বরিতো মাতরং প্রতি
স সুপ্তাং মাতরং দৃষ্ট্বা ভ্রাতৄংশ্চ বসুধাতলে
ভৃশং দুঃখপরীতাত্মা বিললাপ বৃকোদরঃ
138.15
শয়নেষু পরার্ধ্যেষু যে পুরা বারণাবতে
নাধিজগ্মুস্তদা নিদ্রাং তেঽদ্য সুপ্তা মহীতলে
138.16
স্বসারং বসুদেবস্য শত্রুসংঘাবমর্দিনঃ
কুন্তিভোজসুতাং কুন্তীং সর্বলক্ষণপূজিতাম্
138.17
স্নুষাং বিচিত্রবীর্যস্য ভার্যাং পাণ্ডোর্মহাত্মনঃ
প্রাসাদশয়নাং নিত্যং পুণ্ডরীকান্তরপ্রভাম্
138.18
সুকুমারতরাং স্ত্রীণাং মহার্হশয়নোচিতাম্
শয়ানাং পশ্যতাদ্যেহ পৃথিব্যামতথোচিতাম্
138.19
ধর্মাদিন্দ্রাচ্চ বায়োশ্চ সুষুবে যা সুতানিমান্
সেয়ং ভূমৌ পরিশ্রান্তা শেতে হ্যদ্যাতথোচিতা
138.20
কিং নু দুঃখতরং শক্যং ময়া দ্রষ্টুমতঃ পরম্
যোঽহমদ্য নরব্যাঘ্রান্সুপ্তান্পশ্যামি ভূতলে
138.21
ত্রিষু লোকেষু যদ্রাজ্যং ধর্মবিদ্যোঽর্হতে নৃপঃ
সোঽয়ং ভূমৌ পরিশ্রান্তঃ শেতে প্রাকৃতবত্কথম্
138.22
অয়ং নীলাম্বুদশ্যামো নরেষ্বপ্রতিমো ভুবি
শেতে প্রাকৃতবদ্ভূমাবতো দুঃখতরং নু কিম্
138.23
অশ্বিনাবিব দেবানাং যাবিমৌ রূপসংপদা
তৌ প্রাকৃতবদদ্যেমৌ প্রসুপ্তৌ ধরণীতলে
138.24
জ্ঞাতয়ো যস্য নৈব স্যুর্বিষমাঃ কুলপাংসনাঃ
স জীবেত্সুসুখং লোকে গ্রামে দ্রুম ইবৈকজঃ
138.25
একো বৃক্ষো হি যো গ্রামে ভবেত্পর্ণফলান্বিতঃ
চৈত্যো ভবতি নির্জ্ঞাতিরর্চনীয়ঃ সুপূজিতঃ
138.26
যেষাং চ বহবঃ শূরা জ্ঞাতয়ো ধর্মসংশ্রিতাঃ
তে জীবন্তি সুখং লোকে ভবন্তি চ নিরাময়াঃ
138.27
বলবন্তঃ সমৃদ্ধার্থা মিত্রবান্ধবনন্দনাঃ
জীবন্ত্যন্যোন্যমাশ্রিত্য দ্রুমাঃ কাননজা ইব
138.28
বয়ং তু ধৃতরাষ্ট্রেণ সপুত্রেণ দুরাত্মনা
বিবাসিতা ন দগ্ধাশ্চ কথংচিত্তস্য শাসনাৎ
138.29
তস্মান্মুক্তা বয়ং দাহাদিমং বৃক্ষমুপাশ্রিতাঃ
কাং দিশং প্রতিপত্স্যামঃ প্রাপ্তাঃ ক্লেশমনুত্তমম্
138.30
নাতিদূরে চ নগরং বনাদস্মাদ্ধি লক্ষয়ে
জাগর্তব্যে স্বপন্তীমে হন্ত জাগর্ম্যহং স্বয়ম্
138.31
পাস্যন্তীমে জলং পশ্চাত্প্রতিবুদ্ধা জিতক্লমাঃ
ইতি ভীমো ব্যবস্যৈব জজাগার স্বয়ং তদা