অধ্যায় 137

137.1

বৈশংপায়ন উবাচ
অথ রাত্র্যাং ব্যতীতায়ামশেষো নাগরো জনঃ
তত্রাজগাম ত্বরিতো দিদৃক্ষুঃ পাণ্ডুনন্দনান্

নির্বাপয়ন্তো জ্বলনং তে জনা দদৃশুস্ততঃ
জাতুষং তদ্গৃহং দগ্ধমমাত্যং চ পুরোচনম্

নূনং দুর্যোধনেনেদং বিহিতং পাপকর্মণা
পাণ্ডবানাং বিনাশায় ইত্যেবং চুক্রুষুর্জনাঃ

বিদিতে ধৃতরাষ্ট্রস্য ধার্তরাষ্ট্রো ন সংশয়ঃ
দগ্ধবান্পাণ্ডুদায়াদান্ন হ্যেনং প্রতিষিদ্ধবান্

নূনং শাংতনবো ভীষ্মো ন ধর্মমনুবর্ততে
দ্রোণশ্চ বিদুরশ্চৈব কৃপশ্চান্যে চ কৌরবাঃ

তে বয়ং ধৃতরাষ্ট্রস্য প্রেষয়ামো দুরাত্মনঃ
সংবৃত্তস্তে পরঃ কামঃ পাণ্ডবান্দগ্ধবানসি

ততো ব্যপোহমানাস্তে পাণ্ডবার্থে হুতাশনম্
নিষাদীং দদৃশুর্দগ্ধাং পঞ্চপুত্রামনাগসম্

খনকেন তু তেনৈব বেশ্ম শোধয়তা বিলম্
পাংসুভিঃ প্রত্যপিহিতং পুরুষৈস্তৈরলক্ষিতম্

ততস্তে প্রেষয়ামাসুর্ধৃতরাষ্ট্রস্য নাগরাঃ
পাণ্ডবানগ্নিনা দগ্ধানমাত্যং চ পুরোচনম্

শ্রুত্বা তু ধৃতরাষ্ট্রস্তদ্রাজা সুমহদপ্রিয়ম্
বিনাশং পাণ্ডুপুত্রাণাং বিললাপ সুদুঃখিতঃ

অদ্য পাণ্ডুর্মৃতো রাজা ভ্রাতা মম সুদুর্লভঃ
তেষু বীরেষু দগ্ধেষু মাত্রা সহ বিশেষতঃ

গচ্ছন্তু পুরুষাঃ শীঘ্রং নগরং বারণাবতম্
সত্কারয়ন্তু তান্বীরান্কুন্তিরাজসুতাং চ তাম্

কারয়ন্তু চ কুল্যানি শুভ্রাণি চ মহান্তি চ
যে চ তত্র মৃতাস্তেষাং সুহৃদোঽর্চন্তু তানপি

এবংগতে ময়া শক্যং যদ্যত্কারয়িতুং হিতম্
পাণ্ডবানাং চ কুন্ত্যাশ্চ তত্সর্বং ক্রিয়তাং ধনৈঃ

এবমুক্ত্বা ততশ্চক্রে জ্ঞাতিভিঃ পরিবারিতঃ
উদকং পাণ্ডুপুত্রাণাং ধৃতরাষ্ট্রোঽম্বিকাসুতঃ

চুক্রুশুঃ কৌরবাঃ সর্বে ভৃশং শোকপরায়ণাঃ
বিদুরস্ত্বল্পশশ্চক্রে শোকং বেদ পরং হি সঃ

পাণ্ডবাশ্চাপি নির্গত্য নগরাদ্বারণাবতাৎ
জবেন প্রয়য়ূ রাজন্দক্ষিণাং দিশমাশ্রিতাঃ

বিজ্ঞায় নিশি পন্থানং নক্ষত্রৈর্দক্ষিণামুখাঃ
যতমানা বনং রাজন্গহনং প্রতিপেদিরে

ততঃ শ্রান্তাঃ পিপাসার্তা নিদ্রান্ধাঃ পাণ্ডুনন্দনাঃ
পুনরূচুর্মহাবীর্যং ভীমসেনমিদং বচঃ

ইতঃ কষ্টতরং কিং নু যদ্বয়ং গহনে বনে
দিশশ্চ ন প্রজানীমো গন্তুং চৈব ন শক্নুমঃ

তং চ পাপং ন জানীমো যদি দগ্ধঃ পুরোচনঃ
কথং নু বিপ্রমুচ্যেম ভয়াদস্মাদলক্ষিতাঃ

পুনরস্মানুপাদায় তথৈব ব্রজ ভারত
ত্বং হি নো বলবানেকো যথা সততগস্তথা

ইত্যুক্তো ধর্মরাজেন ভীমসেনো মহাবলঃ
আদায় কুন্তীং ভ্রাতৄংশ্চ জগামাশু মহাবলঃ