অধ্যায় 136

136.1

বৈশংপায়ন উবাচ
তাংস্তু দৃষ্ট্বা সুমনসঃ পরিসংবত্সরোষিতান্
বিশ্বস্তানিব সংলক্ষ্য হর্ষং চক্রে পুরোচনঃ

পুরোচনে তথা হৃষ্টে কৌন্তেয়োঽথ যুধিষ্ঠিরঃ
ভীমসেনার্জুনৌ চৈব যমৌ চোবাচ ধর্মবিৎ

অস্মানয়ং সুবিশ্বস্তান্বেত্তি পাপঃ পুরোচনঃ
বঞ্চিতোঽয়ং নৃশংসাত্মা কালং মন্যে পলায়নে

আয়ুধাগারমাদীপ্য দগ্ধ্বা চৈব পুরোচনম্
ষট্প্রাণিনো নিধায়েহ দ্রবামোঽনভিলক্ষিতাঃ

অথ দানাপদেশেন কুন্তী ব্রাহ্মণভোজনম্
চক্রে নিশি মহদ্রাজন্নাজগ্মুস্তত্র যোষিতঃ

তা বিহৃত্য যথাকামং ভুক্ত্বা পীত্বা চ ভারত
জগ্মুর্নিশি গৃহানেব সমনুজ্ঞাপ্য মাধবীম্

নিষাদী পঞ্চপুত্রা তু তস্মিন্ভোজ্যে যদৃচ্ছয়া
অন্নার্থিনী সমভ্যাগাত্সপুত্রা কালচোদিতা

সা পীত্বা মদিরাং মত্তা সপুত্রা মদবিহ্বলা
সহ সর্বৈঃ সুতৈ রাজংস্তস্মিন্নেব নিবেশনে
সুষ্বাপ বিগতজ্ঞানা মৃতকল্পা নরাধিপ

অথ প্রবাতে তুমুলে নিশি সুপ্তে জনে বিভো
তদুপাদীপয়দ্ভীমঃ শেতে যত্র পুরোচনঃ

ততঃ প্রতাপঃ সুমহাঞ্শব্দশ্চৈব বিভাবসোঃ
প্রাদুরাসীত্তদা তেন বুবুধে স জনব্রজঃ

পৌরা ঊচুঃ
দুর্যোধনপ্রয়ুক্তেন পাপেনাকৃতবুদ্ধিনা
গৃহমাত্মবিনাশায় কারিতং দাহিতং চ যৎ

অহো ধিগ্ধৃতরাষ্ট্রস্য বুদ্ধির্নাতিসমঞ্জসী
যঃ শুচীন্পাণ্ডবান্বালান্দাহয়ামাস মন্ত্রিণা

দিষ্ট্যা ত্বিদানীং পাপাত্মা দগ্ধোঽয়মতিদুর্মতিঃ
অনাগসঃ সুবিশ্বস্তান্যো দদাহ নরোত্তমান্

বৈশংপায়ন উবাচ
এবং তে বিলপন্তি স্ম বারণাবতকা জনাঃ
পরিবার্য গৃহং তচ্চ তস্থূ রাত্রৌ সমন্ততঃ

পাণ্ডবাশ্চাপি তে রাজন্মাত্রা সহ সুদুঃখিতাঃ
বিলেন তেন নির্গত্য জগ্মুর্গূঢমলক্ষিতাঃ

তেন নিদ্রোপরোধেন সাধ্বসেন চ পাণ্ডবাঃ
ন শেকুঃ সহসা গন্তুং সহ মাত্রা পরংতপাঃ

ভীমসেনস্তু রাজেন্দ্র ভীমবেগপরাক্রমঃ
জগাম ভ্রাতৄনাদায় সর্বান্মাতরমেব চ

স্কন্ধমারোপ্য জননীং যমাবঙ্কেন বীর্যবান্
পার্থৌ গৃহীত্বা পাণিভ্যাং ভ্রাতরৌ সুমহাবলৌ

তরসা পাদপান্ভঞ্জন্মহীং পদ্ভ্যাং বিদারয়ন্
স জগামাশু তেজস্বী বাতরংহা বৃকোদরঃ