অধ্যায় 135

135.1

বৈশংপায়ন উবাচ
বিদুরস্য সুহৃত্কশ্চিত্খনকঃ কুশলঃ ক্বচিৎ
বিবিক্তে পাণ্ডবান্রাজন্নিদং বচনমব্রবীৎ

প্রহিতো বিদুরেণাস্মি খনকঃ কুশলো ভৃশম্
পাণ্ডবানাং প্রিয়ং কার্যমিতি কিং করবাণি বঃ

প্রচ্ছন্নং বিদুরেণোক্তঃ শ্রেয়স্ত্বমিহ পাণ্ডবান্
প্রতিপাদয় বিশ্বাসাদিতি কিং করবাণি বঃ

কৃষ্ণপক্ষে চতুর্দশ্যাং রাত্রাবস্য পুরোচনঃ
ভবনস্য তব দ্বারি প্রদাস্যতি হুতাশনম্

মাত্রা সহ প্রদগ্ধব্যাঃ পাণ্ডবাঃ পুরুষর্ষভাঃ
ইতি ব্যবসিতং পার্থ ধার্তরাষ্ট্রস্য মে শ্রুতম্

কিংচিচ্চ বিদুরেণোক্তো ম্লেচ্ছবাচাসি পাণ্ডব
ত্বয়া চ তত্তথেত্যুক্তমেতদ্বিশ্বাসকারণম্

উবাচ তং সত্যধৃতিঃ কুন্তীপুত্রো যুধিষ্ঠিরঃ
অভিজানামি সৌম্য ত্বাং সুহৃদং বিদুরস্য বৈ

শুচিমাপ্তং প্রিয়ং চৈব সদা চ দৃঢভক্তিকম্
ন বিদ্যতে কবেঃ কিংচিদভিজ্ঞানপ্রয়োজনম্

যথা নঃ স তথা নস্ত্বং নির্বিশেষা বয়ং ত্বয়ি
ভবতঃ স্ম যথা তস্য পালয়াস্মান্যথা কবিঃ

ইদং শরণমাগ্নেয়ং মদর্থমিতি মে মতিঃ
পুরোচনেন বিহিতং ধার্তরাষ্ট্রস্য শাসনাৎ

স পাপঃ কোশবাংশ্চৈব সসহায়শ্চ দুর্মতিঃ
অস্মানপি চ দুষ্টাত্মা নিত্যকালং প্রবাধতে

স ভবান্মোক্ষয়ত্বস্মান্যত্নেনাস্মাদ্ধুতাশনাৎ
অস্মাস্বিহ হি দগ্ধেষু সকামঃ স্যাত্সুয়োধনঃ

সমৃদ্ধমায়ুধাগারমিদং তস্য দুরাত্মনঃ
বপ্রান্তে নিষ্প্রতীকারমাশ্লিষ্যেদং কৃতং মহৎ

ইদং তদশুভং নূনং তস্য কর্ম চিকীর্ষিতম্
প্রাগেব বিদুরো বেদ তেনাস্মানন্ববোধয়ৎ

সেয়মাপদনুপ্রাপ্তা ক্ষত্তা যাং দৃষ্টবান্পুরা
পুরোচনস্যাবিদিতানস্মাংস্ত্বং বিপ্রমোচয়

স তথেতি প্রতিশ্রুত্য খনকো যত্নমাস্থিতঃ
পরিখামুত্কিরন্নাম চকার সুমহদ্বিলম্

চক্রে চ বেশ্মনস্তস্য মধ্যে নাতিমহন্মুখম্
কপাটয়ুক্তমজ্ঞাতং সমং ভূম্যা চ ভারত

পুরোচনভয়াচ্চৈব ব্যদধাত্সংবৃতং মুখম্
স তত্র চ গৃহদ্বারি বসত্যশুভধীঃ সদা

তত্র তে সায়ুধাঃ সর্বে বসন্তি স্ম ক্ষপাং নৃপ
দিবা চরন্তি মৃগয়াং পাণ্ডবেয়া বনাদ্বনম্

বিশ্বস্তবদবিশ্বস্তা বঞ্চয়ন্তঃ পুরোচনম্
অতুষ্টাস্তুষ্টবদ্রাজন্নূষুঃ পরমদুঃখিতাঃ

ন চৈনানন্ববুধ্যন্ত নরা নগরবাসিনঃ
অন্যত্র বিদুরামাত্যাত্তস্মাত্খনকসত্তমাৎ