Utshovঅধ্যায় 134
134.1
বৈশংপায়ন উবাচ
ততঃ সর্বাঃ প্রকৃতয়ো নগরাদ্বারণাবতাৎ
সর্বমঙ্গলসংয়ুক্তা যথাশাস্ত্রমতন্দ্রিতাঃ
134.2
শ্রুত্বাগতান্পাণ্ডুপুত্রান্নানায়ানৈঃ সহস্রশঃ
অভিজগ্মুর্নরশ্রেষ্ঠাঞ্শ্রুত্বৈব পরয়া মুদা
134.3
তে সমাসাদ্য কৌন্তেয়ান্বারণাবতকা জনাঃ
কৃত্বা জয়াশিষঃ সর্বে পরিবার্যোপতস্থিরে
134.4
তৈর্বৃতঃ পুরুষব্যাঘ্রো ধর্মরাজো যুধিষ্ঠিরঃ
বিবভৌ দেবসংকাশো বজ্রপাণিরিবামরৈঃ
134.5
সত্কৃতাস্তে তু পৌরৈশ্চ পৌরান্সত্কৃত্য চানঘাঃ
অলংকৃতং জনাকীর্ণং বিবিশুর্বারণাবতম্
134.6
তে প্রবিশ্য পুরং বীরাস্তূর্ণং জগ্মুরথো গৃহান্
ব্রাহ্মণানাং মহীপাল রতানাং স্বেষু কর্মসু
134.7
নগরাধিকৃতানাং চ গৃহাণি রথিনাং তথা
উপতস্থুর্নরশ্রেষ্ঠা বৈশ্যশূদ্রগৃহানপি
134.8
অর্চিতাশ্চ নরৈঃ পৌরৈঃ পাণ্ডবা ভরতর্ষভাঃ
জগ্মুরাবসথং পশ্চাত্পুরোচনপুরস্কৃতাঃ
134.9
তেভ্যো ভক্ষ্যান্নপানানি শয়নানি শুভানি চ
আসনানি চ মুখ্যানি প্রদদৌ স পুরোচনঃ
134.10
তত্র তে সত্কৃতাস্তেন সুমহার্হপরিচ্ছদাঃ
উপাস্যমানাঃ পুরুষৈরূষুঃ পুরনিবাসিভিঃ
134.11
দশরাত্রোষিতানাং তু তত্র তেষাং পুরোচনঃ
নিবেদয়ামাস গৃহং শিবাখ্যমশিবং তদা
134.12
তত্র তে পুরুষব্যাঘ্রা বিবিশুঃ সপরিচ্ছদাঃ
পুরোচনস্য বচনাত্কৈলাসমিব গুহ্যকাঃ
134.13
তত্ত্বগারমভিপ্রেক্ষ্য সর্বধর্মবিশারদঃ
উবাচাগ্নেয়মিত্যেবং ভীমসেনং যুধিষ্ঠিরঃ
জিঘ্রন্সোম্য বসাগন্ধং সর্পির্জতুবিমিশ্রিতম্
134.14
কৃতং হি ব্যক্তমাগ্নেয়মিদং বেশ্ম পরংতপ
শণসর্জরসং ব্যক্তমানীতং গৃহকর্মণি
মুঞ্জবল্বজবংশাদি দ্রব্যং সর্বং ঘৃতোক্ষিতম্
134.15
শিল্পিভিঃ সুকৃতং হ্যাপ্তৈর্বিনীতৈর্বেশ্মকর্মণি
বিশ্বস্তং মাময়ং পাপো দগ্ধুকামঃ পুরোচনঃ
134.16
ইমাং তু তাং মহাবুদ্ধির্বিদুরো দৃষ্টবাংস্তদা
আপদং তেন মাং পার্থ স সংবোধিতবান্পুরা
134.17
তে বয়ং বোধিতাস্তেন বুদ্ধবন্তোঽশিবং গৃহম্
আচার্যৈঃ সুকৃতং গূঢৈর্দুর্যোধনবশানুগৈঃ
134.18
ভীম উবাচ
যদিদং গৃহমাগ্নেয়ং বিহিতং মন্যতে ভবান্
তত্রৈব সাধু গচ্ছামো যত্র পূর্বোষিতা বয়ম্
134.19
যুধিষ্ঠির উবাচ
ইহ যত্তৈর্নিরাকারৈর্বস্তব্যমিতি রোচয়ে
নষ্টৈরিব বিচিন্বদ্ভির্গতিমিষ্টাং ধ্রুবামিতঃ
134.20
যদি বিন্দেত চাকারমস্মাকং হি পুরোচনঃ
শীঘ্রকারী ততো ভূত্বা প্রসহ্যাপি দহেত নঃ
134.21
নায়ং বিভেত্যুপক্রোশাদধর্মাদ্বা পুরোচনঃ
তথা হি বর্ততে মন্দঃ সুয়োধনমতে স্থিতঃ
134.22
অপি চেহ প্রদগ্ধেষু ভীষ্মোঽস্মাসু পিতামহঃ
কোপং কুর্যাত্কিমর্থং বা কৌরবান্কোপয়েত সঃ
ধর্ম ইত্যেব কুপ্যেত তথান্যে কুরুপুংগবাঃ
134.23
বয়ং তু যদি দাহস্য বিভ্যতঃ প্রদ্রবেম হি
স্পশৈর্নো ঘাতয়েত্সার্বান্রাজ্যলুব্ধঃ সুয়োধনঃ
134.24
অপদস্থান্পদে তিষ্ঠন্নপক্ষান্পক্ষসংস্থিতঃ
হীনকোশান্মহাকোশঃ প্রয়োগৈর্ঘাতয়েদ্ধ্রুবম্
134.25
তদস্মাভিরিমং পাপং তং চ পাপং সুয়োধনম্
বঞ্চয়দ্ভির্নিবস্তব্যং ছন্নবাসং ক্বচিত্ক্বচিৎ
134.26
তে বয়ং মৃগয়াশীলাশ্চরাম বসুধামিমাম্
তথা নো বিদিতা মার্গা ভবিষ্যন্তি পলায়তাম্
134.27
ভৌমং চ বিলমদ্যৈব করবাম সুসংবৃতম্
গূঢোচ্ছ্বসান্ন নস্তত্র হুতাশঃ সংপ্রধক্ষ্যতি
134.28
বসতোঽত্র যথা চাস্মান্ন বুধ্যেত পুরোচনঃ
পৌরো বাপি জনঃ কশ্চিত্তথা কার্যমতন্দ্রিতৈঃ