Utshovঅধ্যায় 133
133.1
বৈশংপায়ন উবাচ
পাণ্ডবাস্তু রথান্যুক্ত্বা সদশ্বৈরনিলোপমৈঃ
আরোহমাণা ভীষ্মস্য পাদৌ জগৃহুরার্তবৎ
133.2
রাজ্ঞশ্চ ধৃতরাষ্ট্রস্য দ্রোণস্য চ মহাত্মনঃ
অন্যেষাং চৈব বৃদ্ধানাং বিদুরস্য কৃপস্য চ
133.3
এবং সর্বান্কুরূন্বৃদ্ধানভিবাদ্য যতব্রতাঃ
সমালিঙ্গ্য সমানাংশ্চ বালৈশ্চাপ্যভিবাদিতাঃ
133.4
সর্বা মাতৄস্তথাপৃষ্ট্বা কৃত্বা চৈব প্রদক্ষিণম্
সর্বাঃ প্রকৃতয়শ্চৈব প্রয়য়ুর্বারণাবতম্
133.5
বিদুরশ্চ মহাপ্রাজ্ঞস্তথান্যে কুরুপুংগবাঃ
পৌরাশ্চ পুরুষব্যাঘ্রানন্বয়ুঃ শোককর্শিতাঃ
133.6
তত্র কেচিদ্ব্রুবন্তি স্ম ব্রাহ্মণা নির্ভয়াস্তদা
শোচমানাঃ পাণ্ডুপুত্রানতীব ভরতর্ষভ
133.7
বিষমং পশ্যতে রাজা সর্বথা তমসাবৃতঃ
ধৃতরাষ্ট্রঃ সুদুর্বুদ্ধির্ন চ ধর্মং প্রপশ্যতি
133.8
ন হি পাপমপাপাত্মা রোচয়িষ্যতি পাণ্ডবঃ
ভীমো বা বলিনাং শ্রেষ্ঠঃ কৌন্তেয়ো বা ধনংজয়ঃ
কুত এব মহাপ্রাজ্ঞৌ মাদ্রীপুত্রৌ করিষ্যতঃ
133.9
তদ্রাজ্যং পিতৃতঃ প্রাপ্তং ধৃতরাষ্ট্রো ন মৃষ্যতে
অধর্মমখিলং কিং নু ভীষ্মোঽয়মনুমন্যতে
বিবাস্যমানানস্থানে কৌন্তেয়ান্ভরতর্ষভান্
133.10
পিতেব হি নৃপোঽস্মাকমভূচ্ছাংতনবঃ পুরা
বিচিত্রবীর্যো রাজর্ষিঃ পাণ্ডুশ্চ কুরুনন্দনঃ
133.11
স তস্মিন্পুরুষব্যাঘ্রে দিষ্টভাবং গতে সতি
রাজপুত্রানিমান্বালান্ধৃতরাষ্ট্রো ন মৃষ্যতে
133.12
বয়মেতদমৃষ্যন্তঃ সর্ব এব পুরোত্তমাৎ
গৃহান্বিহায় গচ্ছামো যত্র যাতি যুধিষ্ঠিরঃ
133.13
তাংস্তথাবাদিনঃ পৌরান্দুঃখিতান্দুঃখকর্শিতঃ
উবাচ পরমপ্রীতো ধর্মরাজো যুধিষ্ঠিরঃ
133.14
পিতা মান্যো গুরুঃ শ্রেষ্ঠো যদাহ পৃথিবীপতিঃ
অশঙ্কমানৈস্তত্কার্যমস্মাভিরিতি নো ব্রতম্
133.15
ভবন্তঃ সুহৃদোঽস্মাকমস্মান্কৃত্বা প্রদক্ষিণম্
আশীর্ভিরভিনন্দ্যাস্মান্নিবর্তধ্বং যথাগৃহম্
133.16
যদা তু কার্যমস্মাকং ভবদ্ভিরুপপত্স্যতে
তদা করিষ্যথ মম প্রিয়াণি চ হিতানি চ
133.17
তে তথেতি প্রতিজ্ঞায় কৃত্বা চৈতান্প্রদক্ষিণম্
আশীর্ভিরভিনন্দ্যৈনাঞ্জগ্মুর্নগরমেব হি
133.18
পৌরেষু তু নিবৃত্তেষু বিদুরঃ সর্বধর্মবিৎ
বোধয়ন্পাণ্ডবশ্রেষ্ঠমিদং বচনমব্রবীৎ
প্রাজ্ঞঃ প্রাজ্ঞং প্রলাপজ্ঞঃ সম্যগ্ধর্মার্থদর্শিবান্
133.19
বিজ্ঞায়েদং তথা কুর্যাদাপদং নিস্তরেদ্যথা
অলোহং নিশিতং শস্ত্রং শরীরপরিকর্তনম্
যো বেত্তি ন তমাঘ্নন্তি প্রতিঘাতবিদং দ্বিষঃ
133.20
কক্ষঘ্নঃ শিশিরঘ্নশ্চ মহাকক্ষে বিলৌকসঃ
ন দহেদিতি চাত্মানং যো রক্ষতি স জীবতি
133.21
নাচক্ষুর্বেত্তি পন্থানং নাচক্ষুর্বিন্দতে দিশঃ
নাধৃতির্ভূতিমাপ্নোতি বুধ্যস্বৈবং প্রবোধিতঃ
133.22
অনাপ্তৈর্দত্তমাদত্তে নরঃ শস্ত্রমলোহজম্
শ্বাবিচ্ছরণমাসাদ্য প্রমুচ্যেত হুতাশনাৎ
133.23
চরন্মার্গান্বিজানাতি নক্ষত্রৈর্বিন্দতে দিশঃ
আত্মনা চাত্মনঃ পঞ্চ পীডয়ন্নানুপীড্যতে
133.24
অনুশিষ্ট্বানুগত্বা চ কৃত্বা চৈনান্প্রদক্ষিণম্
পাণ্ডবানভ্যনুজ্ঞায় বিদুরঃ প্রয়য়ৌ গৃহান্
133.25
নিবৃত্তে বিদুরে চৈব ভীষ্মে পৌরজনে তথা
অজাতশত্রুমামন্ত্র্য কুন্তী বচনমব্রবীৎ
133.26
ক্ষত্তা যদব্রবীদ্বাক্যং জনমধ্যেঽব্রুবন্নিব
ত্বয়া চ তত্তথেত্যুক্তো জানীমো ন চ তদ্বয়ম্
133.27
যদি তচ্ছক্যমস্মাভিঃ শ্রোতুং ন চ সদোষবৎ
শ্রোতুমিচ্ছামি তত্সর্বং সংবাদং তব তস্য চ
133.28
যুধিষ্ঠির উবাচ
বিষাদগ্নেশ্চ বোদ্ধব্যমিতি মাং বিদুরোঽব্রবীৎ
পন্থাশ্চ বো নাবিদিতঃ কশ্চিত্স্যাদিতি চাব্রবীৎ
133.29
জিতেন্দ্রিয়শ্চ বসুধাং প্রাপ্স্যসীতি চ মাব্রবীৎ
বিজ্ঞাতমিতি তত্সর্বমিত্যুক্তো বিদুরো ময়া
133.30
বৈশংপায়ন উবাচ
অষ্টমেঽহনি রোহিণ্যাং প্রয়াতাঃ ফল্গুনস্য তে
বারণাবতমাসাদ্য দদৃশুর্নাগরং জনম্