অধ্যায় 132

132.1

বৈশংপায়ন উবাচ
এবমুক্তেষু রাজ্ঞা তু পাণ্ডবেষু মহাত্মসু
দুর্যোধনঃ পরং হর্ষমাজগাম দুরাত্মবান্

স পুরোচনমেকান্তমানীয় ভরতর্ষভ
গৃহীত্বা দক্ষিণে পাণৌ সচিবং বাক্যমব্রবীৎ

মমেয়ং বসুসংপূর্ণা পুরোচন বসুংধরা
যথেয়ং মম তদ্বত্তে স তাং রক্ষিতুমর্হসি

ন হি মে কশ্চিদন্যোঽস্তি বৈশ্বাসিকতরস্ত্বয়া
সহায়ো যেন সংধায় মন্ত্রয়েয়ং যথা ত্বয়া

সংরক্ষ তাত মন্ত্রং চ সপত্নাংশ্চ মমোদ্ধর
নিপুণেনাভ্যুপায়েন যদ্ব্রবীমি তথা কুরু

পাণ্ডবা ধৃতরাষ্ট্রেণ প্রেষিতা বারণাবতম্
উত্সবে বিহরিষ্যন্তি ধৃতরাষ্ট্রস্য শাসনাৎ

স ত্বং রাসভয়ুক্তেন স্যন্দনেনাশুগামিনা
বারণাবতমদ্যৈব যথা যাসি তথা কুরু

তত্র গত্বা চতুঃশালং গৃহং পরমসংবৃতম্
আয়ুধাগারমাশ্রিত্য কারয়েথা মহাধনম্

শণসর্জরসাদীনি যানি দ্রব্যাণি কানিচিৎ
আগ্নেয়ান্যুত সন্তীহ তানি সর্বাণি দাপয়

সর্পিষা চ সতৈলেন লাক্ষয়া চাপ্যনল্পয়া
মৃত্তিকাং মিশ্রয়িত্বা ত্বং লেপং কুড্যেষু দাপয়েঃ

শণান্বংশং ঘৃতং দারু যন্ত্রাণি বিবিধানি চ
তস্মিন্বেশ্মনি সর্বাণি নিক্ষিপেথাঃ সমন্ততঃ

যথা চ ত্বাং ন শঙ্কেরন্পরীক্ষন্তোঽপি পাণ্ডবাঃ
আগ্নেয়মিতি তত্কার্যমিতি চান্যে চ মানবাঃ

বেশ্মন্যেবং কৃতে তত্র কৃত্বা তান্পরমার্চিতান্
বাসয়েঃ পাণ্ডবেয়াংশ্চ কুন্তীং চ সসুহৃজ্জনাম্

তত্রাসনানি মুখ্যানি যানানি শয়নানি চ
বিধাতব্যানি পাণ্ডূনাং যথা তুষ্যেত মে পিতা

যথা রমেরন্বিশ্রব্ধা নগরে বারণাবতে
তথা সর্বং বিধাতব্যং যাবত্কালস্য পর্যয়ঃ

জ্ঞাত্বা তু তান্সুবিশ্বস্তাঞ্শয়ানানকুতোভয়ান্
অগ্নিস্ততস্ত্বয়া দেয়ো দ্বারতস্তস্য বেশ্মনঃ

দগ্ধানেবং স্বকে গেহে দগ্ধা ইতি ততো জনাঃ
জ্ঞাতয়ো বা বদিষ্যন্তি পাণ্ডবার্থায় কর্হিচিৎ

তত্তথেতি প্রতিজ্ঞায় কৌরবায় পুরোচনঃ
প্রায়াদ্রাসভয়ুক্তেন নগরং বারণাবতম্

স গত্বা ত্বরিতো রাজন্দুর্যোধনমতে স্থিতঃ
যথোক্তং রাজপুত্রেণ সর্বং চক্রে পুরোচনঃ