Utshovঅধ্যায় 131
131.1
বৈশংপায়ন উবাচ
ততো দুর্যোধনো রাজা সর্বাস্তাঃ প্রকৃতীঃ শনৈঃ
অর্থমানপ্রদানাভ্যাং সংজহার সহানুজঃ
131.2
ধৃতরাষ্ট্রপ্রয়ুক্তাস্তু কেচিত্কুশলমন্ত্রিণঃ
কথয়াং চক্রিরে রম্যং নগরং বারণাবতম্
131.3
অয়ং সমাজঃ সুমহান্রমণীয়তমো ভুবি
উপস্থিতঃ পশুপতের্নগরে বারণাবতে
131.4
সর্বরত্নসমাকীর্ণে পুংসাং দেশে মনোরমে
ইত্যেবং ধৃতরাষ্ট্রস্য বচনাচ্চক্রিরে কথাঃ
131.5
কথ্যমানে তথা রম্যে নগরে বারণাবতে
গমনে পাণ্ডুপুত্রাণাং জজ্ঞে তত্র মতির্নৃপ
131.6
যদা ত্বমন্যত নৃপো জাতকৌতূহলা ইতি
উবাচৈনানথ তদা পাণ্ডবানম্বিকাসুতঃ
131.7
মমেমে পুরুষা নিত্যং কথয়ন্তি পুনঃ পুনঃ
রমণীয়তরং লোকে নগরং বারণাবতম্
131.8
তে তাত যদি মন্যধ্বমুত্সবং বারণাবতে
সগণাঃ সানুয়াত্রাশ্চ বিহরধ্বং যথামরাঃ
131.9
ব্রাহ্মণেভ্যশ্চ রত্নানি গায়নেভ্যশ্চ সর্বশঃ
প্রয়চ্ছধ্বং যথাকামং দেবা ইব সুবর্চসঃ
131.10
কংচিত্কালং বিহৃত্যৈবমনুভূয় পরাং মুদম্
ইদং বৈ হাস্তিনপুরং সুখিনঃ পুনরেষ্যথ
131.11
ধৃতরাষ্ট্রস্য তং কামমনুবুদ্ধ্বা যুধিষ্ঠিরঃ
আত্মনশ্চাসহায়ত্বং তথেতি প্রত্যুবাচ তম্
131.12
ততো ভীষ্মং মহাপ্রাজ্ঞং বিদুরং চ মহামতিম্
দ্রোণং চ বাহ্লিকং চৈব সোমদত্তং চ কৌরবম্
131.13
কৃপমাচার্যপুত্রং চ গান্ধারীং চ যশস্বিনীম্
যুধিষ্ঠিরঃ শনৈর্দীনমুবাচেদং বচস্তদা
131.14
রমণীয়ে জনাকীর্ণে নগরে বারণাবতে
সগণাস্তাত বত্স্যামো ধৃতরাষ্ট্রস্য শাসনাৎ
131.15
প্রসন্নমনসঃ সর্বে পুণ্যা বাচো বিমুঞ্চত
আশীর্ভির্বর্ধিতানস্মান্ন পাপং প্রসহিষ্যতি
131.16
এবমুক্তাস্তু তে সর্বে পাণ্ডুপুত্রেণ কৌরবাঃ
প্রসন্নবদনা ভূত্বা তেঽভ্যবর্তন্ত পাণ্ডবান্
131.17
স্বস্ত্যস্তু বঃ পথি সদা ভূতেভ্যশ্চৈব সর্বশঃ
মা চ বোঽস্ত্বশুভং কিংচিত্সর্বতঃ পাণ্ডুনন্দনাঃ
131.18
ততঃ কৃতস্বস্ত্যয়না রাজ্যলাভায় পাণ্ডবাঃ
কৃত্বা সর্বাণি কার্যাণি প্রয়য়ুর্বারণাবতম্