অধ্যায় 130

130.1

বৈশংপায়ন উবাচ
ধৃতরাষ্ট্রস্তু পুত্রস্য শ্রুত্বা বচনমীদৃশম্
মুহূর্তমিব সংচিন্ত্য দুর্যোধনমথাব্রবীৎ

ধর্মনিত্যঃ সদা পাণ্ডুর্মমাসীত্প্রিয়কৃদ্ধিতঃ
সর্বেষু জ্ঞাতিষু তথা ময়ি ত্বাসীদ্বিশেষতঃ

নাস্য কিংচিন্ন জানামি ভোজনাদি চিকীর্ষিতম্
নিবেদয়তি নিত্যং হি মম রাজ্যং ধৃতব্রতঃ

তস্য পুত্রো যথা পাণ্ডুস্তথা ধর্মপরায়ণঃ
গুণবাঁল্লোকবিখ্যাতঃ পৌরাণাং চ সুসংমতঃ

স কথং শক্যমস্মাভিরপক্রষ্টুং বলাদিতঃ
পিতৃপৈতামহাদ্রাজ্যাত্সসহায়ো বিশেষতঃ

ভৃতা হি পাণ্ডুনামাত্যা বলং চ সততং ভৃতম্
ভৃতাঃ পুত্রাশ্চ পৌত্রাশ্চ তেষামপি বিশেষতঃ

তে পুরা সত্কৃতাস্তাত পাণ্ডুনা পৌরবা জনাঃ
কথং যুধিষ্ঠিরস্যার্থে ন নো হন্যুঃ সবান্ধবান্

দুর্যোধন উবাচ
এবমেতন্ময়া তাত ভাবিতং দোষমাত্মনি
দৃষ্ট্বা প্রকৃতয়ঃ সর্বা অর্থমানেন যোজিতাঃ

ধ্রুবমস্মত্সহায়াস্তে ভবিষ্যন্তি প্রধানতঃ
অর্থবর্গঃ সহামাত্যো মত্সংস্থোঽদ্য মহীপতে

স ভবান্পাণ্ডবানাশু বিবাসয়িতুমর্হতি
মৃদুনৈবাভ্যুপায়েন নগরং বারণাবতম্

যদা প্রতিষ্ঠিতং রাজ্যং ময়ি রাজন্ভবিষ্যতি
তদা কুন্তী সহাপত্যা পুনরেষ্যতি ভারত

ধৃতরাষ্ট্র উবাচ
দুর্যোধন মমাপ্যেতদ্ধৃদি সংপরিবর্ততে
অভিপ্রায়স্য পাপত্বান্নৈতত্তু বিবৃণোম্যহম্

ন চ ভীষ্মো ন চ দ্রোণো ন ক্ষত্তা ন চ গৌতমঃ
বিবাস্যমানান্কৌন্তেয়াননুমংস্যন্তি কর্হিচিৎ

সমা হি কৌরবেয়াণাং বয়মেতে চ পুত্রক
নৈতে বিষমমিচ্ছেয়ুর্ধর্ময়ুক্তা মনস্বিনঃ

তে বয়ং কৌরবেয়াণামেতেষাং চ মহাত্মনাম্
কথং ন বধ্যতাং তাত গচ্ছেম জগতস্তথা

দুর্যোধন উবাচ
মধ্যস্থঃ সততং ভীষ্মো দ্রোণপুত্রো ময়ি স্থিতঃ
যতঃ পুত্রস্ততো দ্রোণো ভবিতা নাত্র সাংশয়ঃ

কৃপঃ শারদ্বতশ্চৈব যত এতে ত্রয়স্ততঃ
দ্রোণং চ ভাগিনেয়ং চ ন স ত্যক্ষ্যতি কর্হিচিৎ

ক্ষত্তার্থবদ্ধস্ত্বস্মাকং প্রচ্ছন্নং তু যতঃ পরে
ন চৈকঃ স সমর্থোঽস্মান্পাণ্ডবার্থে প্রবাধিতুম্

স বিশ্রব্ধঃ পাণ্ডুপুত্রান্সহ মাত্রা বিবাসয়
বারণাবতমদ্যৈব নাত্র দোষো ভবিষ্যতি

বিনিদ্রকরণং ঘোরং হৃদি শল্যমিবার্পিতম্
শোকপাবকমুদ্ভূতং কর্মণৈতেন নাশয়