অধ্যায় 129

129.1

বৈশংপায়ন উবাচ
প্রাণাধিকং ভীমসেনং কৃতবিদ্যং ধনংজয়ম্
দুর্যোধনো লক্ষয়িত্ব পর্যতপ্যত দুর্মতিঃ

ততো বৈকর্তনঃ কর্ণঃ শকুনিশ্চাপি সৌবলঃ
অনেকৈরভ্যুপায়ৈস্তাঞ্জিঘাংসন্তি স্ম পাণ্ডবান্

পাণ্ডবাশ্চাপি তত্সর্বং প্রত্যজানন্নরিংদমাঃ
উদ্ভাবনমকুর্বন্তো বিদুরস্য মতে স্থিতাঃ

গুণৈঃ সমুদিতান্দৃষ্ট্বা পৌরাঃ পাণ্ডুসুতাংস্তদা
কথয়ন্তি স্ম সংভূয় চত্বরেষু সভাসু চ

প্রজ্ঞাচক্ষুরচক্ষুষ্ট্বাদ্ধৃতরাষ্ট্রো জনেশ্বরঃ
রাজ্যমপ্রাপ্তবান্পূর্বং স কথং নৃপতির্ভবেৎ

তথা ভীষ্মঃ শাংতনবঃ সত্যসংধো মহাব্রতঃ
প্রত্যাখ্যায় পুরা রাজ্যং নাদ্য জাতু গ্রহীষ্যতি

তে বয়ং পাণ্ডবং জ্যেষ্ঠং তরুণং বৃদ্ধশীলিনম্
অভিষিঞ্চাম সাধ্বদ্য সত্যং করুণবেদিনম্

স হি ভীষ্মং শাংতনবং ধৃতরাষ্ট্রং চ ধর্মবিৎ
সপুত্রং বিবিধৈর্ভোগৈর্যোজয়িষ্যতি পূজয়ন্

তেষাং দুর্যোধনঃ শ্রুত্বা তানি বাক্যানি ভাষতাম্
যুধিষ্ঠিরানুরক্তানাং পর্যতপ্যত দুর্মতিঃ

স তপ্যমানো দুষ্টাত্মা তেষাং বাচো ন চক্ষমে
ঈর্ষ্যয়া চাভিসংতপ্তো ধৃতরাষ্ট্রমুপাগমৎ

ততো বিরহিতং দৃষ্ট্বা পিতরং প্রতিপূজ্য সঃ
পৌরানুরাগসংতপ্তঃ পশ্চাদিদমভাষত

শ্রুতা মে জল্পতাং তাত পৌরাণামশিবা গিরঃ
ত্বামনাদৃত্য ভীষ্মং চ পতিমিচ্ছন্তি পাণ্ডবম্

মতমেতচ্চ ভীষ্মস্য ন স রাজ্যং বুভূষতি
অস্মাকং তু পরাং পীডাং চিকীর্ষন্তি পুরে জনাঃ

পিতৃতঃ প্রাপ্তবান্রাজ্যং পাণ্ডুরাত্মগুণৈঃ পুরা
ত্বমপ্যগুণসংয়োগাত্প্রাপ্তং রাজ্যং ন লব্ধবান্

স এষ পাণ্ডোর্দায়াদ্যং যদি প্রাপ্নোতি পাণ্ডবঃ
তস্য পুত্রো ধ্রুবং প্রাপ্তস্তস্য তস্যেতি চাপরঃ

তে বয়ং রাজবংশেন হীনাঃ সহ সুতৈরপি
অবজ্ঞাতা ভবিষ্যামো লোকস্য জগতীপতে

সততং নিরয়ং প্রাপ্তাঃ পরপিণ্ডোপজীবিনঃ
ন ভবেম যথা রাজংস্তথা শীঘ্রং বিধীয়তাম্

অভবিষ্যঃ স্থিরো রাজ্যে যদি হি ত্বং পুরা নৃপ
ধ্রুবং প্রাপ্স্যাম চ বয়ং রাজ্যমপ্যবশে জনে