অধ্যায় 128

128.1

বৈশংপায়ন উবাচ
ততঃ শিষ্যান্সমানীয় আচার্যার্থমচোদয়ৎ
দ্রোণঃ সর্বানশেষেণ দক্ষিণার্থং মহীপতে

পাঞ্চালরাজং দ্রুপদং গৃহীত্বা রণমূর্ধনি
পর্যানয়ত ভদ্রং বঃ সা স্যাত্পরমদক্ষিণা

তথেত্যুক্ত্বা তু তে সর্বে রথৈস্তূর্ণং প্রহারিণঃ
আচার্যধনদানার্থং দ্রোণেন সহিতা যয়ুঃ

ততোঽভিজগ্মুঃ পাঞ্চালান্নিঘ্নন্তস্তে নরর্ষভাঃ
মমৃদুস্তস্য নগরং দ্রুপদস্য মহৌজসঃ

তে যজ্ঞসেনং দ্রুপদং গৃহীত্বা রণমূর্ধনি
উপাজহ্রুঃ সহামাত্যং দ্রোণায় ভরতর্ষভাঃ

ভগ্নদর্পং হৃতধনং তথা চ বশমাগতম্
স বৈরং মনসা ধ্যাত্বা দ্রোণো দ্রুপদমব্রবীৎ

প্রমৃদ্য তরসা রাষ্ট্রং পুরং তে মৃদিতং ময়া
প্রাপ্য জীবন্রিপুবশং সখিপূর্বং কিমিষ্যতে

এবমুক্ত্বা প্রহস্যৈনং নিশ্চিত্য পুনরব্রবীৎ
মা ভৈঃ প্রাণভয়াদ্রাজন্ক্ষমিণো ব্রাহ্মণা বয়ম্

আশ্রমে ক্রীডিতং যত্তু ত্বয়া বাল্যে ময়া সহ
তেন সংবর্ধিতঃ স্নেহস্ত্বয়া মে ক্ষত্রিয়র্ষভ

প্রার্থয়েয়ং ত্বয়া সখ্যং পুনরেব নরর্ষভ
বরং দদামি তে রাজন্রাজ্যস্যার্ধমবাপ্নুহি

অরাজা কিল নো রাজ্ঞাং সখা ভবিতুমর্হতি
অতঃ প্রয়তিতং রাজ্যে যজ্ঞসেন ময়া তব

রাজাসি দক্ষিণে কূলে ভাগীরথ্যাহমুত্তরে
সখায়ং মাং বিজানীহি পাঞ্চাল যদি মন্যসে

দ্রুপদ উবাচ
অনাশ্চর্যমিদং ব্রহ্মন্বিক্রান্তেষু মহাত্মসু
প্রীয়ে ত্বয়াহং ত্বত্তশ্চ প্রীতিমিচ্ছামি শাশ্বতীম্

বৈশংপায়ন উবাচ
এবমুক্তস্তু তং দ্রোণো মোক্ষয়ামাস ভারত
সত্কৃত্য চৈনং প্রীতাত্মা রাজ্যার্ধং প্রত্যপাদয়ৎ

মাকন্দীমথ গঙ্গায়াস্তীরে জনপদায়ুতাম্
সোঽধ্যাবসদ্দীনমনাঃ কাম্পিল্যং চ পুরোত্তমম্
দক্ষিণাংশ্চৈব পাঞ্চালান্যাবচ্চর্মণ্বতী নদী

দ্রোণেন বৈরং দ্রুপদঃ সংস্মরন্ন শশাম হ
ক্ষাত্রেণ চ বলেনাস্য নাপশ্যত্স পরাজয়ম্

হীনং বিদিত্বা চাত্মানং ব্রাহ্মণেন বলেন চ
পুত্রজন্ম পরীপ্সন্বৈ স রাজা তদধারয়ৎ
অহিচ্ছত্রং চ বিষয়ং দ্রোণঃ সমভিপদ্যত

এবং রাজন্নহিচ্ছত্রা পুরী জনপদায়ুতা
যুধি নির্জিত্য পার্থেন দ্রোণায় প্রতিপাদিতা