UtshovChapter 128
128.1
वैशंपायन उवाच
ततः शिष्यान्समानीय आचार्यार्थमचोदयत्
द्रोणः सर्वानशेषेण दक्षिणार्थं महीपते
Vaishampayana uvacha
Tatah shishyansamaniya acharyarthamachodayat
Dronah sarvanasheshena dakshinartham mahipate
128.2
पाञ्चालराजं द्रुपदं गृहीत्वा रणमूर्धनि
पर्यानयत भद्रं वः सा स्यात्परमदक्षिणा
Panchalarajam drupadam grihitva ranamurdhani
Paryanayata bhadram vah sa syatparamadakshina
128.3
तथेत्युक्त्वा तु ते सर्वे रथैस्तूर्णं प्रहारिणः
आचार्यधनदानार्थं द्रोणेन सहिता ययुः
Tathetyuktva tu te sarve rathaisturnam praharinah
Acharyadhanadanartham dronena sahita yayuh
128.4
ततोऽभिजग्मुः पाञ्चालान्निघ्नन्तस्ते नरर्षभाः
ममृदुस्तस्य नगरं द्रुपदस्य महौजसः
Tatobhijagmuh panchalannighnantaste nararshabhah
Mamridustasya nagaram drupadasya mahaujasah
128.5
ते यज्ञसेनं द्रुपदं गृहीत्वा रणमूर्धनि
उपाजह्रुः सहामात्यं द्रोणाय भरतर्षभाः
Te yagyasenam drupadam grihitva ranamurdhani
Upajahruh sahamatyam dronaya bharatarshabhah
128.6
भग्नदर्पं हृतधनं तथा च वशमागतम्
स वैरं मनसा ध्यात्वा द्रोणो द्रुपदमब्रवीत्
Bhagnadarpam hritadhanam tatha cha vashamagatam
Sa vairam manasa dhyatva drono drupadamabravit
128.7
प्रमृद्य तरसा राष्ट्रं पुरं ते मृदितं मया
प्राप्य जीवन्रिपुवशं सखिपूर्वं किमिष्यते
Pramridya tarasa rashtram puram te mriditam maya
Prapya jivanripuvasham sakhipurvam kimishyate
128.8
एवमुक्त्वा प्रहस्यैनं निश्चित्य पुनरब्रवीत्
मा भैः प्राणभयाद्राजन्क्षमिणो ब्राह्मणा वयम्
Evamuktva prahasyainam nishchitya punarabravit
Ma bhaih pranabhayadrajankshamino brahmana vayam
128.9
आश्रमे क्रीडितं यत्तु त्वया बाल्ये मया सह
तेन संवर्धितः स्नेहस्त्वया मे क्षत्रियर्षभ
Ashrame kriditam yattu tvaya balye maya saha
Tena sanvardhitah snehastvaya me kshatriyarshabha
128.10
प्रार्थयेयं त्वया सख्यं पुनरेव नरर्षभ
वरं ददामि ते राजन्राज्यस्यार्धमवाप्नुहि
Prarthayeyam tvaya sakhyam punareva nararshabha
Varam dadami te rajanrajyasyardhamavapnuhi
128.11
अराजा किल नो राज्ञां सखा भवितुमर्हति
अतः प्रयतितं राज्ये यज्ञसेन मया तव
Araja kila no ragyam sakha bhavitumarhati
Atah prayatitam rajye yagyasena maya tava
128.12
राजासि दक्षिणे कूले भागीरथ्याहमुत्तरे
सखायं मां विजानीहि पाञ्चाल यदि मन्यसे
Rajasi dakshine kule bhagirathyahamuttare
Sakhayam mam vijanihi panchala yadi manyase
128.13
द्रुपद उवाच
अनाश्चर्यमिदं ब्रह्मन्विक्रान्तेषु महात्मसु
प्रीये त्वयाहं त्वत्तश्च प्रीतिमिच्छामि शाश्वतीम्
Drupada uvacha
Anashcharyamidam brahmanvikranteshu mahatmasu
Priye tvayaham tvattashcha pritimichchhami shashvatim
128.14
वैशंपायन उवाच
एवमुक्तस्तु तं द्रोणो मोक्षयामास भारत
सत्कृत्य चैनं प्रीतात्मा राज्यार्धं प्रत्यपादयत्
Vaishampayana uvacha
Evamuktastu tam drono mokshayamasa bharata
Satkritya chainam pritatma rajyardham pratyapadayat
128.15
माकन्दीमथ गङ्गायास्तीरे जनपदायुताम्
सोऽध्यावसद्दीनमनाः काम्पिल्यं च पुरोत्तमम्
दक्षिणांश्चैव पाञ्चालान्यावच्चर्मण्वती नदी
Makandimatha gangayastire janapadayutam
Sodhyavasaddinamanah kampilyam cha purottamam
Dakshinanshchaiva panchalanyavachcharmanvati nadi
128.16
द्रोणेन वैरं द्रुपदः संस्मरन्न शशाम ह
क्षात्रेण च बलेनास्य नापश्यत्स पराजयम्
Dronena vairam drupadah sansmaranna shashama ha
Kshatrena cha balenasya napashyatsa parajayam
128.17
हीनं विदित्वा चात्मानं ब्राह्मणेन बलेन च
पुत्रजन्म परीप्सन्वै स राजा तदधारयत्
अहिच्छत्रं च विषयं द्रोणः समभिपद्यत
Hinam viditva chatmanam brahmanena balena cha
Putrajanma paripsanvai sa raja tadadharayat
Ahichchhatram cha vishayam dronah samabhipadyata
128.18
एवं राजन्नहिच्छत्रा पुरी जनपदायुता
युधि निर्जित्य पार्थेन द्रोणाय प्रतिपादिता
Evam rajannahichchhatra puri janapadayuta
Yudhi nirjitya parthena dronaya pratipadita