Utshovঅধ্যায় 127
127.1
বৈশংপায়ন উবাচ
ততঃ স্রস্তোত্তরপটঃ সপ্রস্বেদঃ সবেপথুঃ
বিবেশাধিরথো রঙ্গং যষ্টিপ্রাণো হ্বয়ন্নিব
127.2
তমালোক্য ধনুস্ত্যক্ত্বা পিতৃগৌরবয়ন্ত্রিতঃ
কর্ণোঽভিষেকার্দ্রশিরাঃ শিরসা সমবন্দত
127.3
ততঃ পাদাববচ্ছাদ্য পটান্তেন সসংভ্রমঃ
পুত্রেতি পরিপূর্ণার্থমব্রবীদ্রথসারথিঃ
127.4
পরিষ্বজ্য চ তস্যাথ মূর্ধানং স্নেহবিক্লবঃ
অঙ্গরাজ্যাভিষেকার্দ্রমশ্রুভিঃ সিষিচে পুনঃ
127.5
তং দৃষ্ট্বা সূতপুত্রোঽয়মিতি নিশ্চিত্য পাণ্ডবঃ
ভীমসেনস্তদা বাক্যমব্রবীত্প্রহসন্নিব
127.6
ন ত্বমর্হসি পার্থেন সূতপুত্র রণে বধম্
কুলস্য সদৃশস্তূর্ণং প্রতোদো গৃহ্যতাং ত্বয়া
127.7
অঙ্গরাজ্যং চ নার্হস্ত্বমুপভোক্তুং নরাধম
শ্বা হুতাশসমীপস্থং পুরোডাশমিবাধ্বরে
127.8
এবমুক্তস্ততঃ কর্ণঃ কিংচিত্প্রস্ফুরিতাধরঃ
গগনস্থং বিনিঃশ্বস্য দিবাকরমুদৈক্ষত
127.9
ততো দুর্যোধনঃ কোপাদুত্পপাত মহাবলঃ
ভ্রাতৃপদ্মবনাত্তস্মান্মদোত্কট ইব দ্বিপঃ
127.10
সোঽব্রবীদ্ভীমকর্মাণং ভীমসেনমবস্থিতম্
বৃকোদর ন যুক্তং তে বচনং বক্তুমীদৃশম্
127.11
ক্ষত্রিয়াণাং বলং জ্যেষ্ঠং যোদ্ধব্যং ক্ষত্রবন্ধুনা
শূরাণাং চ নদীনাং চ প্রভবা দুর্বিদাঃ কিল
127.12
সলিলাদুত্থিতো বহ্নির্যেন ব্যাপ্তং চরাচরম্
দধীচস্যাস্থিতো বজ্রং কৃতং দানবসূদনম্
127.13
আগ্নেয়ঃ কৃত্তিকাপুত্রো রৌদ্রো গাঙ্গেয় ইত্যপি
শ্রূয়তে ভগবান্দেবঃ সর্বগুহ্যময়ো গুহঃ
127.14
ক্ষত্রিয়াভ্যশ্চ যে জাতা ব্রাহ্মণাস্তে চ বিশ্রুতাঃ
আচার্যঃ কলশাজ্জাতঃ শরস্তম্বাদ্গুরুঃ কৃপঃ
ভবতাং চ যথা জন্ম তদপ্যাগমিতং নৃপৈঃ
127.15
সকুণ্ডলং সকবচং দিব্যলক্ষণলক্ষিতম্
কথমাদিত্যসংকাশং মৃগী ব্যাঘ্রং জনিষ্যতি
127.16
পৃথিবীরাজ্যমর্হোঽয়ং নাঙ্গরাজ্যং নরেশ্বরঃ
অনেন বাহুবীর্যেণ ময়া চাজ্ঞানুবর্তিনা
127.17
যস্য বা মনুজস্যেদং ন ক্ষান্তং মদ্বিচেষ্টিতম্
রথমারুহ্য পদ্ভ্যাং বা বিনাময়তু কার্মুকম্
127.18
ততঃ সর্বস্য রঙ্গস্য হাহাকারো মহানভূৎ
সাধুবাদানুসংবদ্ধঃ সূর্যশ্চাস্তমুপাগমৎ
127.19
ততো দুর্যোধনঃ কর্ণমালম্ব্যাথ করে নৃপ
দীপিকাগ্নিকৃতালোকস্তস্মাদ্রঙ্গাদ্বিনির্যয়ৌ
127.20
পাণ্ডবাশ্চ সহদ্রোণাঃ সকৃপাশ্চ বিশাং পতে
ভীষ্মেণ সহিতাঃ সর্বে যয়ুঃ স্বং স্বং নিবেশনম্
127.21
অর্জুনেতি জনঃ কশ্চিত্কশ্চিত্কর্ণেতি ভারত
কশ্চিদ্দুর্যোধনেত্যেবং ব্রুবন্তঃ প্রস্থিতাস্তদা
127.22
কুন্ত্যাশ্চ প্রত্যভিজ্ঞায় দিব্যলক্ষণসূচিতম্
পুত্রমঙ্গেশ্বরং স্নেহাচ্ছন্না প্রীতিরবর্ধত
127.23
দুর্যোধনস্যাপি তদা কর্ণমাসাদ্য পার্থিব
ভয়মর্জুনসাংজাতং ক্ষিপ্রমন্তরধীয়ত
127.24
স চাপি বীরঃ কৃতশস্ত্রনিশ্রমঃ; পরেণ সাম্নাভ্যবদত্সুয়োধনম্
যুধিষ্ঠিরস্যাপ্যভবত্তদা মতি;র্ন কর্ণতুল্যোঽস্তি ধনুর্ধরঃ ক্ষিতৌ