Utshovঅধ্যায় 126
126.1
বৈশংপায়ন উবাচ
দত্তেঽবকাশে পুরুষৈর্বিস্ময়োত্ফুল্ললোচনৈঃ
বিবেশ রঙ্গং বিস্তীর্ণং কর্ণঃ পরপুরংজয়ঃ
126.2
সহজং কবচং বিভ্রত্কুণ্ডলোদ্দ্যোতিতাননঃ
সধনুর্বদ্ধনিস্ত্রিংশঃ পাদচারীব পর্বতঃ
126.3
কন্যাগর্ভঃ পৃথুয়শাঃ পৃথায়াঃ পৃথুলোচনঃ
তীক্ষ্ণাংশোর্ভাস্করস্যাংশঃ কর্ণোঽরিগণসূদনঃ
126.4
সিংহর্ষভগজেন্দ্রাণাং তুল্যবীর্যপরাক্রমঃ
দীপ্তিকান্তিদ্যুতিগুণৈঃ সূর্যেন্দুজ্বলনোপমঃ
126.5
প্রাংশুঃ কনকতালাভঃ সিংহসংহননো যুবা
অসংখ্যেয়গুণঃ শ্রীমান্ভাস্করস্যাত্মসংভবঃ
126.6
স নিরীক্ষ্য মহাবাহুঃ সর্বতো রঙ্গমণ্ডলম্
প্রণামং দ্রোণকৃপয়োর্নাত্যাদৃতমিবাকরোৎ
126.7
স সামাজজনঃ সর্বো নিশ্চলঃ স্থিরলোচনঃ
কোঽয়মিত্যাগতক্ষোভঃ কৌতূহলপরোঽভবৎ
126.8
সোঽব্রবীন্মেঘধীরেণ স্বরেণ বদতাং বরঃ
ভ্রাতা ভ্রাতরমজ্ঞাতং সাবিত্রঃ পাকশাসনিম্
126.9
পার্থ যত্তে কৃতং কর্ম বিশেষবদহং ততঃ
করিষ্যে পশ্যতাং নৄণাং মাত্মনা বিস্ময়ং গমঃ
126.10
অসমাপ্তে ততস্তস্য বচনে বদতাং বর
যন্ত্রোত্ক্ষিপ্ত ইব ক্ষিপ্রমুত্তস্থৌ সর্বতো জনঃ
126.11
প্রীতিশ্চ পুরুষব্যাঘ্র দুর্যোধনমথাস্পৃশৎ
হ্রীশ্চ ক্রোধশ্চ বীভত্সুং ক্ষণেনান্ববিশচ্চ হ
126.12
ততো দ্রোণাভ্যনুজ্ঞাতঃ কর্ণঃ প্রিয়রণঃ সদা
যত্কৃতং তত্র পার্থেন তচ্চকার মহাবলঃ
126.13
অথ দুর্যোধনস্তত্র ভ্রাতৃভিঃ সহ ভারত
কর্ণং পরিষ্বজ্য মুদা ততো বচনমব্রবীৎ
126.14
স্বাগতং তে মহাবাহো দিষ্ট্যা প্রাপ্তোঽসি মানদ
অহং চ কুরুরাজ্যং চ যথেষ্টমুপভুজ্যতাম্
126.15
কর্ণ উবাচ
কৃতং সর্বেণ মেঽন্যেন সখিত্বং চ ত্বয়া বৃণে
দ্বন্দ্বয়ুদ্ধং চ পার্থেন কর্তুমিচ্ছামি ভারত
126.16
দুর্যোধন উবাচ
ভুঙ্ক্ষ্ব ভোগান্ময়া সার্ধং বন্ধূনাং প্রিয়কৃদ্ভব
দুর্হৃদাং কুরু সর্বেষাং মূর্ধ্নি পাদমরিংদম
126.17
বৈশংপায়ন উবাচ
ততঃ ক্ষিপ্তমিবাত্মানং মত্বা পার্থোঽভ্যভাষত
কর্ণং ভ্রাতৃসমূহস্য মধ্যেঽচলমিব স্থিতম্
126.18
অনাহূতোপসৃপ্তানামনাহূতোপজল্পিনাম্
যে লোকাস্তান্হতঃ কর্ণ ময়া ত্বং প্রতিপত্স্যসে
126.19
কর্ণ উবাচ
রঙ্গোঽয়ং সর্বসামান্যঃ কিমত্র তব ফল্গুন
বীর্যশ্রেষ্ঠাশ্চ রাজন্যা বলং ধর্মোঽনুবর্ততে
126.20
কিং ক্ষেপৈর্দুর্বলাশ্বাসৈঃ শরৈঃ কথয় ভারত
গুরোঃ সমক্ষং যাবত্তে হরাম্যদ্য শিরঃ শরৈঃ
126.21
বৈশংপায়ন উবাচ
ততো দ্রোণাভ্যনুজ্ঞাতঃ পার্থঃ পরপুরংজয়ঃ
ভ্রাতৃভিস্ত্বরয়াশ্লিষ্টো রণায়োপজগাম তম্
126.22
ততো দুর্যোধনেনাপি সভ্রাত্রা সমরোদ্যতঃ
পরিষ্বক্তঃ স্থিতঃ কর্ণঃ প্রগৃহ্য সশরং ধনুঃ
126.23
ততঃ সবিদ্যুত্স্তনিতৈঃ সেন্দ্রায়ুধপুরোজবৈঃ
আবৃতং গগনং মেঘৈর্বলাকাপঙ্ক্তিহাসিভিঃ
126.24
ততঃ স্নেহাদ্ধরিহয়ং দৃষ্ট্বা রঙ্গাবলোকিনম্
ভাস্করোঽপ্যনয়ন্নাশং সমীপোপগতান্ঘনান্
126.25
মেঘচ্ছায়োপগূঢস্তু ততোঽদৃশ্যত পাণ্ডবঃ
সূর্যাতপপরিক্ষিপ্তঃ কর্ণোঽপি সমদৃশ্যত
126.26
ধার্তরাষ্ট্রা যতঃ কর্ণস্তস্মিন্দেশে ব্যবস্থিতাঃ
ভারদ্বাজঃ কৃপো ভীষ্মো যতঃ পার্থস্ততোঽভবন্
126.27
দ্বিধা রঙ্গঃ সমভবত্স্ত্রীণাং দ্বৈধমজায়ত
কুন্তিভোজসুতা মোহং বিজ্ঞাতার্থা জগাম হ
126.28
তাং তথা মোহসংপন্নাং বিদুরঃ সর্বধর্মবিৎ
কুন্তীমাশ্বাসয়ামাস প্রোক্ষ্যাদ্ভিশ্চন্দনোক্ষিতৈঃ
126.29
ততঃ প্রত্যাগতপ্রাণা তাবুভাবপি দংশিতৌ
পুত্রৌ দৃষ্ট্বা সুসংতপ্তা নান্বপদ্যত কিংচন
126.30
তাবুদ্যতমহাচাপৌ কৃপঃ শারদ্বতোঽব্রবীৎ
দ্বন্দ্বয়ুদ্ধসমাচারে কুশলঃ সর্বধর্মবিৎ
126.31
অয়ং পৃথায়াস্তনয়ঃ কনীয়ান্পাণ্ডুনন্দনঃ
কৌরবো ভবতা সার্ধং দ্বন্দ্বয়ুদ্ধং করিষ্যতি
126.32
ত্বমপ্যেবং মহাবাহো মাতরং পিতরং কুলম্
কথয়স্ব নরেন্দ্রাণাং যেষাং ত্বং কুলবর্ধনঃ
ততো বিদিত্বা পার্থস্ত্বাং প্রতিয়োত্স্যতি বা ন বা
126.33
এবমুক্তস্য কর্ণস্য ব্রীডাবনতমাননম্
বভৌ বর্ষাম্বুভিঃ ক্লিন্নং পদ্মমাগলিতং যথা
126.34
দুর্যোধন উবাচ
আচার্য ত্রিবিধা যোনী রাজ্ঞাং শাস্ত্রবিনিশ্চয়ে
তত্কুলীনশ্চ শূরশ্চ সেনাং যশ্চ প্রকর্ষতি
126.35
যদ্যয়ং ফল্গুনো যুদ্ধে নারাজ্ঞা যোদ্ধুমিচ্ছতি
তস্মাদেষোঽঙ্গবিষয়ে ময়া রাজ্যেঽভিষিচ্যতে
126.36
বৈশংপায়ন উবাচ
ততস্তস্মিন্ক্ষণে কর্ণঃ সলাজকুসুমৈর্ঘটৈঃ
কাঞ্চনৈঃ কাঞ্চনে পীঠে মন্ত্রবিদ্ভির্মহারথঃ
অভিষিক্তোঽঙ্গরাজ্যে স শ্রিয়া যুক্তো মহাবলঃ
126.37
সচ্ছত্রবালব্যজনো জয়শব্দান্তরেণ চ
উবাচ কৌরবং রাজা রাজানং তং বৃষস্তদা
126.38
অস্য রাজ্যপ্রদানস্য সদৃশং কিং দদানি তে
প্রব্রূহি রাজশার্দূল কর্তা হ্যস্মি তথা নৃপ
অত্যন্তং সখ্যমিচ্ছামীত্যাহ তং স সুয়োধনঃ
126.39
এবমুক্তস্ততঃ কর্ণস্তথেতি প্রত্যভাষত
হর্ষাচ্চোভৌ সমাশ্লিষ্য পরাং মুদমবাপতুঃ